ލަވަކިޔުންތެރިޔާ އަދި ރެޕް އާޓިސްޓް އާރޮން ކާޓާ އުމުރުން 34 އަހަރުގައި މަރުވެއްޖެ އެވެ.
އޭނާއަކީ ބެކްސްޓްރީޓް ބޯއީޒް ބޭންޑުގެ މެމްބަރު ނިކް ކާޓާގެ ކޮއްކޮ އެވެ.
ޓީއެމްޒީ ވެބްސައިޓުން ބުނީ އާރޮން ކާޓާ މަރުވެފައި އޮއްވާ ފެނުނީ ހޮނިހިރު ދުވަހުގެ ހެނދުނު އޭނާ ކެލިފޯނިއާގައި ދިރިއުޅޭ ގޭގެ ފާހާނާގެ ތެރޭގައި ކަމަށެވެ.
"އެކަން ދިމާވި ގޮތް ބަލައި ހޯދުމުގެ މަސައްކަތް މި ދަނީ ކުރަމުން،" އޭނާގެ އޭޖެންޓުން ޕީއޭ މީޑިއާއަށް ބުންޏެވެ.
ޓީއެމްޒީ ވެބްސައިޓުން ބުނީ ގެނބިގެން މީހަކު މަރުވިކަމުގެ ރިޕޯޓު ލިބުމުން ލޮސް އެންޖެލެސް ކައުންޓީ ފުލުހުން އާރޮން ކާޓާ ދިރިއުޅޭ ގެޔަށް ހޮނިހިރު ދުވަހުގެ ހެނދުނު ދިޔަ ކަމަށެވެ. އޭނާ މަރުވެފައި އޮއްވާ ފެނުނީ ފާހާނާގެ ބިލިގާ ތެރޭގަ އެވެ.
އާރޮން ކާޓާގެ މިޔުޒިކް ކެރިއާ ފެށީ ބެކްސްޓްރީޓް ބޯއީޒް ބޭންޑުގެ ޓުއާތަކާއި ކޮންސެޓުތަކުގެ ތެރެއިންނެވެ.
އާރޮން ކާޓާގެ އެންމެ ފުރަތަމަ ހަތަރު އަލްބަމަށް ބޮޑު މަގްބޫލުކަމެއް ލިބި، އެތައް މިލިއަން ކޮޕީ ވިކުނެވެ. ފުރަތަމަ އަލްބަމް ނެރުނީ އުމުރުން އެންމެ ނުވަ އަހަރުގަ އެވެ.
ދެ ވަނަ އަލްބަމް "އާރޮންސް ޕާޓީ (ކަމް ގެޓް އިޓް) ނެރުނީ 2000 ވަނަ އަހަރު އެވެ. އެއީ އޭނާގެ އެންމެ ކާމިޔާބު އަލްބަމެވެ. އާރޮން ކާޓާ ބޮޑުވަމުން އައި އިރު، ޕޮޕް ލަވަތަކާ ދުރުވެ ރެޕް އާޓިސްޓަކަށް ބަދަލުވި އެވެ.
އޭނާއަށް މަސްތުވާތަކެތީގެ ވަބާ ކުރިމަތިވެ، ތަކުރާރުކޮށް ފަރުވާ ހޯދަން މަރުކަޒުތަކަށް ދިޔަ އެވެ. އޭގެ އިތުރުން ދަރަނި ބޮޑުވުމުގެ މައްސަލަ އާއި މަސްތުވާތަކެތި ގެންގުޅުމާއި ފަރުވާ ކުޑަކޮށް ކާރު ދުއްވާތީ ފުލުހުންގެ ބެލުމުގެ ދަށަށް ގެންގޮސްފައިވެ އެވެ.
އާރޮން ކާޓާއަށް ދަރިއަކު ލިބުނީ 2021 ގަ އެވެ. ހޮލީވުޑް ރިޕޯޓާއިން ބުނާ ގޮތުގައި ދަރިފުޅުގެ ކަސްޓޮޑީ ހޯދުމަށް އޭނާ މި އަހަރުގެ ކުރީކޮޅު އަނެއްކާވެސް ރިހެބިލިޓޭޝަން ސެންޓަރަކަށް ދިޔަ އެވެ.
އާރޮން ކާޓާގެ މަރާ އެކު، އޭނާގެ ދަރިފުޅު ޕްރިންސްގެ މަންމަ މެލަނީ މާޓިން ނެރުނު ބަޔާނެއްގައި ބުނީ އެ ހިތާމަވެރި ހަބަަރު އަދިވެސް ގަބޫލުނުކުރެވޭ ކަމަށެވެ.
