ޖަރުމަނުވިލާތުގެ ވެރިރަށް ބާލިންގައި އެކްސިޑެންޓުވި މީހަކު މަރުވެ، މޫސުމީ ބަދަލާ ގުޅޭ އެކްޓިވިސްޓުން އެހެން މީހުންގެ ފުރާނައަށް ނުރައްކާ ކުރަމުންދާ ކަމަށް ގްރީން ޕާޓީއިން ތުހުމަތުކޮށްފި އެވެ.
ހޯމަ ދުވަހު ބައިސްކަލްގައި ދިޔަ އަންހެނަކު އެކްސިޑެންޓުވެ، ކޮންކްރީޓް މިކްސާ ލޮރީއެއްގެ ދަށުވި އެވެ. ފަޔާ ސާވިސްއިން ބުނީ ހާއްސަ ރެސްކިއު އުޅަނދު ލަސްވީ "ލާސްޓް ޖެނެރޭޝަން" ގްރޫޕުން މަގު ބަންދު ކުރުމުން ކަމަށެވެ.
އުމުރުން 44 އަހަރުގެ އަަންހެން މީހާގެ މަރުގެ ހަބަރު ފެތުރުނީ ހުކުރު ދުވަހު އެވެ.
ވައިސް ޗާންސެލަރު އަދި ގްރީން ޕާޓީގެ އިސް ލީޑަރުންގެ ތެރޭގައި ހިމެނޭ ރޮބަޓް ހަބެކް ވިދާޅުވީ މީހުންގެ ފުރާނަ ނުރައްކަލަށް ހުށަހެޅުމަކީ "ކްލައިމެޓް ހަރަކާތަށް ދޭ ގެއްލުމެއް" ކަމަށެވެ.
"ލާސްޓް ޖެނެރޭޝަން" ގްރޫޕުން ބުނީ އެ ގްރޫޕްގެ މެމްބަރުންތަކުން އެކްސިޑެންޓު ހިނގި ހިސާބުގައި މުޒާހަރާ ކުރި ކަމަށެވެ. އެ ގްރޫޕުން ބުނީ "މުޅި މީޑިއާ" އެ މީހުންނާ ދެކޮޅަށް ތެދުވެފައިވާ ކަމަށާއި އަންހެން މީހާގެ މަރާ މެދު ހިތާމަ ކުރާ ކަމަށެވެ.
ޖަރުމަނުގައި ކްލައިމެޓް އެކްޓިވިސްޓުން މުޒާހަރާ ކުރަން ގެންގުޅޭ އުކުޅުތަކާ މެދު ގައުމީ ފެންވަރުގައި ދަނީ ބަހުސް ކުރަަމުންނެވެ. ސިޓީގެ މަގުތައް ބަންދު ކުރުމަކީ އެކްޓިވިސްޓުން އާއްމުކޮށް ކުރާ ކަމެކެވެ.
