ލަންޑަން (ނޮވެމްބަރު 4) - ޔޫރޮޕާ ލީގުގެ ގްރޫޕް ސްޓޭޖުގެ ފަހު މެޗުތަކުން ރޭ މޮޅުވި އާސެނަލް މުބާރާތުގެ ގަދަ 16 ބުރުން ފުރުސަތު ހޯދިއިރު، މެންޗެސްޓާ ޔުނައިޓެޑް ކޮލިފައިން ޕްލޭއޮފްގައި ވާދަކުރަން ޖެހިއްޖެ އެވެ.
އާސެނަލް، ރޭ ކުޅުނު މެޗުން ވަނީ އަމިއްލަ ދަނޑުގައި ކުުޅުނު މެޗުން ސްވިޒަލެންޑްގެ ޒިއުރިކް އަތުން 1-0 އިން މޮޅުވެފަ އެވެ. ރެއާލް ސޮސިއެޑާޑް ދަނޑުގައި ޔުނައިޓެޑް މޮޅުވީ 1-0 އިންނެވެ. އާސެނަލްގެ ހަމައެކަނި ގޯލު ޖެހީ އޭރިއާބޭރުން، ކިއެރަން ޓިއެރަނީ ޖެހި ގޯލުންނެވެ. ޔުނައިޓެޑްގެ ގޯލު ޖެހީ ކްރިސްޓިއާނޯ ރޮނާލްޑޯ ދިން ބޯޅައަކުން އަލެހަންދްރޯ ގާނާޗޯ އެވެ.
ގްރޫޕް އޭގެ މެޗުތައް ނިމުނުއިރު، އާސެނަލް އެއް ވަނަ އަށް ދިޔައީ 15 ޕޮއިންޓާ އެކު އެވެ. ދެ ވަނަ އަށް ދިޔައީ 13 ޕޮއިންޓް ހޯދި ޕީއެސްވީ އައިންދޯވަން އެވެ. ތިން ވަނައިގައި ހަތަރު ޕޮއިންޓާ އެކު ނޯވޭގެ ބޯޑޯ/ގިލްްމް އޮތްއިރު، ފުލުގައި ޒިއުރިކް އޮތީ ތިން ޕޮއިންޓް ހޯދައިގެންނެވެ.
ކޮންމެ ގްރޫޕެއްގެ އެއް ވަނަ ޓީމަށް ލިބޭނީ ގަދަ 16 ޓީމުގެ ބުރުގެ ސީދާ ޖާގައެކެވެ. ދެ ވަނަ އަށް ދާ ޓީމެއް ޖެހޭނީ ގަދަ 16 ޓީމުގެ ބުރަށް ކޮލިފައިވާން ނޮކައުޓްގެ ޕްލޭއޮފް ބުރުގައި ކުޅޭށެވެ. އެ ބުރުގައި އެ ޓީމުން ކުޅޭނީ ޗެމްޕިއަންސް ލީގުގެ ގްރޫޕްތަކުގެ ތިން ވަނަ އަށް ދާ ޓީމުތަކާ އެވެ. ޔޫރޮޕާ ލީގުގެ ގްރޫޕްގެ ތިން ވަނަ އަށް ދާ ޓީމު ދެން ކުޅެން ޖެހޭނީ ޔުއެފާ ކޮންފަރެންސް ލީގުގަ އެވެ.
ގްރޫޕް އީގެ މެޗުތައް ނިމުނުއިރު، އެއް ވަނަ އަށް ދިޔަ ރެއާލް ސޮސިއެޑާޑާ ދެ ވަނައިގައި ނިންމި ޔުނައިޓެޑަށް ވެސް ލިބުނީ 15 ޕޮއިންޓެވެ. ލަނޑުގެ ތަފާތުން ސޮސިއެޑާޑް އެއް ވަނަ ހޯދީ އެވެ. ތިން ވަނަ ހޯދި މޮލްޑޯވާގެ ޓީމު ޝެރިފް ޓިރާސްޕޯލް އެވެ. އެ ޓީމަށް ވަނީ ހަ ޕޮއިންޓް ލިބިފަ އެވެ. ސައިޕްރަސްގެ އޮމޯނިއާ ނިކޯސިއާ ގްރޫޕް ނިންމާލީ ޕޮއިންޓެއް ވެސް ނުލިބި އެވެ.
ޔޫރޮޕާ ލީގުގެ ގަދަ 16 އިން ފުރުސަތު ހޯދީ އާސެނަލާއި ސޮސިއެޑާޑްގެ އިތުރުން ބެލްޖިއަމްގެ ޔޫނިއަން ސެއިންޓް-ގިލޯއިސް، ރެއާލް ބެޓިސް، ފެޔަނޫޑް، ފްރެއިބާގް، ފެރެންޝްވަރޯސް އަދި ފެނަބާޗޭ އެވެ.
ޔުނައިޓެޑާއި ޕީއެސްވީގެ އިތުރުން ނޮކައުޓް ޕްލޭއޮފް ބުރުގައި ކުޅޭނީ މޮނާކޯ، ނޯންޓެސް، މިޓްޔައެލަންޑް، ޔޫނިއަން ބާލިން، ރޯމާ އަދި ރެނެސް އެވެ. މި ޓީމުތަކާ ކުޅެން ޖެހޭނީ ޗެމްޕިއަންސް ލީގުގެ ގްރޫޕްތަކުގެ ތިން ވަނަ އަށް ދިޔަ ޓީމުތައް ކަމަށްވާ އަޔަކްސް، ބަޔާ ލެވަކޫސަން، ބާސެލޯނާ، ސްޕޯޓިން، ރެޑްބުލް ސަލްޒްބާގް، ޝަހުތަރު ޑޮނެސްކް، ސެވިއްޔާ އަދި ޔުވެންޓަސް އެވެ.
ކޮންފަރެންސް ލީގުގައި އިނގިރޭސި ޕްރިމިއާ ލީގުގެ ވެސްޓް ހޭމް ޔުނައިޓެޑް ގްރޫޕް ސްޓޭޖު ނިންމާލީ ސައްތަ އިން ސައްތަ ރެކޯޑަކާއެކު އެވެ. ފަހު މެޗުގައި ރޭ ވަނީ ރުމޭނިއާގެ އެފްސީއެސްބީ ދަނޑުގައި 3-0 އިން މޮޅުވެފަ އެވެ.
