މިއުނިކް (ނޮވެމްބަރު 10) - މި މަހު 20 ވަނަ ދުވަހު ފަށާ ފީފާ ވޯލްޑް ކަޕަށް ނެގި ޖަރުމަނުގެ ގައުމީ ޓީމުގެ ސްކޮޑް މިއަދު އިއުލާންކުރިއިރު، 2014 ވަނަ އަހަރުގެ ވޯލްޑް ކަޕް އެ ޓީމަށް ކާމިޔާބުކޮށްދިން ލަނޑުޖެހި އެޓޭކިން މިޑްފީލްޑަރު މާރިއޯ ގޮޓްޒާ ސްކޮޑުގައި ހިމަނައިފި އެވެ.
ޖަރުމަން ބުންޑަސްލީގާގެ އެއިންޓްރަކްޓް ފްރޭންކްފާޓަށް މިހާރު ކުޅެމުންދާ ގޮޓްޒާ ،30، އެންމެ ފަހުން ގައުމީ ޓީމަށް ކުޅުނީ 2017 ވަނަ އަހަރު ފްރާންސާ ދެކޮޅަށް ކުޅުނު އެކުވެރިކަމުގެ މެޗެއްގަ އެވެ.
"މާރިއޯ ގޮޓްޒާ ޓީމަށް އެނބުރި މިއައީ 2017 ވަނަ އަހަރުގެ ފަހުން ފުރަތަމަ ފަހަރަށް. އަހަރަމެން އެންމެނަށް ވެސް އެނގޭ ގޮޓްޒާ އަކީ މޮޅު ކުޅުންތެރިއެއްކަން. މި ފަހުން ކުޅުނު މެޗުތަކުގައި އޭނާ ދަނީ ރަނގަޅު ކުޅުމެއް ދައްކަމުން،" ގޮޓްޒާއާ ގުޅޭ ގޮތުން ޖަރުމަންގެ ކޯޗު ހަންސީ ފްލިކް ބުންޏެވެ.
ކުރިން ބޮރޫޝިއާ ޑޯޓްމަންޑާއި ބަޔާން މިއުނިކަށް ކުޅުނު ގޮޓްޒާ ސްކޮޑަށް ނެގިއިރު، ޑޯޓްމަންޑްގެ ކެޕްޓަން މާކޯ ރޮއިސް އާއި ތަޖުރިބާކާރު ޑިފެންޑަރު މެޓް ހަމަލްސް އަދި އިންޓަ މިލާންގެ ޑިފެންޑަރު ރޮބިން ގޯސެންސް އަށް ސްކޮޑުން ޖާގައެއް ނުލިބުނެވެ.
ރޮއިސް އަށް ސްކޮޑުން ޖާގަ ނުލިބުނީ ސެޕްޓެމްބަރު މަހު ލިބުނު އަނިޔާއަކާ ގުޅިގެންނެެވެ. ރޮއިސް ،33، އަށް 2014 ވަނަ އަހަރުގެ ވޯލްޑް ކަޕާއި 2016 ވަނަ އަހަރުގެ ޔޫރޯ ވެސް އަނިޔާގެ މައްސަލަތަކާހެދި ގެއްލުނެވެ.
ފްލިކް ބުނީ ރޮއިސް ނެތުމަކީ ޓީމަށް ލިބޭ އުނިކަމަކަށްވިޔަސް، "ރިސްކެއް" ނަގަން އޭނާ ބޭނުންނުވީ ކަމަށެވެ.
މިިދިޔަ ސެޕްޓެމްބަރު މަހު ދިމާވި އަނިޔާގެ މައްސަލައަކާ ގުޅިގެން ރޮއިސްގެ ފިޓްނަސްއާމެދު ސުވާލު އުފެދިފައިވާ ތަޖުރިބާކާރު ފޯވަޑް ތޯމަސް މުލާ ވަނީ ސްކޮޑުގައި ހިމަނައިފަ އެވެ.
އަނިޔާއާ ހެދި ޖަރުމަނު ޓީމުން ބާކީވި އަނެއް ކުޅުންތެރިއަކީ އާރްބީ ލައިޕްޒިގަށް ކުޅެމުން އަންނަ ފޯވާޑް، ޓިމޯ ވާނާ އެެވެ.
ވޯލްޑް ކަޕަށް ޖަރުމަންގެ ކޯޗު ނެގި 26 މީހުންގެ ސްކޮޑުގައި ޑޯޓްމަންޑްގެ ޒުވާން ފޯވަޑް ޔޫސޮފާ މޫކޯކޯ އަސް ވަނީ ފުރުސަތު ދީފައެވެ. މިއީ އުމުރުން 17 އަހަރުގެ މޫކޯކޯ ޖަރުމަންގެ ސީނިއާ ގައުމީ ޓީމަށް ނެގި ފުރަތަމަ ފަހަރެވެ. މި ސީޒަނު ޖަރުމަނު ލީގުގައި އޭނާ ވަނީ ޑޯޓްމަންޑަށް ހަ ލަނޑު ކާމިޔާބުކޮށްދީފައެވެ.
ވޯލްޑް ކަޕްގެ ގުރޫޕް އީގައި ޖަރުމަނާ އެކު އޮތީ ޖަޕާނާއި ސްޕެއިން އަދި ކޮސްޓަ ރީކާއެވެ. މުބާރާތުގައި ޖަރުމަން ކުޅޭ ފުރަތަމަ މެޗުގައި ނޮވެމްބަރު މަހުގެ 23 ވަނަ ދުވަހު ނުކުންނާނީ ޖަޕާނާ ދެކޮޅަށެވެ.
ވޯލްޑް ކަޕަށް ނެގި ޖަރުމަންގެ ސްކޮޑް:
ގޯލްކީޕަރުން: މެނުއަލް ނޯޔާ (ބަޔާން މިއުނިކް/ޖަރުމަން)، މާކް އަންދްރޭ ޓާ ސްޓެގެން (ބާސެލޯނާ/ސްޕެއިން)، ކެވިން ޓްރަޕް (އައިންޓްރަކްޓް ފްރޭންކްފާޓް/ޖަރުމަން)
ޑިފެންޑަރުން: އާމެލް ބެލާ-ކޯޗަޕް (ސައުތުހެމްޕްޓަން/އިންގްލެންޑް)، މަތިއަސް ގިންޓާ (ފްރައިބާގް/ޖަރުމަން)، ކްރިސްޓިއަން ގުއެންޓާ (ފްރައިބާގް/ޖަރުމަން)، ތީލޯ ކޭރާ (ވެސްޓް ހޭމް/އިންގްލެންޑް)، ލޫކަސް ކްލޮސްޓެމާން (އާރްބީ ލައިޕްޒިގް/ޖަރުމަން)، ޑޭވިޑް ރައުމް (އާރްބީ ލައިޕްޒިގް/ޖަރުމަން)، އެންޓޯނިއޯ ރޫޑިގާ (ރެއާލް މެޑްރިޑް/ސްޕެއިން)، ނީކޯ ޝްލޮޓަބެކް (ބޮރޫޝިއާ ޑޯޓްމަންޑް/ޖަރުމަން)، ނިކްލަސް ސޫލާ (ބޮރޫޝިއާ ޑޯޓްމަންޑް/ ޖަރުމަން)
މިޑްފީލްޑަރުންނާއި ފޯވަޑުން: ކަރީމް އަޑެޔޭމީ (ބޮރޫޝިއާ ޑޯޓްމަންޑް/ޖަރުމަން)، ހޫލިއަން ބްރަންޑްޓް (ބޮރޫޝިއާ ޑޯޓްމަންޑް/ޖަރުމަން)، ނިކްލަސް ފުއެލްކްރަގް (ވާޑާ ބްރޭމަން/ޖަރުމަން)، އާޖް ގްނަބްރީ (ބޮރޫޝިއާ ޑޯޓްމަންޑް/ ޖަރުމަން)، ލެއޮން ގޮރެޓްޒްކާ (ބަޔާން މިއުނިކް/ޖަރުމަން)، މާރިއޯ ގޮޓްޒާ (އެއިންޓްރަކްޓް ފްރޭންކްފާޓް/ ޖަރުމަން)، އިލްކައި ގުންޑޮގާން (މެންޗެސްޓާ ސިޓީ/އިންގްލެންޑް)، ކައީ ހަވާޓްޒް (ޗެލްސީ/އިންގްލެންޑް)، ޖޯނަސް ހޮފްމަން (ބޮރޫޝިއާ މޮންޗަންގްލަޑްބަކް/ޖަރުމަން)، ޔޯސުއާ ކިމިޗް (ބަޔާން މިއުނިކް/ޖަރުމަން)، ޔޫސުފާ މުކޯކޯ (ބޮރޫޝިއާ ޑޯޓްމަންޑް/ޖަރުމަން)، ތޯމަސް މުލާ (ބަޔާން މިއުނިކް/ޖަރުމަން)، ޖަމާލް މުސިއާލާ (ބަޔާން މިއުނިކް/ޖަރުމަން)، ލެރޯއި ސާނޭ (ބަޔާން މިއުނިކް/ޖަރުމަން)
