އިންޑިއާގެ ހުޅަނގު ގުޖަރާތު ސްޓޭޓުގައި ބްރިޖެއް ވެއްޓި 141 މީހުން މަރުވި ހާދިސާއާ ގުޅިގެން ނުވަ މީހުން ހޯމަ ދުވަހު ހައްޔަރުކޮށްފި އެވެ.
ފުލުހުން ނެރުނު ބަޔާނުގައި ބުނީ އެ ނުވަ މީހުންނަކީ ވެސް މޮރްބީ އަވަށުގެ ބްރިޖު މަރާމާތު ކުރުމުގެ މަސައްކަތް ކުރި ކުންފުންޏާ ގުޅުން ހުރި މީހުން ކަމަށެވެ.
އެ ހާދިސާ ހިނގީ ގުޖަރާތުގެ މައި ސިޓީ، އަހްމަދުއާބާދާ 200 ކިލޯމީޓަރު ހުޅަނގުން މޮރްބީ އަވަށުގައި އާދީއްތަ ދުވަހު އެވެ. ވެއްޓުނީ 1877 ވަނަ އަހަރު ހެދި ސަސްޕެންޝަން ބްރިޖެކެވެ.
އިދާރާތަކުން ބުނީ ސަސްޕެންޝަން ބްރިޖް ހަރުކޮށްފައި ހުރި ކޭބަލްތައް ބުރިވެ މައްޗު ކޯރުގެ ތެރެއަށް ވެއްޓުނު އިރު، ބްރިޖު މަތީގައި 500 އެއްހާ މީހުން ތިބި ކަމަށެވެ.
އިނގިރޭސިން އިންޑިއާގައި އުޅުނު ޒަމާނުގެ އެ ބްރިޖް މަރާމާތު ކުރުމަށް ހަތް މަސް ހޭދަ ކުރުމަށް ފަހު، އަލުން އާއްމުންނަށް ހުޅުވާލީ މިދިޔަ ބުދަ ދުވަހު އެވެ.
ބްރިޖު ވެއްޓުނު ވަގުތުގެ ސީސީޓީވީ ވީޑިއޯ އާއްމުވެފައިވާ އިރު، ގިނަަ ބަޔަކު ބްރިޖަށް އަރައި، ބަޔެއް މީހުން ބްރިޖް ދެ ފަޅިއަށް ތަޅުވާ މަންޒަރު ވީޑިއޯއިން ފެނެ އެވެ.
ހާދިސާ ހިނގި އިރު ގުޖަރާތުގައި ހުންނެވި ބޮޑު ވަޒީރު ނަރެންދްރަ މޯދީ ވިދާޅުވީ މަރުވި މީހުންނާއި އަނިޔާވި މީހުންގެ އާއިލާތަކަށް ފައިސާގެ ބަދަލު ދޭނެ ކަމަށެވެ.
ގިނަ ޒަމާންވީ އަދި ރަނގަޅަށް ނުބަލަހައްޓާ ބްރިޖު ފަދަ ބޮޑެތި އިންފްރާސްޓްރަކްޗާ ހިމެނޭ ނުރައްކާތެރި ހާދިސާތައް ހިނގުން އިންޑިއާގައި ވަރަށް އާއްމެވެ.
