ރާއްޖޭގައި ފުރަތަމަ ފަހަރަށް ވަލުތެރޭގައި ބޭއްވި ސައިކަލު ރޭހުގެ ޗެމްޕިއަންކަން ކުޅުދުއްފުއްޓަށް ނިސްބަތްވާ ރައިޑަރު، އަމީޒް އަބްދުﷲ ހޯދައިފި އެވެ.
ހިކިފަސް ޕްރޯ މަކުނުދޫ 2022 ގެ ނަމުގައި ރޭސިން އެސޯޝިއޭޝަން އޮފް މޯލްޑިވްސްއިން ހދ. މަކުނުދޫގައި އިއްޔެ ކުރިއަށް ގެންދިޔަ ރޭހުގައި މާލޭގެ ހަތް ރައިޑަރަކާއި، މަކުނުދޫގެ ފަސް ރައިޑަރުންނާއި އެހެން ރަށްރަށުގެ ފަސް ރައިޑަރުންނާ އެކު ފަސް ޓީމަކުން ޖުމްލަ 17 ރައިޑަރުން ބައިވެރިވިއެވެ.
އެއްދުވަހުގެ މި އޮފްރޯޑް ޓައިމް އެޓޭކުން އެއްވަނަ ހޯދި އަހުމަދު އަމީޒް ރޭސް ނިންމާފައި ވަނީ ތިން މިނެޓު 30.46 ސިކުންތުންނެވެ. އޭނާ ރޭސް ޖެހީ ވައި15 ޒެޑްއާރެއްގަ އެވެ. ދެވަނައަށް ދިޔަ ޖެފްރީ ލަފުއެންޓޭ ތިން މިނެޓު 34.35 ސިކުންތުން ރޭސް ނިންމި އިރު، ތިންވަނައަށް ދިޔަ އަހުމަދު ޝިފާޒް ރޭސް ނިންމީ ތިން މިނެޓު 34.35 ސިކުންތުންނެވެ. މި މުބާރާތުގެ އެއްވަނަ އާއި ތިންވަނަ ހޯދި ދެ ރައިޑަރުންނަކީ މުބާރާތުގެ އެންމެ ކާމިޔާބު ޓީމު، މީޓު ދަ މަންކީސްގެ ދެ ރައިޑަރުންނެވެ.
ހިކިފަސް ޕްރޯ އަކީ ރޭސިން އެސޯސިއޭޝަން މޯލްޑިވްސްގެ ފަރާތުން ރާއްޖޭގައި މޮޓޯ ސްޕޯޓްސް ކުރިއަރުވަން ކުރާ މަސައްކަތުގެ ތެރެއިން ބޭއްވި މިކަހަލަ ފުރަތަމަ ރޭހެވެ. އެ އެސޯސިއޭޝަނުން ބުނީ މިއީ މި އަހަރު ބޭއްވުނު އެންމެ ކާމިޔާބު އިވެންޓު ކަމަށާއި ކޮންމެ އަހަރަކުވެސް މި މުބާރާތް ބާއްވަމުން ގެންދާނެ ކަމަށެވެ. މި މުބާރާތަށް އާންމުންގެ ބޮޑު ތަރުހީބެއް ލިބުނެވެ.
