މަސްދަރު ހާމަކުރަން މަޖުބޫރުކުރެވޭ ގޮތަށް، އޮންނަ އޮތުމާ މެދު ނޫސްވެރިން ކަންބޮޑުވުން ފާޅުކުރާތީ، ހެއްކާ ބެހޭ ގާނޫނަށް ސަރުކާރުން ހުށަހެޅި އިސްލާހުން، އެ ގާނޫނުގެ މަގުސަދު ގެއްލޭ ކަަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ މިއަދު ވިދާޅުވެއްޖެ އެވެ.
ހެއްކާ ބެހޭ ގާނޫނަށް ސަރުކާރުގެ ފަރާތުން ގަމު ދާއިރާގެ އެމްޑީޕީ މެމްބަރު މުހައްމަދު ވިސާމު ހުށަހެޅުއްވި އިސްލާހުގައިވާ ގޮތުން، މަސްދަރު ހާމަކުރުމުގެ އަމުރެއް ހޯދޭނީ ޓެރަރިޒަމްގެ ކުށްތަކާއި ގައުމީ ސަލާމަތަށް ނުރައްކާވެދާނެ ފަދަ އަމަލެއްގެ ކުށުގެ ދައުވާ މީހަކަށް އުފުލާ ހާލަތުގަ އެވެ. އެ ހާލަތުގައި މަސްދަރު ހާމަކުރަން މަޖުބޫރު ކުރެވޭނީ ޕްރޮސެކިއުޓާ ޖެނެރަލް އެކަން ހައިކޯޓަށް ހުށަހަޅުއްވައި، އެކޯޓުން ނެރޭ އަމުރަކުންނެވެ.
މެމްބަރު އިމްތިޔާޒް ވިދާޅުވީ ހެއްކާ ބެހޭ ގާނޫނު ހަދަން ސަރުކާރުން ފުރަތަމަ ބިލު ހުށަހެޅީ ނޫހެއްގައި ރިޕޯޓްކުރާ ޓެރަޒިޒަމްގެ މައްސަލައެއް ވަގުތުން ބެލުމަށް ޓަކައި ދައުލަތުން އެކަމުގެ ތެރެއަށް ވަގުތުން ވަނުމަށް މަގުފަހިކުރުމުގެ މަގުސަދުގައި ކަމަށެެވެ.
"[ ހެއްކާ ބެހޭ ގާނޫނު ހަދަން ހުށަހެޅި ބިލަކީ] ޓެރަރިޒަމްގެ މައްސަލައެއް ވެއްޖެއްޔާ ވަގުތުން ތަހުގީގެއް ހިންގެން ޖެހޭނެ ކަމަށް ބަލާފައި މަސްދަރު ހާމަކުރުމަށް ބޭނުންވެގެން ހުށަހެޅި ބިލެއް. މިވަގުތުގައި އަނެއްކާ ދެވަނަ ފަހަރަށް އެއަށް މި ހުށަހެޅި އިސްލާހުގައިވާ ގޮތުން ، ހަމަ އެކަނި މިކަން ކުރެވެން މިއޮތީ ކުށެއްގެ ދައުވާއަކާ ގުޅިގެން ހިނގާ ޝަރީއަތެއްގައި،" އިމްތިޔާޒް ވިދާޅުވި އެވެ.
އެއީ ސަރުކާރުން އޭރު ބިލު ހުށަހެޅި މަގުސަދު މުޅިން ގެއްލޭ ފަދަ ބަދަލެއް ކަމަށް އޭނާ ވިދާޅުވި އެވެ. މިހާރު ހުށަހަޅާފައިވާ ބިލު އޮތް ގޮތުން، ޓެރަރިޒަމާ ގުޅުން ހުރި ކަމެއް ނުވަތަ ގައުމީ ސަލާމަތާ ގުޅުން ހުރި ކަމެއް ތަހުގީގުކުރެވޭނެ ގޮތެއް ނެތް ކަމަށް ވެސް އޭނާ ވިދާޅުވި އެވެ.
"އެހެންވީމާ އެެއްކަލަ ހަގީގީ މަގުސަދު ގެއްލިއްޖެ ކަަމަށް އަޅުގަނޑު މި ދަންނަވަނީ،" އިމްތިޔާޒް ވިދާޅުވި އެވެ.
ހެއްކާ ބެހޭ ގާނޫނަށް ބަދަލުގެންނަން ސަރުކާރުން ހުށަހަޅާފައިވާ ބިލަށް މަޖިލީހުގައި ބަހުސް ފެށި ދުވަހު ވެސް އޭނާ އެ ބިލަށް ވަރަށް ބޮޑަށް ފާޑުވިދާޅުވި އެވެ. އެއީ "ސަރުކާރުގެ ސްޓޭންޑް ބަދަލުވުން" ކަމަށް އޭނާ އެ ދުވަހު ސިފަކުރެއްވި އެވެ.
