ދެކުނު ކޮރެއާގެ ޒިންކް މައިނެއްގައި ނުވަ ދުވަސް ވަންދެން ތާށިވެފައި ތިބި ދެ މީހަކު ސަލާމަތްކޮށްފި އެވެ.
އުމުރުން 62 އަހަރާއި 56 އަހަރުގެ ދެ ފިރިހެނުން މައިނުގައި ތާށިވެފައި ތިބި މުއްދަތުގައި މާ ބޮޑަށް ފިނިވާތީ އަލިފާންގަނޑެއް ރޯކޮށް، ޕްލާސްޓިކުން ޓެންޓެއް ހެދި އެވެ. އެ މީހުން ކެއުމަށް ބޭނުން ކުރީ އިންސްޓަންޓް ކޮފީ ޕައުޑަރު އެކަންޏެވެ.
އެ ދެ މީހުންގެ ހާލު ރަނގަޅު ކަމަށް ރިޕޯޓުތައް ބުނެ އެވެ.
މައިނުގައި ތާށިވެފައި ތިބި ދެ މީހުން ސަލާމަތް ކުރިއިރު، މިދިޔަ ހަފުތާގައި ސޯލްގައި ފިތިބާރުވެގެން 150 މީހުން މަރުވި ހާދިސާއާ ގުޅިގެން ދެކުނު ކޮރެއާ އަދިވެސް އޮތީ ޝޮކެއްގަ އެވެ.
މައިނުގައި ދެ މީހުން ތާށިވީ ބިމުގެ 200 މީޓަަރު އަޑިންނެވެ. އެ މީހުން ތާށިވީ އޮކްޓޯބަރު 26 ވަނަ ދުވަހު މައިނުން ބަޔެއް ވެއްޓުމުންނެވެ.
އެ މީހުން ސަލާމަތް ކުރީ ނޮވެމްބަރު ހަތަރު ވަނަ ދުވަހުގެ ރެ އެވެ. ރައީސް ޔޫން ސުކް ޔޯލް ވިދާޅުވީ އެ މީހުން ސަލާމަތް ކުރެވުމަކީ އާދަޔާ ހިލާފު ކަމެއް ކަމަށެވެ.
