އިންޑިއާއާ އެކު މިނިވަން ވިޔަފާރީގެ އެއްބަސްވުމެއް އެކުލަވާލަން ބާއްވާ މަޝްވަރާއަށް ކުރިއެރުންތައް ލިބެމުންދާ ކަމަށް އިނގިރޭސި ފޮރިން މިނިސްޓަރު ވިދާޅުވެއްޖެ އެވެ.
"މަޝްވަރާގައި ބޮޑެތި ކުރިއެރުންތައް ލިބިއްޖެ. ދެ ގައުމަށް ފައިދާވާ އެއްބަސްވުމެއް އެކުލަވާލުމަަށް މި ދަނީ މަސަައްކަތް ކުރަމުން،" އިންޑިއާއަށް ކުރައްވަމުންދާ ދަތުރެއްގެ ތެރެއިން ޖޭމްސް ކްލެވެލީ ޓައިމްސް އޮފް އިންޑިއާ ނޫހަށް ވިދާޅުވި އެވެ.
އިންޑިއާ އާއި އިނގިރޭސިވިލާތާ ދެމެދު ފްރީޓް ޓްރޭޑް އެގްރީމެންޓް (އެފްޓީއޭ) އެކުލަވާލުމަށް މަޝްވަރާ ކުރާތާ 18 މަސް ވެއްޖެ އެވެ. އެއީ އިނގިރޭސިވިލާތް ޔޫރަޕިއަން ޔޫނިއަން (އީޔޫ) އިން ވަކިވި ފަހުން ވަރަށް ބޮޑު އިސްކަމެއް ދީފައިވާ މަސައްކަތެކެވެ.
އިނގިރޭސިވިލާތުން އެތެރެ ކުރާ މުދަލުން ނަގާ ޓެރިފް ކުޑަ ކުރުމުން، އިނގިރޭސިވިލާތުގައި އިންޑިއާ ރައްޔިތުންނަށް ވަޒީފާ އާއި ކިޔެވުމުގެ ފުރުސަތުތައް އިތުރު ކުރުމަށް އިންޑިއާއިން އެދެ އެވެ. އިނގިރޭސިވިލާތުން ވަނީ އޮސްޓްރޭލިއާ އަދި ނިއުޒީލޭންޑާ އެކު އެގޮތަށް އެއްބަސްވެފަ އެވެ.
ކުރިން މަސައްކަތް ކުރީ އޮކްޓޯބަރު 24 ގެ ކުރިން އެއްބަސްވުމަކާ ހަމައަށް ދިޔުމަށެވެ. އެހެން ނަމަވެސް، އިމިގްރޭޝަން ސިޔާސަތާ މެދު އިނގިރޭސިވިލާތުގައި ވެރިކަން ކުރާ ކޮންޒަވޭޓިވް ޕާޓީގެ ބައެއް ވެރިންގެ ކަންބޮޑުވުންތައް ހުރުމުން އެއްބަސްވުން ލަސްވަމުންދާ ކަމަށް ބެލެވެ އެވެ.
