ފާއިތުވި އޮކްޓޫބަރު މަހު އާމްދަނީގެ ގޮތުގައި މީރާއަށް 1.25 ބިލިއަން ރުފިޔާ ލިބިއްޖެ އެވެ.
މިއީ މިދިޔަ އަހަރުގެ މި މުއްދަތުގައި ލިބުނު އާމްދަނީއަށް ވުރެ 24.6 އިންސައްތައިގެ ކުރިއެރުމެކެވެ. އަދި މި އަހަރުގެ މި މުއްދަތުގައި ލިބޭނެ ކަމަށް އެ އޮތޯރިޓީން އަންދާޒާ ކުރި އަދަދަށް ވުރެ 28.5 އިންސައްތަ އިތުރު އަދަދެކެވެ.
މީރާއިން ބުނީ މިދިޔަ އަހަރުގެ އޮކްޓޫބަރުގައި ލިބުނު އާމްދަނީއަށް ވުރެ ފާއިތުވި މަހުގެ އާމްދަނީ އިތުރުވެފައިވަނީ ޖީއެސްޓީ، އިންކަމް ޓެކްސް، ޓޫރިޒަމް ލޭންޑް ރެންޓް، އެއަރޕޯޓް ޑިވެލޮޕްމަންޓް ފީ އަދި އެއާޕޯޓު ސާވިސް ޗާޖުގެ ގޮތުގައި ލިބިފައިވާ އާމްދަނީ އިތުރު ވެފައި ވާތީ ކަމަށެވެ.
މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދަށްވުރެ ނިމުނު މަހު ޒިޔާރަތްކުރި ފަތުރުވެރިންގެ އަދަދު 2.5 އިންސައްތަ މަދުވި ނަމަވެސް ކުރީ އަހަރަށްވުރެ މީރާއަށް ލިބުނު އާމްދަނީ އިތުރުވެފައިވަނީ އެއާޕޯޓު ޓެކުހާއި ފީގެ ރޭޓަށް އައި ބަދަލުގެ ސަބަބުން ކަމަށް އެ އޮތޯރިޓީން ބުނެ އެވެ. އެއާޕޯޓު ޑެވެލޮޕްމަންޓު ފީ އަދި އެއާޕޯޓު ސާވިސް ޗާޖުގެ ގޮތުގައި އޮކްޓޫބަރު މަހު މީރާއަށް 132.65 މިލިއަން ރުފިޔާ ލިބުނެވެ.
އެ އޮތޯރިޓީން މިއަދު އާއްމުކުރި ތަފާސް ހިސާބުތަކަށް ބަލާއިރު، އޮކްޓޫބަރު މަހު ރިވެނިއުގެ ގޮތުގައި މީރާއަށް ލިބުނު އާމްދަނީގެ އެއްމެ ބޮޑު ބައެއް ހިއްސާ ކުރަނީ ޖީއެސްޓީ އެވެ. އެއީ އެ މަހު ލިބުނު ޖުމްލަ އާމްދަނީގެ 57.4 އިންސައްތަ އެވެ. ރުފިޔާއިން ބަލާނަމަ އެއީ، 716.47 މިލިއަން ރުފިޔާ އެވެ. ދެވަނައަށް އެއްމެ ބޮޑު އާމްދަނީއެއް ލިބިފައިވަނީ އިންކަމް ޓެކުހުންނެވެ. އެއީ، 127.97 މިލިއަން ރުފިޔާ އެވެ.
އޭގެއިތުރުން ޓޫރިޒަމް ލޭންޑު ރެންޓުގެ ގޮތުގައި 100.51 މިލިއަން ރުފިޔާ ލިބުނު އިރު، އެހެނިހެން ޓެކުހާއި ފީގެ ގޮތުގައި 170.71 މިލިއަން ރުފިޔާ އެ އޮތޯރިޓީއަށް ލިބުނެވެ.
އޮކްޓޫބަރު މަހު މީރާއިން ބަލައިގަނެފައިވާ އާމްދަނީގެ ތެރޭގައި 46.57 މިލިއަން އެމެރިކާ ޑޮލަރު ހިމެނޭ ކަމަށް އެ އޮތޯރިޓީން އާއްމުކުރި ރިޕޯޓުގައި ވެއެވެ.
މިދިޔަ މަހު ލިބޭނެ ކަމަށް ލަފާކުރި އަދަދަށް ވުރެ މީރާއަށް ލިބުނު އާމްދަނީ 28.5 އިންސައްތަ އިތުރުވެފައިވާ އިރު މި އަންނަ އަހަރުގެ ޖެނުއަރީން ފެށިގެން ޖީއެސްޓީއާއި ޓީޖީއެސްޓީގެ ގޮތުގައި ނަގާ މިންވަރު އިތުރު ކުރަން ސަރުކާރުގެ ފަރާތުން ރައްޔިތުންގެ މަޖިލީހަށް ވަނީ ބިލެއް ހުށަހަޅާފަ އެވެ. އެގޮތުން ޖީއެސްޓީ އަށް އިންސައްތައަށް އަދި ޓީޖީއެސްޓީ 16 އިންސައްތައަށް ބޮޑު ކުރުމަށް ސަރުކާރުން މަޖިލީހަށް ހުށަހެޅި ގޮތަށް މުޅި މަޖިލީހުގެ ކޮމިޓީން ވަނީ ފާސްކޮށްފަ އެވެ. ދެން އޮންނާނީ ކޮމިޓީ ރިޕޯޓު ދިރާސާ ކުރުމަށްފަހު މަޖިލީހުގެ ތަޅުުމުގައި ބިލާ މެދު ބަހުސްކޮށް ގޮތެއް ނިންމުމެވެ.
މިހާރު ހަ ޕަސެންޓުގައި ނަގަމުންދާ ޖީއެސްޓީ އަށް ޕަސެންޓަށް ބޮޑުކޮށްފި ނަމަ މުދަލާއި ހިދުމަތުގެ އަގު 2.5 ޕަސެންޓުން އުފުލޭނެ ކަމަށް ފިނޭންސް މިނިސްޓަރީން ލަފާ ކުރެ އެވެ.
