ދެކުނު ކޮރެއާގެ ވެރިރަށް ސޯލްގެ މަގްބޫލް ނައިޓްލައިފް ސަރަހައްދެއްގައި ހެލޮވީން ފާހަގަކުރަން ގިނަ ބަޔަކު ޖަމާވުމުން ފިތިބާރުވެގެން 156 މީހުން މަރުވި މަައްސަލައިގައި ފުލުހުންގެ އިހުމާލު އޮތް ކަމަށް އެއްބަސްވެއްޖެ އެވެ.
ދެކުނު ކޮރެއާގެ ފުލުހުންގެ ވެރިޔާ ޔޫން ހީ ކުން ވިދާޅުވީ ގިނަ އަދަދެއްގެ މީހުން ޖަމާވި އިތައެވޮން ޑިސްޓްރިކްޓުގައި "ކްރައުޑް ކޮންޓްރޯލް" ކުރުމުގައި ފުލުހުން އެކަށީގެންވާ މަސަައްކަތް ނުކުރާ ކަމަށެވެ. އެ ސަރަހައްދަށް އެ ރޭ 100،000 މީހުން ޖަމާވި އެވެ.
ޔޫން ވިދާޅުވީ ފުރިހަމަ ތަހުގީގެއް ކުރައްވާނެ ކަމަށެވެ. އިންޓީރިއާ މިނިސްޓަރު ލީ ސަންގް މިން ވެސް މައާފަށް އެދިވަޑައިގެންނެވި އެވެ. އެ ހާދިސާގައި 156 މީހުން މަރުވެ، އިތުރު 152 މީހުންނަށް އަަނިޔާވި އެވެ.
ރިޕޯޓުތައް ބުނާ ގޮތުން ކޮވިޑް ބަލިމަޑުކަމަށް ފަހު ފުރަތަމަ ފަހަރަށް މާސްކު ނުލައި ހެލޮވީން އިވެންޓެއް ބާއްވަން ފުރުސަތު ލިބުމުން، ގިނަ ބަޔަކު އިތައެވޮން ޑިސްޓްރިކްޓަށް ޖަމާވި އެވެ.
މަންޒަރު ދުށް ފަރާތްތަކުން ބުނީ ފިތިބާރުވެގެން ގިނަ ބަޔަކު ހާސްވާން ފެށީ ހިމަ ގޯޅިއެއްގެ ތެރެއަށް މީހުންތައް ވަންނަން ފެށުމުން ކަމަށެވެ.
ޔޫން ވިދާޅުވީ ހާދިސާ ހިނގުމުގެ ކުރިން ފުލުހުންނަށް ރިޕޯޓުތަކެއް ލިބުނު ކަމަށާއި، އެގޮތުން އިތައެވޮން ޑިސްޓްރިކްޓުގައި މީހުން ގިނަކަމުން ގިނަ ބަޔަކު ކަންބޮޑުވުން ފާޅުކުރި ކަމަށެވެ. އެކަމަކު އެކަށީގެންވާ ގޮތަށް ފުލުހުން ފިޔަވަޅު ނޭޅި ކަމަށް ވިދާޅުވި އެވެ.
ސޯލްގެ ފުލުހުން ބީބީސީއަށް ބުނީ އެންމެ ފުރަތަމަ ފުލުހުންނަަށް ރިޕޯޓެއް ލިބުނީ އިރުއޮއްސި 06:34 ގައި ކަމަށެވެ. އެއީ ހާދިސާ ހިނގުމުގެ ހަތަރު ގަޑިއިރު ކުރި އެވެ. އޭގެ ފަހުން ވެސް ހާދިސާ ހިނގުމާ ދޭތެރޭ 10 ފަހަރަކު ފުލުހުންނަށް އެ ތަނާ ގުޅޭ ރިޕޯޓުތައް ލިބުނެވެ.
ރައީސް ޔޫން ސުކް ޔޯލް ވަނީ ގައުމީ ހިތާމަ ފާޅުކުރުމުގެ ދުވަސްތަކެއް އިއުލާން ކުރައްވައި، ހާދިސާ ހިނގި އިތައެވޮން ސަރަހައްދު ޑިޒާޒްޓާ ޒޯނެއްގެ ގޮތުގައި ކަނޑައަޅުއްވައިފަ އެވެ.
މިއީ 2014 ވަނަ އަހަރު ފެރީއެއް އަޑިއަށް ގޮސް 304 މީހުން މަރުވި ފަހުން ދެކުނު ކޮރެއާގައި ހިނގި އެންމެ ބޮޑު ހާދިސާ އެވެ.
