ސޯމާލިއާގެ ވެރިރަށް މޮގަދިޝޫގައި ހޮނިހިރު ދުވަހު އާއްމުންގެ ގިނަ ބަޔަކު އުޅެމުން ދިޔަ ސަރަހައްދެއްގައި ދިން ބޮމުގެ ހަމަލާތަކެއްގައި 100 މީހުން މަރުވެފައިވާ ކަމަށް ރައީސް ހަސަަން ޝެއިހް މުހައްމަދު ވިދާޅުވެއްޖެ އެވެ.
"މިހާތަނަށް 100 މީހުން މަރުވެ، 300 މީހުންނަށް އަނިޔާވެފައިވޭ. މަރުވި މީހުންނާއި އަނިޔާވި މީހުންގެ އަދަދުތައް އިތުރުވާނެ ކަމަށް ބެލެވޭ،" ހަމަލާ ދިން ސަރަހައްދަށް ޒިޔާރަތް ކުރެއްވުމަށް ފަހު އެމަނިކުފާނު ވިދާޅުވި އެވެ.
ސޯމާލިއާގެ އެޑިއުކޭޝަން މިނިސްޓްރީއަށް އަމާޒުކޮށް ދިން ހަމަލާގައި ގޮއްވާލީ ދެ ކާރެވެ. އޭގެ ފަހުން ބަޑީގެ ހަމަލާތަކެއް ވެސް ދިނެވެ.
ކާރުތައް ގޮއްވާލި ސަރަހައްދަކީ އޮކްޓޯބަރު 14، 2017 ގައި ބޮން ގޮއްވައި 512 މީހުން މަރުވި ހަމަލާތައް ވެސް ދިން ސަރަހައްދެވެ. އެ ފަހަރުގެ ހަމަލާގައި 290 މީހުންނަށް އަނިޔާވި އެވެ. އެއީ ސޯމާލިއާގެ ތާރީހުގައި ދިން އެންމެ ބޮޑު ހަމަލާ އެވެ.
ހޮނިހިރު ދުވަހުގެ ހަމަލާގެ ޒިންމާ އުފުލީ އަލް ގައިދާއާ ގުޅުން އޮތް އަލް ޝަބާބް ގްރޫޕުންނެވެ. އަލް ޝަބާބުން ބުނީ އެ މީހުންގެ އަމާޒަކީ އެޑިއުކޭޝަން މިނިސްޓްރީ ކަމަށެވެ.
މީގެ 15 އަހަރު ކުރިން ފެށިގެން އަލް ޝަބާބުން މަސައްކަަތް ކުރަނީ ސޯމާލިއާގެ ސަރުކާރު ވައްޓާލުމަށެވެ. އެފްރިކަަން ޔޫނިއަންގެ މަސައްކަތުން އެ ގްރޫޕުގެ ހަނގުރާމަވެރިން މޮގަދިޝޫއިން ފައްސާލީ 2011 ގަ އެވެ. އެކަމަކު އަދިވެސް ސޯމާލިއާގެ ބޮޑު ބަޔެއް އެ ގްޜޫޕުން ކޮންޓްރޯލް ކުރެ އެވެ.
