އުތުރު ކޮރެއާ އާއި ދެކުނު ކޮރެއާއިން ކަނޑުގެ ސަރަހައްދަށް މިސައިލްތަކެއް ލޯންޗުކޮށް، އެ ސަރަހައްދުގެ މަޝްރަހު ހޫނުވެއްޖެ އެވެ.
އުތުރު ކޮރެއާއިން ވަނީ އެއް ދުވަސް ތެރޭ 23 މިސައިލް ލޯންޗުކޮށްފަ އެވެ. އެއީ ރެކޯޑު އަދަދެކެވެ. އޭގެ ތެރެއިން އެއް މިސައިލް ވެއްޓުނީ ދެކުނު ކޮރެއާގެ ސޮކްޗޯ ސިޓީއާ 60 ކިލޯމީޓަރު ކައިރިއަށެވެ.
ރައްދުގައި ދެކުނު ކޮރެއާއިން ނެރުނު ހަނގުރާމަ މެތީ ޖެޓުތަކުން ވަނީ ދެ ގައުމުގެ މެދުގައި ހިޔާލު ތަފާތުވުން އުފެދިފައިވާ ކަނޑުގެ ސަރަހައްދަށް ތިން މިސައިލް ފޮނުވައިފަ އެވެ.
އޭގެ ފަހުން އަނެއްކާވެސް އުތުރު ކޮރެއާއިން ހަ މިސައިލް ލޯންޗުކޮށް، 100 އާޓިލަރީ ޝެލް ފޮނުވި އެވެ. އެ ގައުމުން ބުނީ އެއީ އެމެރިކާއާ ގުޅިގެން ދެކުނު ކޮރެއާއިން ތަމްރީން ހިންގާތީ ދިން އިންޒާރު ކަމަށެވެ.
ބުދަ ދުވަހުގެ މިސައިލްތަކާ ހެދި ދެކުނު ކޮރެއާގެ އުލުންގް ރަށުގައި ސައިރަން ޖައްސައި، އާއްމުން އެލާޓަށް ގެނަ އެވެ. ހުރިހާ އެންމެން އިވެކުއޭޓް ކުރީ ބިމުއަޑީގެ ބަންކަރުތަކަށެވެ.
އެއް ބެލިސްޓިކް މިސައިލް ވަނީ ނޮދަން ލިމިޓް ލައިން (އެންއެލްއެލް) ހުރަސްކޮށްފަ އެވެ. އެއީ ދެ ކޮރެއާގެ މެދުގައި ހިޔާލު ތަފާތުވުން އޮތް ކަނޑުގެ ބޯޑަރެކެވެ.
އެ މިސައިލް ވެއްޓުނީ ދެކުނު ކޮރެއާގެ ކަނޑުގެ ސަރަހައްދުން ކުޑަތަންކޮޅެއް ބޭރަށެވެ. އެއީ މިހާތަނަށް އުތުރު ކޮރެއާގެ މިސައިލެއް ދެކުނު ކޮރެއާއާ އެންމެ ކައިރިވި ފަހަރެވެ.
