ދުނިޔެ ނޭވާ ހޮޅިއަށް އެޅިފައިވާކަމުގެ އިންޒާރާ އެކު މޫސުމީ ބަދަލާ ގުޅޭ ބޮޑު ސަމިޓް ކޮޕް27 މިސްރުގައި ފަށައިފި އެވެ.
ސަމިޓު ފެށުމާ ދިމާކޮށް އދ. އިން އާދީއްތަ ދުވަހު ވަނީ ދުނިޔެ ހޫނުވުމާ ގުޅޭ ރިޕޯޓެއް ނެރިފަ އެވެ. އޭގައިވާ ގޮތުން ފާއިތުވި އަށް އަހަރަކީ މިހާތަނަށް އެންމެ ހޫނުގަދަވި އަހަރުތަކަށް ވުން އެކަށީގެންވެ އެވެ.
ރެޑް ސީގެ ޝަރްމް އަލް ޝެއިހް ރިސޯޓުގައި ކުރިއަށްދާ ސަމިޓުގައި އެކި ގައުމުތަކުގެ 120 ލީޑަރުން ބައިވެރިވެވަޑައިގަންނަވަ އެވެ.
ގައުމުތަކުގެ ވެރިންގެ ބައްދަލުވުމަށް ފަހު، ކުރިއަަށް އޮތް ދެ ހަފުތާގައި ކުރިއަށް ދާނީ މޫސުމީ ބަދަލާ ގުޅޭ ގޮތުން އަޅާނެ ފިޔަވަޅުތަކުގެ މަޝްވަރާ އެވެ.
ސަމިޓު ފެށުމުގެ ގޮތުން މި އަހަރު ރިޔާސަތު ބަލަހައްޓާ މިސްރުގެ ފޮރިން މިނިސްޓަރު ސާމިހް ޝުކްރީ ވެރިންނަށް ގޮވާލެއްވީ ޔޫކްރެއިން ހަނގުރާމައިގެ ސަބަބުން އުފެދިފައިވާ ހަކަތަ އާއި ކާބޯތަކެތީގެ ކާރިސާއާ އެކު މޫސުމީ ބަދަލާ ދެކޮޅަށް ކުރާ މަސައްކަތް މަޑުނުޖެއްސުމަށެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރޭޒްގެ ވީޑިއޯ މެސެޖުގައި ވިދާޅުވީ އާދީއްތަ ދުވަހު ނެރުނު "ސްޓޭޓް އޮފް ދަ ގްލޯބަލް ކްލައިމެޓް ރިޕޯޓް 2022" އަކީ މޫސުމީ ކާރިސާ ކިޔައިދޭ ވާހަކައެއް ކަމަށެވެ.
އެ ރިޕޯޓުގައި ސައިންސްވެރިން ބުނީ މިހާރު ދުނިޔޭގެ ފިނިހޫނުމިން، 1.15 ޑިގްރީ ސެލްސިއަސްއަށް ވުރެ މަތިވެފައިވާ ކަމަށާއި ފާއިތުވި އަށް އަހަރަކީ އެންމެ ހޫނުގަދަ އަހަރުތަކަށް ވުން އެކަށީގެންވާ ކަމަށެވެ.
ގުޓެރޭޒް ވިދާޅުވީ އެ ރިޕޯޓުގެ ހޯދުންތަކުގެ އަލީގައި މޫސުމީ ބަދަލާ ގުޅޭ އަަވަސް، ހަރުދަނާ ފިޔަވަަޅު އަޅަން ފަށަން ލިބޭ އެންމެ ރަނގަޅު ފުރުސަތަކީ ކޮޕް27 ކަމަށެވެ.
ކޮޕް27 ގެ ރަސްމީ ބައްދަލުވުންތަައް ފަށާނީ ހޯމަ ދުވަހު އެވެ. އެންމެ ފުރަތަމަ އޮންނާނީ ވޯލްޑް ލީޑާޒް ސަމިޓެވެ. އެއީ ގައުމުތަކުގެ ހާލަތު ބަޔާން ކުރަން ލިބޭ ފުރުސަތެކެވެ.
