ގަވާއިދާ ހިލާފަށް ވެހިކަލް ރަޖިސްޓްރީކޮށްދިނުން ފަދަ ކޮރަޕްޝަންގެ އަމަލުތައް ހިންގަމުންދާ ކަމުގެ ތުހުމަތުތައް ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީއަށް ކޮށްފައިވާތީ، ފިޔަވަޅު އެޅުމާމެދު ގޮތެއް ނިންމާނީ އޭނާއަށް ޖަވާބުދާރީވުމުގެ ފުރުސަތު ދިނުމަށް ފަހު ކަމަށް އެމްއާރުއެމުން ބުނެފި އެވެ.
ކުރީގެ ރައީސް މައުމޫން އަބްދުލް ގައްޔޫމް ލީޑްކުރައްވާ އެމްއާރުއެމްގެ ސްލޮޓެއްގައި އެ މިނިސްޓްރީގެ ނައިބު މަގާމުގައި ހުންނެވި ޝިމާޒަށް ކުރެވޭ އެ ތުހުމަތުތައް ބެލުމަށް އެދި މިނިސްޓަރު އައިޝަތު ނަހުލާ ވަނީ ރައީސް އޮފީހަށް ސިޓީއެއް ވެސް ފޮނުވައިފަ އެވެ.
އެކަމާ ގުޅިގެން އެމްއާރުއެމުން މިއަދު ނެރުނު ބަޔާނެއްގައި ބުނީ، އެ ޕާޓީއަކީ އަބަދުވެސް ކޮރަޕްޝަނާ ދެކޮޅަށް ވަކާލާތު ކުރާ ޕާޓީއަކަށް ވިޔަސް މިނިވަން މުއައްސަސާއަކުން ފުރިހަމައަށް ތަހުގީގު ހިނގުމަށް ފަހު މެނުވީ އެ ކަމުގައި ފިޔަވަޅެއް އެޅުން ރަނގަޅު ނޫން ކަމަށް އެ ޕާޓީން ދެކޭ ކަމަށެވެ.
"ޝިމާޒް އަލީއަކީ މި ޕާޓީގެ ސްލޮޓެއްގައި މަގާމުގައި ހުންނެވި ފަރާތަކަށް ވާތީ، އެމްއާރުއެމްގެ އެތެރޭގެ އުސޫލުތަކާ އެއް ގޮތްވާ ގޮތުގެ މަތީން، މި ތުހުމަތުތަކާ ގުޅޭ ގޮތުން އިތުރު މައުލޫމާތު ސާފުކޮށް، ޝިމާޒަށް ޖަވާބުދާރީވުމުގެ ފުރުސަތެއް ދިނުމަށް ޕާޓީން ގޮތެއް ނިންމާނެ ވާހަކަ ދެންނެވީމެވެ،" ބަޔާނުގައިވެ އެވެ.
ރައީސް އޮފީހަށް ޓްރާންސްޕޯޓް މިނިސްޓަރު ނަހުލާ ފޮނުވި ސިޓީގައި ޝިމާޒް ވަކިކޮށްދޭން އެދިފައިވާ ކަމަށް ބުނެ ބައެއް މީޑިއާތަކުން ރިޕޯޓް ކޮށްފައިވެ އެވެ. އެކަމަކު، ނަހުލާ މިއަދު "އަދަދު"އަށް ވިދާޅުވީ މަގާމުން މީހަކު ވަކިކޮށްދޭކަށް އެ ސިޓީގައި އެދިފައި ނޯންނާނެ ކަމަށެވެ.
"އެފަދަ ތުހުމަތެއް ކުރެވިއްޖެއްޔާ އަޅުގަނޑަށް މަޖުބޫރުވާނެ އެ މައްސަލައެއް ބަލަން. އެ މައްސަލައެއް އަންގަންޖެހޭ ފަރާތްތަކަށް އެންގުމަކީ އަޅުގަނޑު ކުރަންޖެހޭ ކަމެއް. އެކަމަކު އެއްވެސް މީހަކު ވަކިކޮށްދިނުމަށް އަޅުގަނޑު އެދިފައެއް ނޯންނާނެ،" ނަހުލާ ވިދާޅުވި އެވެ.
އެކަމާ ގުޅޭ ގޮތުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ތަރުޖަމާނު މިއުވާން މުހައްމަދު ވިދާޅުވީ މިނިސްޓަރުންނާއި ރައީސް ސޯލިހާ ދެމެދު ކުރައްވާ މުއާމަލާތްތައް ހާމަކުރެވެން ނެތް ކަމަށެވެ. ނަމަވެސް ޝިމާޒަށް އެއްވެސް ފިޔަވަޅެއް ނާޅާކަން އޭނާ ޔަގީން ކޮށްދެއްވަ އެވެ.
