އިންޑިއާގެ ވެރިރަށް ނިއު ދިއްލީގައި އަނެއްކާވެސް ނުރައްކާތެރި މިންވަރަކަށް ވައި ތަގައްޔަރުވެއްޖެ އެވެ.
ވައިގައި ހިމެނޭ އެންމެ ނުރައްކާތެރި ޕާޓިކަލްއަކީ ޕީއެމް2.5 އެވެ. އެއީ އިންސާނުންގެ ލޭގެ ތެރެއަށް އެތެރެވެވޭހާ ކުދި ޕާޓިކަލްތަކެވެ.
ވައިގެ ކޮލިޓީ މޮނީޓާ ކުރާ އައިކިއުއެއާއިން ބުނީ ބުރާސްފަތު ދުވަހުގެ ހެނދުނު ޕީއެމް2.5 ހުރީ ކޮންމެ ކިއުބިކް މީޓަރަކަށް 588 ގައި ކަމަށެވެ.
އެއީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަނޑައަޅާފައިވާ މިންވަރަށް ވުރެ 40 ގުނަ އިތުރެވެ.
"މިއީ ދިއްލީގައި އުޅެން އެންމެ ކަމުނުދާ ދުވަސްވަރު. މި ދުވަސްވަރު ތާޒާކޮށް ނިދިން ހޭނުލެވޭނެ،" ފުލުސް އޮފިސަރު ހެމް ރާޖް އޭއެފްޕީއަށް ބުންޏެވެ.
"ހެނދުނު ގަޑީގައި ހަށިގަނޑު ވަރިބަލިވެ ކަންނެތްކޮށްލާނެ... ލޯ ހުންނާނީ އަބަދުވެސް ފެންކަޅިވެފައި. ކަރަށް އުނދަގޫވާނެ."
ދިއްލީގެ ވައި ތަގައްޔަރުވުމަކީ ކޮންމެ އަހަރަކު ވެސް ފިނި މޫސުމުގައި ދިމާވާ މައްސަލަ އެކެވެ. ފިނި މޫސުމާ ދިމާކޮށް ދިއްލީގެ ވައި ތަގައްޔަރުވާ އެއް ސަބަބަކީ ވަށައިގެންވާ ސްޓޭޓުތަކުގައި ހުންނަ ދަނޑުބިންތަކުން އުފެދޭ ކުނި އެންދުމެވެ. ދިއްލީ ވަށައިގެންވާ ސަރަހައްދުގައި އެތައް މިލިއަން މީހުން ދިރިއުޅޭ ނޮއިޑާ އަދި ގާޒީއާބާދު ފަދަ ސިޓީތައް ވެސް ހުރެ އެވެ.
ވިހިވިހި ވަނަ އަހަރު ލޭންސެޓުން ހެދި ދިރާސާއަކުން އެނގުނު ގޮތުގައި 2019 ވަނަ އަހަރު އިންޑިއާގައި 1.67 މިލިއަން މީހުން މަރުވީ ވައި ތަގައްޔަރުވުމުން ދިމާވި މައްސަލަތަކުގަ އެބެ. އޭގެ ތެރެއިން 17،500 ދިއްލީއިން މަރުވި އެވެ.
ވައި ތަގައްޔަރުވުން ކުޑަކުރަން ދިއްލީގެ އިދާރާތަކުން ގަވާއިދުން އެކި ކަހަލަ ފިޔަވަޅުތައް އަޅަ އެވެ. އެގޮތުން ދޭތެރެ ދޭތެރެއިން ކޮންސްޓްރަކްޝަން މަސައްކަތް ވެސް ހުއްޓުވަ އެވެ. އެކަމަކު އެ ފިޔަވަޅުތަަކުން ނަތީޖާއެއް ނުފެނެ އެވެ.
