ޓްވިޓާގެ އެކައުންޓް ވެރިފައިކޮށް، ނަމުގެ ކައިރީގައި ނޫ ފާހަގަ ބޭނުން ނަމަ ކުރިއަށް އޮތް ތަނުގައި ފައިސާ ދައްކަން ޖެހޭނެ ކަމަށް ކުންފުނިން ބުނެފި އެވެ.
އެޕަލް ޑިވައިސްތަކުގެ އަޕްޑޭޓެއްގައި ޓްވިޓާއިން ބުނީ އެ ފީޗާ ހުޅުވާލަނީ މަހަކު 7.99 ޑޮލަރަށް ޓްވިޓާ ބްލޫ ހިދުމަތުގައި ބައިވެރިވާ ފަރާތްތަކަށް ކަމަށެވެ. އެކަން އެންމެ ފުރަތަމަ ފަށާނީ ވަކި ގައުމުތަކެއްގަ އެވެ.
އެއީ އިނގިރޭސިވިލާތް، އެމެރިކާ، ކެނެޑާ، އޮސްޓްރޭލިއާ އަދި ނިއުޒީލޭންޑެވެ. އެ ބަދަލު މި ގައުމުތަކުގައި ޓެސްޓު ކުރުމަށް ފަހު ހުރިހާ ގައުމަކަށް ވެސް ތައާރަފު ކުރާނެ ކަމަށް ކުންފުނިން ބުނެ އެވެ.
ބިލިއަނަރު އެލޮން މަސްކް ޓްވިޓާ ގަނެ، ގެންނަ އެ ބަދަލާ މެދު ހިޔާލު ތަފާތުވުން ބޮޑެވެ. އެއީ ފޭކު އެކައުންޓުތައް ކުރި ހޯދަން ލިބޭ ފުރުސަތެއް ކަމަށް ބައެއް ފަރާތްތަކުން ދެކެ އެވެ.
މީގެ ކުރިން ޓްވިޓާގައި ވެރިފިކޭޝަން ސްޓޭޓަސް ލިބެނީ ހައި ޕްރޮފައިލް މީހުންނާއި، ނުފޫޒު ގަދަ މީހުންނާއި ކުންފުނިތަކަށެވެ. އެއީ އެ މީހުންގެ އައިޑެންޓިޓީ ކަށަވަރު ކުރުމަށް އިންނަ ނިޝާނެކެވެ.
ނޫ ކުލައިގެ ރަނގަޅު ފާހަގަ ނިޝާނެއް ނަމުގެ ކައިރީގައިވާ ނަމަ އެއީ އަސްލު އެކައުންޓެއް ކަމަށް ޓްވިޓާ ބޭނުން ކުރާ ފަރާތްތަކަށް ކަށަވަރު ކުރެވެ އެވެ.
އެހެން ނަަމަވެސް، ފައިސާ ދީގެން ވެރިފިކޭޝަން ސްޓޭޓަސް ލިބޭ ނަމަ، އައިޑެންޓިޓީ ފްރޯޑް އިތުރުވެ، މަގްބޫލް މީހުންގެ ނަމުގައި ފޭކު އެކައުންޓުތައް ހިންގާނެ ކަމަށް ބަައެއް ފަރާތްތަކުން ބުނެ އެވެ.
