އިންޑިއާގެ ގުޖަރާތު ސްޓޭޓުގައި ބްރިޖެއް ވެއްޓި މަރުވި މީހުންގެ އަދަދު 141 އަށް އަރާފައިވާ އިރު، މީހުން ސަލާމަތް ކުރުމަށް ހާއްސަ އޮޕަރޭޝަން އަދިވެސް އެބަ ކުރިއަށްދެ އެވެ.
އެ ހާދިސާ ހިނގީ ގުޖަރާތުގެ މައި ސިޓީ، އަހްމަދުއާބާދާ 200 ކިލޯމީޓަރު ހުޅަނގުން މޮރްބީ އަވަށުގައި އާދީއްތަ ދުވަހު އެވެ. ވެއްޓުނީ 100 އަހަރުވީ ސަސްޕެންޝަން ބްރިޖެކެވެ.
އިދާރާތަކުން ބުނީ ސަސްޕެންޝަން ބްރިޖް ހަރުކޮށްފައި ހުރި ކޭބަލްތައް ބުރިވެ މައްޗު ކޯރުގެ ތެރެއަށް ވެއްޓުނު އިރު، ބްރިޖު މަތީގައި 500 އެއްހާ މީހުން ތިބި ކަމަށެވެ.
މީހުން ސަލާމަތް ކުރުމުގެ އޮޕަރޭޝަނުގައި ޑިޒާޒްޓާ މެނޭޖްމަންޓުގެ ގިނަ އޮފިޝަަލުން ބައިވެރިވާ އިރު، ސިފައިން ވެސް ދަނީ އެހީތެރިކަން ފޯރުކޮށްދެމުންނެވެ.
ކޯރުގެ ތެރެއަށް ވެއްޓުނު ބްރިޖުގެ ބައިތައް ނެގުމަށް ކެރޭނު ބޭނުންކޮށްގެން މަސައްކަތް ކުރަމުންދާ އިރު، ކޯރުގެ ތެރެއިން އެއްވެސް މީހަކު ފެނޭތޯ ބޯޓުތަކުގައި ވޮލަންޓިއަރުން ދަނީ ހަރަކާތްތެރިވަމުންނެވެ.
މިހާތަނަށް 141 މީހުންގެ ހަށިގަނޑު ފެނިފައިވެ އެވެ. އޭގެ ތެރެއިން 133 މީހުންގެ ހަށިގަނޑު ވަނީ އާއިލާތަކާ ހަވާލުކޮށްފަ އެވެ. ހޯމަ ދުވަހު އެ މީހުންގެ ޖަނާޒާ އޮންނާނެ ކަމަށް ބެލެވެ އެވެ.
އިނގިރޭސިން އިންޑިއާގައި އުޅުނު ޒަމާނުގެ އެ ބްރިޖް މަރާމާތު ކުރުމަށް ހަތް މަސް ހޭދަ ކުރުމަށް ފަހު، އަލުން އާއްމުންނަށް ހުޅުވާލީ މިދިޔަ ބުދަ ދުވަހު އެވެ.
ހާދިސާ ހިނގި އިރު ގުޖަރާތުގައި ހުންނެވި ބޮޑު ވަޒީރު ނަރެންދްރަ މޯދީ ވިދާޅުވީ މަރުވި މީހުންނާއި އަނިޔާވި މީހުންގެ އާއިލާތަކަށް ފައިސާގެ ބަދަލު ދޭނެ ކަމަށެވެ.
ގިނަ ޒަމާންވީ އަދި ރަނގަޅަށް ނުބަލަހައްޓާ ބްރިޖު ފަދަ ބޮޑެތި އިންފްރާސްޓްރަކްޗާ ހިމެނޭ ނުރައްކާތެރި ހާދިސާތައް ހިނގުން އިންޑިއާގައި ވަރަށް އާއްމެވެ.
