ކްރިމިނަލް ކޯޓުގެ ގާޒީ މުހައްމަދު ސަމީރާމެދު ސުލޫކީ ފިޔަވަޅު އެޅުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.
ގާޒީ ސަމީރުގެ މައްޗަށް ހުށަހެޅުނު ޝަކުވާއަކީ ކްރިމިނަލް ކޯޓުގައި ކުރިއަށްދިޔަ މައްސަލައެއްގައި ދައުވާ ލިބޭ ފަރާތުގެ ވަކީލުން ކުށްވެރިކޮށް، އެ ވަކީލުންނާމެދު ޒާތީ ތައައްޞުބެއް އޮތްކަން ހާމަވާފަދަ ގޮތަކަށް ވާހަކަދައްކާ އަމަލުކުރި ކަމުގެ ޝަކުވާއެކެވެ.
މައްސަލަ ބެލުމަށްފަހު ޖޭއެސްސީއިން ބުނެފައިވަނީ މި މައްސަލަ ގާޒީ ސަމީރުގެ މައްޗަށް ސާބިތުވާ ކަމަށާއި މިއީ ފަނޑިޔާރުންގެ ގާނޫނާ ހިލާފު ކަމެއް ކަމަށެވެ. އަދި އަދަބެއްގެ ގޮތުން އެ ކޮމިޝަނުން ކަނޑައަޅާ ތަމްރީނު ޕްރޮގްރާމެއް ފުރިހަމަކުރުމަށް ގާޒީ ސަމީރަށް އެންގޭނެ ކަމަށެވެ.
ޖޭއެސްސީއިން މިގޮތަށް ނިންމާފައިވަނީ 2022 އޮކްޓޫބަރު 19 ވަނަ ދުވަހު ބޭއްވި އެ ކޮމިޝަނުގެ މިއަހަރުގެ 73 ވަނަ ޖަލްސާގަ އެވެ.
މީގެ ކުރިން ކްރިމިނަލް ކޯޓާއި ފެމެލީ ކޯޓުގެ ގާޒީކަންވެސް ކުރެއްވި ގާޒީ ސަމީރު ޑްރަގް ކޯޓުގެ ގާޒީ ކަމަށް ބަދަލުވެފައިވަނީ އަމިއްލަ އެދުމުގެ މަތިން މިދިޔަ އަހަރުގެ ޖޫން މަހު އެވެ.
