ދެކުނު ކޮރެއާގެ ވެރިރަށް ސޯލްގެ މަގްބޫލް ނައިޓްލައިފް ސަރަހައްދެއްގައި ހެލޮވީން ފާހަގަކުރަން ގިނަ ބަޔަކު ޖަމާވުމުން ފިތިބާރުވެގެން 154 މީހުން މަރުވި މަައްސަލައިގެ ތަހުގީގު ފަށައިފި އެވެ.
ފާއިތުވި ހަފުތާ ބަންދުގައި ހިނގި އެ ހާދިސާގެ ފުރިހަމަ ތަހުގީގެއް ހިންގަވާނެ ކަމަށް ބޮޑު ވަޒީރު ހަން ދަކް ސޫ ވައުދުވެވަޑައިގެންނެވި އެވެ.
އޮފިޝަލުން ބުނީ މަރުވި މީހުންގެ އަދަދު 154 އަށް އަރާފައިވާ އިރު، އަނިޔާވި މީހުންގެ އަދަދު އުޅެނީ 149 ގައި ކަމަށެވެ. އޭގެ ތެރެއިން 33 މީހުންގެ ހާލު ސީރިއަސް އެވެ.
ރިޕޯޓުތައް ބުނާ ގޮތުން ކޮވިޑް ބަލިމަޑުކަމަށް ފަހު ފުރަތަމަ ފަހަރަށް މާސްކު ނުލައި ހެލޮވީން އިވެންޓެއް ބާއްވަން ފުރުސަތު ލިބުމުން، 100،000 އަށް ވުރެ ގިނަ މީހުން އިތައެވޮން ޑިސްޓްރިކްޓަށް ޖަމާވި އެވެ.
މަންޒަރު ދުށް ފަރާތްތަކުން ބުނީ ފިތިބާރުވެގެން ގިނަ ބަޔަކު ހާސްވާން ފެށީ ހިމަ ގޯޅިއެއްގެ ތެރެއަށް މީހުންތައް ވަންނަން ފެށުމުން ކަމަށެވެ.
ދެކުނު ކޮރެއާގެ ސްކޫލްތަކާއި، ކުންފުނިތަކުން ހެލޮވީން ފާހަގަކުރަން ރޭވި އިވެންޓުތައް ކެންސަލްކޮށްފައިވާ އިރު، ކޭޕޮޕް ކޮންސެޓުތަކާއި ސަރުކާރުގެ ބައްދަލުވުންތައް ވެސް ވަނީ ކެންސަލްކޮށްފަ އެވެ.
ރައީސް ޔޫން ސުކް ޔޯލް ވަނީ ގައުމީ ހިތާމަ ފާޅުކުރުމުގެ ދުވަސްތަކެއް އިއުލާން ކުރައްވައި، ހާދިސާ ހިނގި އިތައެވޮން ސަރަހައްދު ޑިޒާޒްޓާ ޒޯނެއްގެ ގޮތުގައި ކަނޑައަޅުއްވައިފަ އެވެ.
މިއީ 2014 ވަނަ އަހަރު ފެރީއެއް އަޑިއަށް ގޮސް 304 މީހުން މަރުވި ފަހުން ދެކުނު ކޮރެއާގައި ހިނގި އެންމެ ބޮޑު ހާދިސާ އެވެ.
