ޝަރްމް އަލް ޝެއިހް، މިސްރު (ނޮވެމްބަރު 12) - މިސްރުގައި ބަންދުކޮށްފައި ހުރި އެކްޓިވިސްޓު އަލާ އަބްދެލް ފައްތާހް މިނިވަން ކުރުމަށް ގޮވާލައި ކޮޕް27 ސަމިޓާ ދިމާކޮށް ގިނަ ބަޔަކު އެއްވެ އަޑުއުފުލައިފި އެވެ.
އެއްވުމުގައި އިސްކޮށް އުޅުނީ އަލާގެ ދައްތަ ސަނާ ސެއިފް އެވެ. އޭނާއާ އެކު އެތައް ސަތޭކަ ބަޔަކު ޖަމާވި އެވެ.
ނުހައްގުން ބަންދުކޮށްފައި ހުރުމުން އަލާ ބަނޑުހައި ހޫނުކަމުގެ ހަޅުތާލު ކުރާތާ ހަތް މަސް ވެއްޖެ އެވެ. މިދިޔަ އާދީއްތަ ދުވަހު އޭނާ ފެން ބުއިން ވެސް ހުއްޓާލި އެވެ.
އުމުރުން 40 އަހަރުގެ އަލާ މަގްބޫލުވީ 2011 ވަނަ އަހަރު މިސްރުގެ ކުރީގެ ރައީސް ހުސްނީ މުބާރަކްއާ ދެކޮޅަށް ހިންގި ބޮޑު އިންގިލާބުގެ ތެރެއިންނެވެ.
އޭގެ ފަހުން މިސްރުގައި އޮތީ ޑިމޮކްރެޓިކް އުސޫލުތަކާ އެއް ގޮތަށް އިންތިހާބު ކުރި ސަރުކާރެކެވެ. އެކަމަކު 2014 ވަނަ އަހަރު އަސްކަރީ ބަގާވާތެއްކޮށް، ސިސީ ވެރިކަމަށް ވަޑައިގެންނެވި އެވެ.
ސިސީ ވެރިކަމަށް ވަޑައިގެންނެވި ފަހު އަލާ ގިނަ ވަގުތު ހުރީ ޖަލުގައި ނުވަތަ ފުލުހުންގެ ބަންދުގަ އެވެ. މިދިޔަ އަހަރު އޭނާގެ މައްޗަށް ސާބިތުވީ ދޮގު ހަބަރު ފެތުރި ކަމަށެވެ. އަދި ފަސް އަހަރުގެ ޖަލު ހުކުމެއް އިއްވި އެވެ.
އޭނާ މިނިވަން ކުރުމަށް ގިނަ ވެރިން މިސްރަށް ބާރު އަޅާފައިވެ އެވެ. މިދިޔަ ހުކުރު ދުވަހު އަލާގެ އާއިލާއިން ވަނީ ރައީސްއަށް ލިބިދޭ ހާއްސަ ބާރުގެ ދަށުން އޭނާއަށް މައާފްކޮށްދިނުމަށް އެދި ރަސްމީކޮށް ހުށަހަޅައިފަ އެވެ.
