މީގެ ކުރިން ޓީމު ފެނަކަ، ކްލަބް މޯލްޑިވްސް ކަޕްގެ ސެމީ ފައިނަލަށް ކުރި ކޮންމެ ދަތުރެއްގައި ބަދުނަސީބު ގޮތަކަށް ކަޓައިގެން ދާން ޖެހުމުން އެންމެ ބޮޑަށް މާޔޫސްވި އެއް ކުޅުންތެރިއަކީ އެ ޓީމުގެ މުހިންމު ތަރި ހުސެއިން ޝަރީފް (އޮންލީ) އެވެ.
މި ފަހަރު ފެނަކަ އިން މުބާރާތުގެ ސެމީ ފައިނަލްގެ ހަރުފަތް ކަނޑަތުކޮށް، ފައިނަލަށް ގޮސް ޓީމުގެ ތާރީހުގައި ހާއްސަ ކުރިއެރުމެއް ހޯދިއިރު، ޓީމުގެ ކެޕްޓަނަކަށް ހުރި އޮންލީ އަށް ލިބުނީ ވަރަށް ބޮޑު އުފަލެކެވެ.
"މިއީ ވަރަށް ބޮޑު ކާމިޔާބެއް އަސްލު، މި މަސައްކަތް ކުރާތާ ގާތްގަނޑަކަށް މިހާރު ހަ އަހަރު، ހަތް އަހަރު މިވީ، އަދި ކިރިޔާ މިވީ، އަމިއްލަ އަށް ބަލާއިރު ދެން ކާމިޔާބު އަސްލު، ހަތަރު ވަނަ ސެމީ ފެނަކައިގަ، އަދި ފައިނަލަށް މި ދެވުނީ ފެނަކައިގަ،" 2018 ވަނަ އަހަރު ތިލަފުށި ކޯޕަރޭޝަނަށް ކުޅެމުން ކްލަބް މޯލްޑިވްސް ކަޕްގެ ތަށި އުފުލާލި، އޮންލީ، މި ފަހަރުގެ ސެމީ ފައިނަލުން މޮޅުވި މެޗަށް ފަހު ބުންޏެވެ.
"ތިލަފުށީގައި އެއް އަހަރު ތަށި ލިބިއްޖެ، ތިން ސެމީ ކުޅެފިން، ދެ ވަނަ ފައިނަލް މިވީ މިހާތަނަށް،"
ފެނަކައިން މި ފަހަރުގެ ކްލަބް މޯލްޑިވްސް ކަޕްގައި ކުޅުނު ހަ މެޗުން މޮޅުވިއިރު، އެ ޓީމަށް އެންމެ ބޮޑު ޗެލެންޖެއް ކުރިމަތިވީ ސެމީ ފައިނަލުގައި ކްލަބް ވެމްކޯ އަތުން 5-3 އިން މޮޅުވި މެޗުގަ އެވެ. ވެމްކޯ އިން ސެމީ ފައިނަލަށް ދަތުރުކުރީ ކުއާޓާ ފައިނަލުގައި އެންމެ ފަހުގެ ޗެމްޕިއަން، ރޯޑް ރެކްރިއޭޝަން ކްލަބް (އާރްއާރްސީ) ބަލިކޮށްފަ އެވެ.
އޮންލީ ބުނީ ވެމްކޯގެ ތަފާތަކީ އެ ޓީމު ކުޅޭ "ޑިސިޕްލިން" ގޭމް ކަމަށެވެ. އެކަމަކު، އެ ފަދަ ޓީމަކާ ކުޅެން ފެނަކައިގެ ރޭވުން ދިޔައީ ރަނގަޅަށް ކަމަށް އޮންލީ ވަނީ ބުނެފަ އެވެ.
"ވެމްކޯގައި ތަންކޮޅެއް ޑިސިޕްލިން ގޭމެއް ކުޅޭތީ، އެ މީހުންނާ އެކު އުނދަގޫ. އާރްއާރްސީ ކުޅޭއިރު މާ އަވަސްވެފައި އެޓޭކް އަންނަލެން ގިނަ. ވެމްކޯގައި ތަންކޮޅެއް ގޭމް ބެލެންސްކޮށް ކުޅޭތީ. ފެނަކަ އަށް ތަންކޮޅެއް ފަސޭހަ،" ލ. ގަަމު ފުޓްސަލް ޓީމަށް ވެސް މޮޅު ކުޅުމެއް ދައްކަމުން އަންނަ އޮންލީ ބުންޏެވެ.
ކްލަބް މޯލްޑިވްސް ކަޕްގެ މި ފަހަރުގެ މުބާރާތް އޮންލީ އަށް ދެން ހާއްސަވާ ސަބަބަކީ މި ފަހަރުގެ މުބާރާތުގައި އޭނާ ހީނުކުރާ ކަމެއް ހާސިލްވަމުން ދިއުމެވެ. މުބާރާތުގެ ފައިނަލަށް އައިއިރު، ލަނޑު ލިސްޓުގެ ކުރީގައި އޮތީ އޮންލީ އެވެ.
އޮންލީ ވަނީ މިހާތަނަށް މުބާރާތުގައި ކުޅުނު މެޗުތަކުން 12 ގޯލު ޖަހައިފަ އެވެ. އޭނާއާ ދެން އެންމެ ވާދަކުރާ ކުޅުންތެރިއަކީ އެ ޓީމުގެ އަޔާޒް އަހުމަދު (އަޔާ) އެވެ. އަޔާ ޖެހީ 10 ގޯލެވެ.
"އަސްލު ހިޔެއް ނުކުރަން އެއްވެސް ވަރަކަށް (ލަނޑު ލިސްޓުގެ ކުރީގައި އޮންނާނެ ކަމަކަށް. ދެން، ފަހަތަށް ކުޅޭއިރުގައި އެހާ އުންމީދެއް ނުވެސް ކުރާނެތާދޯ. ސިވިލް ކޯޓު މެޗުގައި ހަ ގޯލު ޖެހުނީމަ ވެސް އުންމީދެއް ނުކުރަން އެއްވެސް ވަރަކަށް،" މުބާރާތުގައި މިހާތަނަށް ދެ މެޗެއްގެ މޮޅު ކުޅުންތެރިއާގެ މަގާމު ވެސް ހޯދާފައިވާ އޮންލީ ބުންޏެވެ.
"މުއްކި އާއި އަޔާ އާއި އޮންލީ، ތިން މީހުން އެކުގައި ޓީމުގައި ތިބީމަ އަސްލު ވަރަށް ފަސޭހަވެގެން އޮންލީ އަށް ދިޔައީ، އެޓޭކް ކުރަން ބެލިޔަސް، ޑިފެންސް ކުރަން ބެލިޔަސް ފަސޭހަކޮށް އޮތީ. ދެން، މި ފަހަރު އައްޒާމް ވެސް އެބަހުރި،"
ފެނަކަ އިން މި ފަހަރުގެ ފައިނަލުގައި ކުޅޭއިރު، އެ ޓީމާ ދެކޮޅަށް ނުކުންނަ އެމްޕީއެލް ވަނީ މި މުބާރާތުގެ ތަށި ތިން ފަހަރު ހޯދައިފަ އެވެ. އެކަމަކު، މިއީ ފަސް އަހަރު ތެރޭ އެމްޕީއެލް އިން ކުޅޭ ފުރަތަމަ ފައިނަލް އެވެ. އެމްޕީއެލް އާއި ފެނަކަ ކުޅޭ ފައިނަލް މެޗު ފަށާނީ ހުޅުމާލެ ރެހެންދި ފުޓްސަލް ދަނޑުގައި މިރޭ 20:30 ގަ އެވެ.
