މޫސުމީ ބަދަލުގެ ސަބަބުން ލިބޭ ގެއްލުންތަކާ ގުޅިގެން މުއްސަނދި ގައުމުތަކުން ފަގީރު ގައުމުތަކަށް ފައިސާ ދިނުމުގެ މައްސަލަ ކޮޕް27 ސަމިޓުގެ އެޖެންޑާގައި ހިމަނައިފި އެވެ.
އެގޮތަށް ނިންމީ ސަމިޓު ފަށަން ވަގުތު ކުޑަތަންވެފައި ވަނިކޮށް ބޭއްވި މަޝްވަރާތަކުގަ އެވެ. މިއީ މޫސުމީ ބަދަލާ ގުޅޭ ގޮތުން ކޮންމެ އަހަރަކު ބާއްވާ ސަމިޓުގެ އެޖެންޑާގައި އެކަން ހިމެނި ފުރަތަމަ ފަހަރެވެ.
މޫސުމީ ބަދަލުގެ އަސަރު އެންމެ ބޮޑަށް ކުރަނީ ފަގީރު އަދި ތަރައްގީވަމުންދާ ގައުމުތަކަށެވެ. އެހެން ނަމަވެސް މޫސުމީ ބަދަލަށް މަގުފަހިވި ކަންކަން އެންމެ ގިނައިން ކޮށްފައި ވަނީ މުއްސަނދި ގައުމުތަކެވެ.
އެހެންކަމުން، މޫސުމީ ބަދަލުގެ އަސަަރުތަކުން އަރައިގަތުމަށް ނާޒުކު ގައުމުތަކަށް މުއްސަނދި ގައުމުތަކުން ފައިސާ ދޭން ޖެހޭނެ ކަމަށް ބައެއް ގައުމުތަކުން ދެކެ އެވެ.
titledesc
އެހެން ނަމަވެސް، މިއަދާ ހަމައަށް ވެސް އެކަން ރަސްމީ މަޝްވަރާގައި ހިމަނަން މުއްސަނދި ގައުމުތަކުން އެއްބަހެއް ނުވެ އެވެ. އެންމެ ފަހުން އޮތް ކޮޕް26 ގައި ވެސް ކުރިއެރުމެއް ނުލިބެ އެވެ.
ކޮޕް26 ސަމިޓުގެ އެންމެ ހޫނު އެއް ބަހުސަކަށްވީ މުއްސަނދި ގައުމުތަކުން ފޯރުކޮށްދޭން ޖެހޭ ފައިސާގެ ވާހަކަ އެވެ.
ކުރިން އެއްބަސްވީ 2020 ވަނަ އަހަރުގެ ކުރިން އަހަރަކު ފޯރުކޮށްދޭ އަދަދު 100 ބިލިއަން ޑޮލަރަށް މަތިކުރާނެ ކަމަށެވެ. ނަމަވެސް އެ ވައުދު ފުއްދާފައެއް ނުވެ އެވެ.
ރިޕޯޓުތައް ބުނާ ގޮތުން ކޮޕް27 ގެ އެޖެންޑާގައި ހިމެނި "ލޮސް އެންޑް ޑެމޭޖް" މަޝްވަރާއިން ފައިސާ ލިބޭނެކަމުގެ ޔަގީންކަމެއް ނުލިބޭނެ އެވެ. އެހެން ނަމަވެސް 2024 ގެ ކުރިން ގޮތެއް ނިންމޭތޯ ބަލާނެ އެވެ.
