އަބޫ ދާބީ، ޔޫއޭއީ (އޮކްޓޯބަރު 31) - މޫސުމީ ބަދަލާ ގުޅޭ ކޮޕް27 ސަމިޓު ފަށަން ވަގުތު ކުޑަތަންވެފައި ވަނިކޮށް، ތެލުގެ އުފެއްދުންތެރިކަން އިތުރު ކުރަން އިންވެސްޓް ކުރުން މުހިއްމު ކަމަށް ސައުދީ އަރަބިއްޔާ އާއި ޔޫއޭއީއިން ބުނެފި އެވެ.
ޔޫއޭއީގެ ތެޔޮ އުފައްދާ ކުންފުނި އެޑްނޮކްގެ ވެރިޔާ ސުލްތާން އަލް ޖާބިރު ވިދާޅުވީ ތެލަށް އިންވެސްޓް ކުރުން މަޑުޖެހިއްޖެ ނަމަ ދުނިޔޭގެ އިގްތިސާދަށް ބޮޑެތި ލޮޅުންތައް އަންނާނެ ކަމަށެވެ.
ސައުދީ އަރަބިއްޔާގެ ހަކަތައާ ބެހޭ މިނިސްޓރު އަމީރު އަބްދުލް އަޒީޒް ބިން ސަލްމާން ވިދާޅުވީ ގަލްފު ގައުމުތަކުން ތެޔޮ އުފެއްދުމުގެ ކެޕޭސިޓީ މަތިކުރަމުންދާ ކަމަށެވެ.
ސައުދީ އަރަބިއްޔާ އާއި ޔޫއޭއީއިން އެގޮތަަށް ބުނީ އަބޫ ދާބީގައި ކުރިއަަށް ދިޔަ އެޑިޕެކް ތެލުގެ ކޮންފެރެންސްގެ ތެރެއިންނެވެ. މޫސުމާ ބެހޭ ކޮޕް27 ސަމިޓު ފަށާނީ ނޮވެމްބަރު ހަ ވަނަ ދުވަހު މިސްރުގަ އެވެ.
އެޑިޕެކް ނުވަތަ އަބޫ ދާބީ އިންޓަނޭޝަނަލް ޕެޓްރޯލިއަމް އެގްޒިބިޝަން ކޮންފެރެންސްގައި 195 ގައުމުން ބައިވެރިވެ އެވެ.
"އަޅުގަނޑުމެންނާއި ޔޫއޭއީއިން މި ދަނީ ތެޔޮ އުފެއްދުމުގެ ކެޕޭސިޓީ މަތިކުރަމުން. އަޅުގަނޑުމެންނާއި ޔޫއޭއީ ވާނީ ތެޔޮ އުފެއްދުމުގައި ނަމޫނާ ދެ ގައުމަށް. އެކަން ހާސިލް ކުރާނީ މޫސުމީ ބަދަލާ ގުޅޭ ގޮތުން ކަނޑައެޅި ލަނޑުދަނޑިތައް ވެސް ހާސިލްކުރަމުން،" އަމީރު އަބްދުލް އަޒީޒް ވިދާޅުވި އެވެ.
ޔޫއޭއީގެ މޫސުމީ ބަދަަލާ ގުޅޭ މަންދޫބުކަން ވެސް ކުރައްވާ ތެޔޮ ކުންފުނީގެ ވެރިޔާ އަލް ޖާބިރު ވިދާޅުވީ 2050 ވަނަ އަހަރާ ހަމައަށް ދާއިރު ދުނިޔޭގެ އާބާދީއަށް އިތުރު 30 ޕަސެންޓު ހަކަތަ ބޭނުން ވާނެ ކަމަށެވެ.
"ލިބެން އޮތް ހުރިހާ ހައްލެއް އެބަ ބޭނުންވޭ. އެއީ ހަމައެކަނި ތެލާއި ގޭހާއި އަވިން ހަކަތަ އުފެއްދުމާއި، ވަޔާއި، ނިޔުކްލިއާ އާއި ހައިޑްރޮޖެންއެއް ނޫން. އެއީ ހުރިހާ ބާވަތެއް ހިމެނޭ ހައްލެއް،" އޭނާ ވިދާޅުވި އެވެ.
އަމީރު އަބްދުލް އަޒީޒް އާއި އަލް ޖާބިރު ވެސް ވިދާޅުވީ ތެޔޮ ދެމިއޮންނާނީ ހަކަތައިގެ މައި ތަނބުގެ ގޮތުގައި ކަމަށް ވިޔަސް، ޖައްވަށް ވިހަ ގޭސް ބޭރު ކުރުން މަދު ކުރެވޭނެ ގޮތްތައް ހޯދަން ޖެހޭނެ ކަމަށެވެ.
