ފިލިޕީންސަށް އެރި ބާރުގަދަ ތޫފާނެއްގައި މަރުވި މީހުންގެ އަދަދު 101 އަށް އަރާފައިވާ އިރު، ގެއްލިފައިވާ މީހުން ހޯދުމުގެ މަސައްކަތް ކުރަމުން އެބަދެ އެވެ.
ހުކުރު ދުވަހު ތޫފާން ނަލްގޭގެ އަސަރު އެންމެ ބޮޑަށް ކުރި ދެކުނު މިންޑަނާއޯ ރަށުގައި ކުއްލިއަކަށް ފެންބޮޑުވެ، ބިންގަނޑު ކަނޑައިގެން ގޮސް ގިނަ އަވަށްތަކުން މީހުން މަރުވި އެވެ.
ފިލިޕީންސަށް ކޮންމެ އަހަރަކު ވެސް ވިއްސަކަަށް ތޫފާން އަރަ އެވެ. އެކަމަކު އެ ތޫފާންތައް އާއްމުކޮށް މިންޑަނާއޯއާ ހަމައަށް ނުފޯރަ އެވެ. އެހެން ނަމަވެސް، ތޫފާނެއް އެ ހިސާބަށް ފޯރައިފި ނަމަ، އާއްމުކޮށް ލިބޭ ގެއްލުން ބޮޑެވެ.
ތޫފާން ނަލްގޭގެ އަސަރު އެންމެ ބޮޑަށް ކުރި އަވަށްތަކުން ގެއްލުނު މީހުން ދިރިހުއްޓައި ސަލާމަތް ކުރެވޭނެ ކަމުގެ އުއްމީދު ކުޑަ އެވެ. އެ ތޫފާނުގައި ވެރިރަށް މެނީލާގައި ވެސް ފެންބޮޑުވި އެވެ.
ނޭޝަނަލް ޑިޒާޒްޓާ އެޖެންސީން ބުނީ 66 މީހުން ގެއްލިފައިވާ ކަމަށެވެ. ރައީސް ފާޑިނަންޑް މާކޯސް ވަނީ އަސަރު ކުރި ސަރަހައްދުތަކަށް ޒިޔާރަތް ކުރައްވައިފަ އެވެ.
ސައިންސްވެރިން ބުނާ ގޮތުގައި ތޫފާނުތައް ގިނަވެ، ބާރުގަދަވަމުން ދަނީ މޫސުމީ ބަދަލުގެ ސަބަބުންނެވެ. ފިލިޕީންސަކީ ތޫފާންތަކުގެ ނުރައްކާ އެންމެ ބޮޑު އެއް ގައުމެވެ.
މޫސުމާ ބެހޭ އިދާރާއިން ލަފާކުރާ ގޮތުގައި މި ވަގުތު ވެސް އިތުރު ތޫފާނެއްގެ މިސްރާބު ހުރީ ފިލިޕީންސްއާ ދިމާލަށެވެ. ބުދަ ދުވަހުން ފެށިގެން އަނެއްކާވެސް ދެކުނާއި މެދުތެރޭ ހިސާބުތަކަށް މޫސުން ގޯސްވާނެ އެވެ.
