އަހްމަދުއާބާދު، އިންޑިއާ (އޮކްޓޯބަރު 30) - އިންޑިއާގައި 100 އަހަރުވީ ސަސްޕެންޝަން ބްރިޖެއް ވެއްޓި 30 މީހުން މަރުވެއްޖެ އެވެ.
ރިޕޯޓުތައް ބުނާ ގޮތުން މަރުވި މީހުންގެ އަދަދު 50 ނުވަތަ 60 އަށް އިތުރުވުން އެކަށީގެންވެ އެވެ. އޭގެ އިތުރުން 100 މީހުންނަށް އަނިޔާވި އެވެ.
"މިހާތަނަށް 30 ހަށިގަނޑު ފެނިއްޖެ. ރެސްކިއު އޮޕަރޭޝަން އަދިވެސް ދަނީ ކުރިއަށް،" ގުޖަރާތު ސްޓޭޓް ސަރުކާރުގެ މިނިސްޓަރު ބްރިޖޭޝް މެރްޖާ ވިދާޅުވި އެވެ.
އިދާރާތަކުން ބުނީ ސަސްޕެންޝަން ބްރިޖް ހަރުކޮށްފައި ހުރި ކޭބަލްތައް ބުރިވެ ކޯރުގެ ތެރެއަށް ވެއްޓުނު އިރު، ބްރިޖު މަތީގައި 500 އެއްހާ މީހުން ތިބި ކަމަށެވެ.
އެ ހާދިސާ ހިނގީ ގުޖަރާތުގެ މައި ސިޓީ، އަހްމަދުއާބާދާ 200 ކިލޯމީޓަރު ހުޅަނގުން މޮރްބީ އަވަށުގަ އެވެ.
އިންޑިއާގެ ނޫސްތަކުން ބުނީ މައްޗު ކޯރުގެ ތެރެއަށް ބްރިޖް ވެއްޓުނު އިރު، މީހުން ޖަމާވެފައި އޮތީ ދީނީ ފެސްޓިވަަލެއްގެ ތެރެއިން އަޅުކަންތަކެއް ކުރުމަށް ކަމަށެވެ.
މޮރްބީގެ ސިއްހީ އޮފިޝަލުންނާ ހަވާލަދީ ޕްރެސް ޓްރަސްޓް އޮފް އިންޑިއާ ނޫހުން ބުނީ މަރުވި މީހުންގެ އަދަދު މަދުވެގެން 32 އަަށް އަރާނެ ކަމަށެވެ.
ރިޕޯޓުތައް ބުނާ ގޮތުން ކޯރު ތެރެއަށް ގެއްލުނު ކަމަށް ބެލެވޭ ސަތޭކައެއްހާ މީހުން ހޯދުމުގެ މަސައްކަތް ދަނީ ކުރަމުންނެވެ.
އިނގިރޭސިން އިންޑިއާގައި އުޅުނު ޒަމާނުގެ އެ ބްރިޖް މަރާމާތު ކުރުމަށް ހަތް މަސް ހޭދަ ކުރުމަށް ފަހު، އަލުން އާއްމުންނަށް ހުޅުވާލީ މިދިޔަ ބުދަ ދުވަހު އެވެ.
ހާދިސާ ހިނގި އިރު ގުޖަރާތުގައި ހުންނެވި ބޮޑު ވަޒީރު ނަރެންދްރަ މޯދީ ވިދާޅުވީ މަރުވި މީހުންނާއި އަނިޔާވި މީހުންގެ އާއިލާތަކަށް ފައިސާގެ ބަދަލު ދޭނެ ކަމަށެވެ.
ގިނަ ޒަމާންވީ އަދި ރަނގަޅަށް ނުބަލަހައްޓާ ބްރިޖު ފަދަ ބޮޑެތި އިންފްރާސްޓްރަކްޗާ ހިމެނޭ ނުރައްކާތެރި ހާދިސާތައް ހިނގުން އިންޑިއާގައި ވަރަށް އާއްމެވެ.
