އުތުރު ކޮރެއާގެ ލީޑަރު ކިމް ޖޮންގް އުން ހަދިޔާ ކުރެއްވި ކުއްތާތައް ދައުލަތާ ހަވާލުކުރަން ނިންމަވާފައިވާ ކަމަށް ދެކުނު ކޮރެއާގެ ކުރީގެ ރައީސް މޫން ޖޭ އިން ވިދާޅުވެއްޖެ އެވެ.
އެގޮތަށް ނިންމެވީ އެ ކުއްތާތައް ބެލުމަށް ކުރަން ޖެހޭ ހޭދައިގެ މައްސަލައިގައި މޫން ޖޭ އިން އާއި މިހާރުގެ ސަަރުކާރާ ދެމެދު އުފެދުނު ހިޔާލު ތަފާތުވުމެއްގެ ސަބަަބުން ކަމަށް ބެލެވެ އެވެ.
ކިމް ޖޮންގް އުން އެ ކުއްތާތައް ހަދިޔާ ކުރެއްވީ 2018 ވަނަ އަހަރު ދެ ކޮރެއާގެ ދެމެދުގައި ބޭއްވި ސަމިޓަކަށް ފަހު އެވެ.
މިދިޔަ މޭ މަހު ރައީސްކަމުގެ ދައުރު ނިމުމުން ވެސް އެ ކުއްތާތައް ހުރީ މޫން ޖޭ އިންގެ ބެލުމުގެ ދަށުގަ އެވެ. އެހެން ނަމަވެސް، އެމަނިކުފާނު މިހާރު ބޭނުން ވަނީ ދައުލަތާ ހަވާލު ކުރުމަށެވެ.
ހުދު ކުލައިގެ ޕުންގްސަން ބްރީޑްގެ ދެ ކުއްތާގެ ނަމަކީ ގޯމީ އަދި ސޮންގްގަންގް އެވެ. ގާނޫނީ ގޮތުން އެ ކުއްތާތަކަކީ ދައުލަތުގެ މުދަލެވެ.
ރިޕޯޓުތައް ބުނާ ގޮތުން މޫން ޖޭ އިން އާއި އިންޓީރިއާ މިނިސްޓްރީއާ ދެމެދު އެކުލަވާލި އެއްބަސްވުމެއްގެ ދަށުން އެ ކުއްތާތަށް ބެލެހެއްޓުމަށް ދާ ހޭދަ ދައުލަތުން ފޯރުކޮށްދޭނެ އެވެ.
ދެކުނު ކޮރެއާގެ ނޫސްތަކުން ބުނާ ގޮތުގައި އެކަމަށް ކޮންމެ މަހަކު ވެސް 1،800 އެމެރިކާ ޑޮލަރު ހޭދަވެ އެވެ.
މޫން ޖޭ އިންގެ އޮފީހުން ބުނީ މިހާރުގެ ރައީސް ޔޫން ސުކް ޔޯލްގެ ސަރުކާރުން ކުއްލިއަކަށް އެއްބަސްވުމާ ދެކޮޅުވުމުން، އިތުރަށް ކުއްތާތައް ބެލެން ނެތް ކަމަށެވެ.
އެހެން ނަމަވެސް ޔޫން ސުކް ޔޯލްގެ އޮފީހުން ބުނީ ކުއްތާތަކުގެ މައްސަލައިގައި އެމަނިކުފާނު ނުފޫޒު ނުފޯރުވާ ކަމަށާއި އެކަމާ ގުޅޭ މަޝްވަރާ ކުރަނީ ކަމާ ބެހޭ އިދާރާތަކުން ކަމަށެވެ.
ޔޮންހަޕް ނިއުސް އެޖެންސީން ބުނީ ރައީސް ޔޫން ސުކް ޔޯލްގެ ބެލުމުގެ ދަށުގައި ހަތަރު ކުއްތާ އާއި ތިން ބުޅާ މިހާރު ވެސް ގެންގުޅުއްވާ ކަމަށެވެ.
