ޓްވިޓާގެ ޑިރެކްޓަރުންގެ ބޯޑު އުވާލައިފި

މިދިޔަ ހުކުރު ދުވަހު 44 ބިލިއަން ޑޮލަރަށް ޓްވިޓާ ގަތް މަހުޖަނު އެލޮން މަސްކް، އެ ކުންފުނީގެ ޑިރެކްޓަރުންގެ ބޯޑު އުވާލައިފި އެވެ.

ޓްވިޓާގެ އާ ސީއީއޯގެ މަގާމު ފުރަމުންދާ މަސްކް ވަނީ، ކުންފުނީގެ އިސްވެރިން ވަޒީފާއިން ވަކިކޮށް ބަދަލުތައް ގެންނަން ފަށައިފަ އެވެ.

އެގޮތުން ކުންފުނީގެ އިތުރު ބައެއް މުވައްޒަފުން ކަނޑާލަން ވިސްނަމުންދާ އިރު، އެކައުންޓުތައް ވެރިފައި ކުރާ ގޮތަށް ބަަދަލު ގެންނަން ވެސް ދަނީ ވިސްނަމުންނެވެ.

ވޮޝިންޓަން ޕޯސްޓުން ބުނީ މުވައްޒަފުން ކެނޑުމުގެ ފުރަތަމަ ބުރުގައި 25 ޕަސެންޓު މުވައްޒަފުންނަށް އަސަރު ކުރާނެ ކަމަށެވެ.

ޓްވިޓާގެ އިތުރުން މަސްކައަކީ ކަރަންޓު ކާރު އުފައްދާ ޓެސްލާ އަދި ރޮކެޓު އުފައްދާ ސްޕޭސްއެކްސް ކުންފުނީގެ ވެސް ސީއީއޯ އެވެ. އެހެން ނަމަވެސް، ޓްވިޓާގެ ސީއީއޯއަކަށް ހުންނާނީ ވަގުތީ ގޮތުން ކަމަށް ބެލެވެ އެވެ.