އިންޑިއާގެ ކުރީގެ ބޮޑު ވަޒީރު ރަޖީވް ގާންދީ އަވަހާރަކޮށްލުމުގައި ބައިވެރިވި ހަ މީހުން ދޫކޮށްލަން ސުޕްރީމް ކޯޓުން އަމުރުކޮށްފި އެވެ.
އެ އަމުރު ނެރުނީ ކުށް ސާބިތުވި އެސް ނާލިނީ އަދި އާރްޕީ ރަވީޗަންދްރަން އަވަހަށް ދޫކޮށް ދިނުމަށް އެދި ކޯޓަށް ހުށަހެޅުމުންނެވެ.
އެ މީހުން އެގޮތަަށް ކޯޓުގައި އެދުނީ މިދިޔަަ މޭ މަހު، އެ މައްސަލައިގައި ބަންދުކޮށްފައި ހުރި އޭޖީ ޕެރާރިވަލަން ދޫކޮށްލާފައި ވާތީ އެވެ.
ނަވާރަ ސަތޭކަ ނުވަދިހަ އެއް ވަނަ އަހަރު ރަޖީވް ގާންދީ އަވަހާރަކޮށްލުމުގެ ކުށުގައި ބަންދުކުރި ހަތް މީހުންނަށް ވެސް ކުރީ އުމުރު ދުވަހުގެ ޖަލު ހުކުމެވެ. އެ މީހުން ޖަލުގައި ހޭދަކުރީ 30 އަހަރެވެ.
ހުކުރު ދުވަހު ސުޕްރީމް ކޯޓުން ނެރުނު އަމުރުގައި ބުނީ ކުށް ސާބިތުވި މީހުން ޖަލުގައި ތިބި މުއްދަތުގައި އުޅުމާއި އަހުލާގު ރަނގަޅު ކަމަށެވެ.
ރަޖީވް ގާންދީ އަވަހާރަވީ މޭ 21، 1991 ވަނަ އަހަރު އިންޑިއާގެ ދެކުނުގައި އޮންނަ ޓަމިލް ނާޑޫ ސްޓޭޓުގައި ދިން ބޮމުގެ ހަމަލާއެއްގަ އެވެ.
އެ ހަމަލާ ދިނީ ސްރީލަންކާގެ ހަނގުރާމަވެރި ގްރޫޕް ލިބެރޭޝަން ޓައިގާޒް އޮފް ޓެމިލް އީލާމް (އެލްޓީޓީއީ) ނުވަތަ ތަމަޅަ ޓައިގަރުންނެވެ.
އަމިއްލައަށް މަރުވެގެން ދިން އެ ހަމަލާއަކީ 1987 ވަނަ އަހަރު އިންޑިއާއިން ތަމަޅަ ޓައިގަރުންނާ ދެކޮޅަށް މަސައްކަތް ކުރުމަށް ސްރީލަންކާ ސަރުކާރާ އެކު އެއްބަސްވުމަކަށް އައުމުން ދިން ހަމަލާއެކެވެ.
އިންޑިއާގެ ގިނަ އަދަދެއްގެ ސިފައިން ތަމަޅަ ޓައިގަރުންނާ ދެކޮޅަށް ހަނގުރާމަ ކުރަން ސްރީލަންކާއަށް ފޮނުވި އެވެ. ނަމަވެސް 1،200 އަށް ވުރެ ގިނަ އިންޑިއާ ސިފައިން މަރުވުމުން، ސިފައިން އަނބުރާ ގައުމަށް ގެންދިޔަ އެވެ.
ރަޖީވް ގާންދީ ނިސްބަތްވެވަޑައިގެންނެވި އަދި މިހާރުގެ އިދިކޮޅު ކޮންގްރެސް ޕާޓީއިން ވަނީ ސުޕްރީމް ކޯޓުގެ ނިންމުމަށް ފާޑުކިޔައިފަ އެވެ.
