ކްލަބް މޯލްޑިވްސް ކަޕްގެ ދެ ޑިވިޝަނުގެ (އަންހެން/ ފިރިހެން) ފައިނަަލަށް ވެސް އެމްޕީއެލް ދަތުރުކޮށްފައިވާއިރު، މިއީ އެ ކުންފުންޏަށް ހާއްސަ ފަަހަރަަކަށް ހެދުމުގެ ފުރުސަތު އެބައޮތް ކަމަށް އެމްޕީއެލް އަންހެން ޓީމުގެ ކެޕްޓަން، ފާތިމަތު ސާލިޔާ (ޝާ) ބުނެފި އެވެ.
ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގެ ފައިނަލުގައި މިރޭ އެމްޕީއެލް އިން ނުކުންނާނީ ދިވެހި ސިފައިންގެ ކްލަބާ ދެކޮޅަށެވެ. އަދި ކްލަބް މޯލްޑިވްސް ކަޕްގެ ފިރިހެން ޑިވިޝަނުގެ ފައިނަލުގައި އެމްޕީއެލް އިން އަންނަ ހޮނިހިރު ދުވަހުގެރޭ ޓީމު ފެނަކައާ ބައްދަލުކުރާނެ އެވެ.
މިދިޔަ ތިން އަހަރު އެމްޕީއެލްގެ އަންހެން ޓީމުން، 18/30 ފުޓްސަލް ފިއެސްޓާގެ ޗެމްޕިއަންކަން ހޯދާފައިވާއިރު، އެ ޓީމަކީ އެ ކާމިޔާބީ ހާސިލްކުރި ފުރަތަމަ ޓީމެވެ. މި ފަހަރުގެ ފައިނަލަށް ނުކުންނައިރު، އެ ރެކޯޑް އިތުރަށް ފުރިހަމަކޮށް "ތާރީހުގެ އިތުރު ސޮފުހާއެއް" ލިޔުމަށް އެމްޕީއެލް އިން ބޭނުންވެ އެވެ.
"އަސްލު ޝާ ގަބޫލުކުރާގޮތުގައި ކާމިޔާބީއެއް ހޯދުމަށް ވުރެން އެ މެއިންޓެއިން ކުރުން މި އުނދަގޫވަނީ، ތިން އަހަރު އެކަން ކުރެވިއްޖެ، މި ފަހަރު ވެސް ޓީމު މި އޮތީ އެ ސްޕިރިޓް (އަޒުމު) ގައި،" މިރޭގެ ފައިނަލުގެ ކުރިން "އަދަދު" އަށް ސާލިޔާ ބުންޏެވެ.
މި ފަހަރުގެ ކްލަބް މޯލްޑިވްސް ކަޕްގައި އެމްޕީއެލް އިން ފަށަން ޖެހުނީ އެންމެ ބޭނުންވި ގޮތަކަށް ނޫނެވެ. ފުރަތަމަ މެޗުގައި ކްލަބް ވެމްކޯއާ އެއްވަރުވިއިރު، ދެ ވަނަ މެޗުގައި ޓީމު ފެނަކަ އަތުން ވަނީ ބަލިވެފަ އެވެ. ފެށުން އުނދަގޫކޮށް ދިޔަ ކަމެއްގެ ގޮތުގައި ސާލިޔާ ފާހަގަކުރީ އެ ޓީމުގެ ކޯޗު ބަދަލުވުމާއި ޓީމަށް ދިމާވެފައި އޮތް އަނިޔާގެ މައްސަަލަތަކެވެ.
އެމްޕީއެލް އިން މުބާރާތް ފެށީ ކޯޗަކަށް މުހައްމަދު ޝާހީން ހުރެ އެވެ. އެކަމަކު، ފުރަތަމަ މެޗަށް ފަހު އެމްޕީއެލް އިން ކޯޗު ބަދަލުކޮށް މީގެ ކުރިން ފަސް ވަރަކަށް އަހަރު ވެސް އެ ޓީމަށް އިރުޝާދުދިން ކޯޗު އަހުމަދު ވިސާލް (އަންދު)އާ އަލުން ޓީމު ހަވާލުކުރި އެވެ.
"ދި ދެ ކަންތައް (ކޯޗު ބަދަލުވުމާއި އަނިޔާގެ މައްސަލަ ފުރަތަމަ ދެ މެޗުގައި) އަސްލު ދިމާވީ، އެކަމަކު، މަޑުމަޑުން ޓީމު ދިޔައީ ފޯމަކަށް އެޅެމުން، ދެން އަސްލު ބޭނުންވާ ލެވަލްގައި ކުޅެވެން ފެށީ ލީގު ބުރުގައި ސިފައިންނާ ދެކޮޅަށް، މިހެން ބުންޏަސް އެމްޕީއެލް ޓީމުން އަނިޔާގެ ވާހަަކަ އެކްސްކިއުޒަކަށް ނުހަދާނެ،" ސިފައިން ކޮޅަށް އެމްޕީއެލްގެ މުހިންމު ގޯލު ޖެހި ސާލިޔާ ބުންޏެވެ.
މި ފަހަރުގެ ފައިނަލުގައި އެމްޕީއެލް އިން ސިފައިންނާ ދެކޮޅަށް ކުޅޭއިރު، މި ދެ ޓީމު ލީގު ބުރުގައި ކުޅުނު މެޗުން 5-1 އިން އެމްޕީއެލް މޮޅުވެފައި އޮތުމަކީ އެ ޓީމަށް "އެޑްވާންޓޭޖެއް"ގެ ގޮތުގައި ސާލިޔާ ނުދެކެ އެވެ. ސާލިޔާ ބުނީ ތަށި ދިފާއުކުރަން ނުކުންނަ ޓީމަށް އޮންނާނީ "ޕްރެޝަރު" ކަމަށެވެ.
ކްލަބް މޯލްޑިވްސް ކަޕްގައި އާންމު ގޮތެއްގައި ސިފައިންނާއި އެމްޕީއެލްގެ ކުރިމަތިލުންތައް ނިސްބަތުން ބަލާއިރު ފެންނަނީ މަދުންނެވެ. އެއީ ވެސް މި ފަހަރު ފައިނަލުގައި ސިފައިންނާއި އެމްޕީއެލް ކުޅޭއިރު، މި ދެ ޓީމުން ވެސް ސަމާލުވާން ޖެހޭނެ ކަމެކެވެ.
ކްލަބް މޯލްޑިވްސް ކަޕްގައި ސިފައިންގެ އަންހެން ޓީމަށް ސަޕޯޓްކުރަން ގިނަ އަދަދެއްގެ ބަންގްލަދޭޝް މީހުން އެއްވެ އެވެ. އެއީ އެ ޓީމުގައި ބަންގްލަދޭޝްގެ ގައުމީ އަންހެން ޓީމުގެ ތަރި ސަބީނާ ހަތުން އާއި ބަންގްލަދޭޝަށް ނިސްބަތްވާ އެހެން ކުޅުންތެރިއެއް ކަމަށްވާ މަތުސުޝިމާ ސުމައްޔާ ކުޅޭތީ އެވެ.
ދަނޑު ބޭރުން އެމްޕީއެލް އަށް ވުރެ މިހާތަނަށް ފެންނަ ފެނުމަށް ބަލާއިރު، ސިފައިންގެ ޓީމަށް އޮންނަ ސަޕޯޓް ބޮޑެވެ. އެކަމަކު، އެ ފަދަ ކަންކަމަށް އެމްޕީއެލް ޓީމުން ނުވިސްނާނެ ކަމަށް ސާލިޔާ ވަނީ ބުނެފަ އެވެ.
"އެމްޕީއެލްގެ މެނޭޖްމަންޓުން ބުނެފައި އޮތީ ޓީމުގެ ފަހަތުގައޭ މި ތިބީ. (އެމްޕީއެލް) ޓީމުގެ ސަޕޯޓަރުން ވެސް ފެނޭ ހަމަ، ދެން ހަގީގަތުގައި ޝާ ގަބޫލުކުރަނީ ދަނޑު ބޭރުގައި ހިނގާ ކަންތައްތަކަށް ވިސްނުމުގެ ބަދަލުގައި ފޯކަސް ކުރަން ވީ މެޗަށް، ކޮންޓްރޯލް ކުރެވޭނެ ކަންކަަމަށް ވިސްނައި، މެޗުން މޮޅުވުމުގެ ރޫހުގައި ހުރިހާ ކުޅުންތެރިން ވެސް މި ތިބީ،" ސާލިޔާ ބުންޏެވެ.
"އެމްޕީއެލްގެ ދެ ޓީމު ވެސް މި އޮތީ ފައިނަލުގައި، އަލަށް ކަންނޭނގެ މި ގޮތަށް މި އޮތީ ވެސް، އެހެންވީމަ މިއީ އެމްޕީއެލަަށް ހާއްސަ ފަހަރަކަށް ހެދުމުގެ ފުރުސަތު މި އޮތީ ލިބިފައި،"
އެމްޕީއެލް އަންހެން ޓީމަށް ކާމިޔާބު ހޯދައިދިން ކޯޗު އަންދު، އެނބުރި ޓީމަށް އައި ނަމަވެސް ޓީމަށް އިރުޝާދުދޭން މުހިންމު މެޗުތަކުގައި އޭނާ އަށް ބެންޗުގައި ހުރެވޭގޮތެއްނުވި އެވެ. ސިއްހީ ކަމެއްގައި އާއިލީ ޒިންމާ އަދާކުރުމުގެ ގޮތުން އަންދު މި ވަގުތު ރާއްޖޭން ބޭރުގައި ހުރިއިރު، ވެސް އޭނާ އަންނަނީ އެމްޕީއެލްގެ ދެ ޓީމަށް ވެސް އިރުޝާދު ދިނުމުގައި އެހީތެރިވަމުންނެވެ.
"ޓައިމް އައުޓް ނަގާ ވަގުތުގައި ވެސް ކޯޗުގެ އިރުޝާދުގެ އަޑު އިވޭ. ފޯނުން އަބަދުވެސް ބެންޗުގައި ތިބި އޮފިޝަލުންނަށް ބުނެދީ، ޓީވީން މެޗު ބަަލައި، އެ ހުރިހާ ގޮތަކަށް ވެސް ޓީމު ފަހަތުގައި ކޯޗު އެ ހުރީ. އަސްލު އެއީ ހިތްހަމަޖެހުމެއް. ދެން، އެކަމު، ކޯޗު ބެންޗުގައި ނެތުމަކީ ވެސް ޓީމަށް އުނިކަަމެއްގެ ގޮތުގައި ދެކެނީ،" ސާލިޔާ ބުންޏެވެ.
ކްލަބް މޯލްޑިވްސް ކަޕްގެ އަންހެން ޑިވިޝަން 18/30 ފުޓްސަލް ފިއެސްޓާގެ އެންމެ ކާމިޔާބު ޓީމަކީ ކްލަބް އިމިގްރޭޝަން އެވެ. އެ ޓީމުން ހަތަރު ފަހަރު ތަށި ހޯދާފައިވާއިރު، އެމްޕީއެލް އިން މި ފަހަރު މުބާރާތް ކާމިޔާބު ކޮށްގެން އެ ރެކޯޑާ ހަމަކުރެވޭނެ އެވެ.
ކްލަބް މޯލްޑިވްސް ކަޕްގެ ފިރިހެން ޑިވިޝަންގެ ތަށި އެންމެ ގިނަ ފަހަރު އުފުލާލީ ހަަތަރު ފަހަރު ޗެމްޕިއަންކަން ހޯދި އެސްޓީއޯ އެވެ. މި ފަހަރު ފިރިހެން ޑިވިޝަންގެ ތަށި ހޯދައިގެން އެމްޕީއެލް އަށް އެސްޓީއޯއާ އެއް ސަފަށް ޖެހިލުމުގެ ފުރުސަތު އެބައޮތެވެ.
ރެހެންދި ފުޓްސަލް ދަނޑުގައި މިރޭ ސިފައިންނާއި އެމްޕީއެލް ކުޅޭ 18/30 ފުޓްސަލް ފިއެސްޓާގެ ފައިނަލް މެޗު ފަށާނީ 20:30 ގަ އެވެ.
