ޕާކިސްތާނުގެ އިދިކޮޅު ލީޑަރު އިމްރާން ހާނަށް އަމާޒުކޮށް ދިން ބަޑީގެ ހަމަލާއާ ގުޅިގެން ވަގުތުން ތަހުގީގެއް ފެށުމަށް އެ ގައުމުގެ ސުޕްރީމް ކޯޓުން ފުލުހުންގެ މައްޗަށް އަމުރުކޮށްފި އެވެ.
ކުރީގެ ބޮޑު ވަޒީރަށް އަމާޒުކޮށް ދިން ހަމަލާގައި ވަޒަން އެރީ ފަޔަށެވެ. އެ ހަމަލާ ދިނީ ބުރާސްފަތި ދުވަހު ޕަންޖާބް ޕްރޮވިންސްގައި ސަޕޯޓަރުންނާ އެކު ބޮޑު ހިނގާލުމެއް ކުރިއަށް ގެންދަވަނިކޮށެވެ.
އެ ހަމަލާގައި އެކަކު މަރުވެ 10 މީހުންނަށް އަނިޔާވި އެވެ. އިމްރާން ހާން ތުހުމަތު ކުރެއްވީ މިހާރުގެ ބޮޑު ވަޒީރު، އިންޓީރިއާ މިނިސްޓަރު އަދި ސިފައިން އިސް ޖެނެރަލެއް އެކަމުގެ ފަހަތުގައި ތިއްބެވި ކަމަށެވެ.
އެހެން ނަމަވެސް، އެ ހުރިހާ ފަރާތްތަކުން ތުހުމަތު ދޮގުކުރައްވަ އެވެ.
އިމްރާން ހާން ވިދާޅުވީ ހަމަލާގެ ތުހުމަތު ކުރެވޭ ސިފައިންގެ ޖެނެރަލަކީ ޖާސޫސީ އިދާރާ އައިއެސްއައިގެ އިސް މަގާމެއް ފުރުއްވާ ބޭފުޅެއް ކަމަށެވެ.
އެމަނިކުފާނު ވިދާޅުވީ ޕަންޖާބް ޕްރޮވިންސްގެ ފުލުހުންނަށް ދިން ބަޔާނުގައި އޭނާގެ ނަން ފާހަގަކޮށްފައި ވާތީ، މައްސަލަ ތަހުގީގު ކުރަން ފެށޭނީ އޭނާގެ ނަން އުނިކުރުމުން ކަމަށް އަންގާފައިވާ ކަމަށެވެ.
އެ މައްސަލައިގައި ސުޕްރީމް ކޯޓުން ބުނީ ހާދިސާ ހިނގިތާ ހަތަރު ދުވަސް ފާއިތުވެގެން ދިޔަ އިރު ވެސް ރަސްމީ ތަހުގީގެއް ފުލުހުން ނުފަށައި ތިބި ސަބަބެއް ސާފުކުރަން ބޭނުންވާ ކަމަށެވެ.
އޭގެ އިތުރުން 24 ގަޑިއިރުގެ ތެރޭގައި ތަހުގީގު ފެށުމަށް ވެސް ފުލުހުންގެ މައްޗަށް އަމުރުކުރި އެވެ.
"ފުލުހުން ތަހުގީގު ނުފަށައި ތިބި ނަމަ، ކްރައިމް ސީންގައި ހެކި ނެތިގެން ގޮސްފައިވުމަކީ އެކަށީގެންވާ ކަމެއް. އެހެންވެއްޖެ ނަމަ، މައްސަލައިގައި ހިޔާލު ތަފާތުވުން އުފެދި، ކޯޓުން ހެކި ބަލައިނުގަންނާނެ،" އުއްތަމަ ފަނޑިޔާރު އުމަރް އަތާ ބަންދިއާލް ވިދާޅުވި އެވެ.
އުމުރުފުޅުން 70 އަހަރުގެ އިމްރާން ހާނަށް ދިން ހަމަލާގައި ޒަަހަމްވީ ފަޔެވެ. އެމަނިކުފާނު ގެންދަވަނީ ހޮސްޕިޓަލުގައި ފަރުވާ ހޯއްދަވަމުންނެވެ.
މައްސަލައިގެ ތުހުމަތަށް އެކަކު ހައްޔަރުކޮށްފައި ހުރި އިރު، އޭނާއާ ދެކޮޅަށް މިހާތަނަށް ދައުވާއެއް ނުއުފުލަ އެވެ.
