ފިންލޭންޑްގެ ބޮޑު ވަޒީރު ސަންނާ މަރިން ޕާޓީކުރާ ވީޑިއޯއެއް މިދިޔަ އޯގަސްޓު މަހު އާއްމުވުމުން ހިންގި ތަހުގީގަށް ފަހު، އަހުލާގީ މިންގަނޑާ ހިލާފުވެފައި ނުވާ ކަމަށް ނިންމައިފި އެވެ.
އުމުރުން 36 އަހަރުގެ މަރިންގެ ވީޑިއޯއިން ފެންނަނީ އެކުވެރިންނާއި ސެލެބްރިޓީންނާ އެކު ޕާޓީއެއްގައި ފޯރިނަންގަވާ މަންޒަަރެވެ. އެކަމަނާ ވިދާޅުވީ ގާނޫނާ ހިލާފު އެއްވެސް ކަމެއް ނުކުރާ ކަމަށެވެ.
ރިޕޯޓުތަައް ބުނާ ގޮތުން އެ ވީޑިއޯ ލީކުވުމުން، މަރިންއާ ދެކޮޅަށް ގިނަ ޝަކުވާތަކެއް ހުށަހެޅި އެވެ. އެގޮތުން އެކަމަނާގެ އުޅުއްވުމުގެ ސަބަބުން ފިންލޭންޑްގެ އަގު ވެއްޓި ސަލާމަތަށް ނުރައްކާވާ ކަމަށް ބުންޏެވެ.
އެހެން ނަމަވެސް ޗާންސެލާ އޮފް ޖަސްޓިސް ޓުއޮމަސް ޕޮޔިޓްސީ ތަހުގީގަަށް ފަހު ނިންމެވީ ބޮޑު ވަޒީރުގެ ޒިންމާތައް އަދާ ކުރެއްވުމުގައި މަރިންގެ ކިބައިން އެއްވެސް އިހުމާލެއް ފާހަގަވެފައި ނުވާ ކަމަށެވެ.
ވީޑިއޯ ލީކުވެ، ފާޑުކިޔުން އަމާޒުވުމުން މަރިން ވަނީ މަސްތުވާތަކެއްޗަށް ވެސް ޓެސްޓު ކުރައްވައިފަ އެވެ. އެ ޓެސްޓުގެ ނަތީޖާ އައި ނެގެޓިވްކޮށެވެ.
މީގެ ކުރިން ވެސް މަރިން މިޔުޒިކް ފެސްޓިވަލްތަކުގައި އުޅުއްވާ ފޮޓޯތައް އާއްމުވެފައިވާ އިރު، އެކަމަނާ ޕާޓީތަކަށް ވަޑައިގަންނަވާކަން ވެސް އޮންނަނީ ހާމަކޮށްފަ އެވެ.
މިދިޔަ އަހަރު ކޮވިޑަށް ޕޮޒިޓިވް މީހަކާ ކްލޯޒް ކޮންޓެކްޓްވުމަށް ފަހު، ކްލަބަކަށް ވަޑައިގެންނެވި މައްސަލަ ފެންމަަތިވެ އެކަމަނާ މައާފަށް އެދިވަޑައިގެންނެވި އެވެ.
