މެންޗެސްޓާ (އޮކްޓޫބަރު 31) - އިނގިރޭސި ޕްރިމިއާ ލީގުގައި މިރޭ ނޮޓިންހަމް ފޮރެސްޓް އަތުން 5-0 އިން މޮޅުވެ، އާސެނަލް އަލުން ލީގުގެ އެއް ވަނަ އަށް ޖެހިލިއިރު، މާކަސް ރެޝްފޯޑް، މެންޗެސްޓާ ޔުނައިޓެޑަށް ޖަހައިދިން 100 ވަނަ ގޯލާ އެކު އެ ޓީމު، 1-0 އިން ވެސްޓް ހޭމް ޔުނައިޓެޑް އަތުން މޮޅުވެއްޖެ އެވެ.
ލީގުގައި ހޮނިހިރު ދުވަހުގެރޭ ލެސްޓާ ސިޓީ އަތުން މޮޅުވެ، އެންމެ ފަހުގެ ޗެމްޕިއަން މެންޗެސްޓާ ސިޓީ ވަނީ އެއް ވަނަ އަށް އަރައިފަ އެވެ. އެކަމަކު، އާސެނަލުން މިރޭގެ ތިން ޕޮއިންޓާ އެކު އަލުން އެއް ވަނަ އަށް ޖެހިލީ 12 މެޗުން 31 ޕޮއިންޓް ހޯދައިގެންނެވެ. ދެ ވަނައިގައި އޮތް ސިޓީ އަށް 12 މެޗުން ލިބިފައިވަނީ 29 ޕޮއިންޓެވެ.
ޔޫރޮޕާ ލީގުގައި ބުރާސްފަތި ދުވަހުގެރޭ ޕީއެސްވީ އަތުން ބަލިވެ، އާސެނަލުން ބަލިނުވެ ދަމަހައްޓަމުން އައި ރެކޯޑަކަށް ނިމުން އައުމުގެ މާޔޫސްކަމުން އަރައިގަންނަން މިރޭ ނޮޓިންހަމް ފޮރެސްޓް އަތުން ހޯދީ ބޮޑު މޮޅެކެވެ. މެޗުގެ ފަސް ވަނަ މިނިޓްގައި އާސެނަލަށް ލީޑުނަގައިދިނީ ބުކާޔޯ ސަކާ ނެގި ހުރަހަކުން ގަބްރިއެލް މާޓިނޭލީ ބޮލުން ޖެހި ގޯލުންނެވެ.
އާސެނަލުން އަނެއް ހަތަރު ގޯލު ވެސް ޖެހީ ދެ ވަނަ ހާފުގަ އެވެ. މި ގޯލުތަކުގައި ސަކާ އަށް އަނިޔާވެގެން އާސެނަލުން ކުޅެން އެރުވި ރީސް ނީލްސަންގެ ދައުރު ބޮޑެވެ. ނީލްސަން ވަނީ ދެ ގޯލު ޖެހުމުގެ އިތުރުން ތޯމަސް ޕާޓޭ ޖެހި ގޯލަށް ފުރުސަތު ވެސް ތަނަވަސްކޮށްދީފަ އެވެ. ނީލްސަން އާސެނަލް މެޗެއްގައި ގޯލު މި ޖެހީ 2020 ވަނަ އަހަރުގެ ނޮވެމްބަރު މަހުގެ ފަހުން ފުރަތަމަ ފަހަރަށެވެ.
ގަބްރިއެލް ޖީސޫސް ދިން ބޯޅައަކުން މެޗުގެ 78 ވަނަ މިނިޓްގައި އާސެނަލްގެ ފަސް ވަނަ ގޯލު ޖެހީ ކެޕްޓަން މާޓިން އޮޑެގާޑް އެވެ. އޭރިއާތެރެއިން އޮޑެގާޑް ވަނީ ގޯލުގެ މަތީ ކަނަށް ބޯޅަ ފޮނުވާލައިފަ އެވެ.
ޔުނައިޓެޑްގެ ލަނޑު ޖަހައިދިނުމަށް ފަހު ރެޝްފޯޑް އުފާފާޅުކުރަނީ.
އަމިއްލަ ދަނޑުގައި ވެސްޓް ހޭމް އަތުން ޔުނައިޓެޑް މޮޅުކޮށްދިން ލަނޑު، ރެޝްފޯޑް ޖެހީ މެޗުގެ 38 ވަނަ މިނިޓްގަ އެވެ. މިއީ އޭރިއާބޭރުން ކްރިސްޓިއަން އެރިކްސަން ނެގި ހުރަހަކުން ރެޝްފޯޑް ބޮލުން ގޯލުގެ މަތީ ދާގަނޑަށް އަމާޒުކޮށްލި ބޯޅައެކެވެ.
މި ގޯލާ އެކު، ރެޝްފޯޑް، ޔުނައިޓެޑަށް 100 ގޯލު ހަމަކޮށްދިނީ 318 މެޗު ކުޅެދީގެންނެވެ. ރެޝްފޯޑަކީ ޔުނައިޓެޑްގެ ކާމިޔާބު ތާރީހުގައި އެ ޓީމަށް 100 ގޯލު ޖަހައިދިން 22 ވަނަ ކުޅުންތެރިޔާ އެެވެ. ރެޝްފޯޑްގެ ކުރިން ޔުނައިޓެޑަށް އެންމެ ފަހުން 100 ގޯލު ހަމަކޮށްދިނީ 2009 ވަނަ އަހަރު ވޭން ރޫނީ އެވެ.
ވެސްޓް ހޭމަށް ގޯލެއް ޖަހައިދޭން މި މެޗުގައި އެ ޓީމުން ރަނގަޅު ހަަމަލާތަކެއް ފޮނުވާލި އެވެ. އެ ގޮތުން މިކޭލް އެންޓޯނިއޯ އާއި ކާޓް ޒޫމާ އަދި ޑެކްލަން ރައިސް ފޮނުވާލި ބޯޅަތައް ޔުނައިޓެޑްގެ ގޯލުގައި ހުރި ސްޕެއިންގެ ކީޕަރު ޑޭވިޑް ޑެހެއާ ވަނީ މަތަކޮށްފަ އެވެ.
މި މެޗުން މޮޅުވެ، ޔުނައިޓެޑް ވަނީ ބަލިނުވެ، ޖެހިޖެހިގެން އަށް މެޗު ފުރިހަމަކޮށްފަ އެެވެ. ޔުނައިޓެޑް، ލީގުގައި އޮތީ 12 މެޗުން 23 ޕޮއިންޓާ އެކު ފަސް ވަނައިގަ އެވެ.
