ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގައި މިރޭ ކުޅުނު ސެމީ ފައިނަލް މެޗުތަކުން މޮޅުވެ، އެންމެ ފަހުން ތިން ފަަހަރު ޗެމްޕިއަންކަން ހޯދި، އެމްޕީއެލް އިން ފައިނަލުގައި ދިވެހި ސިފައިންގެ ކްލަބާ ބައްދަލުކުރަން ޖެހިއްޖެ އެވެ.
މިރޭ ކުޅުނު ފުރަތަމަ ސެމީ ފައިނަލް މެޗުން މިދިޔަ އަހަރުގެ ރަނަރަޕް ކްލަބް ވެމްކޯ އަތުން ސިފައިން މޮޅުވީ 6-2 އިންނެވެ. މިއީ މިދިޔަ އަހަރުގެ ސެމީ ފައިނަލުގައި ވެމްކޯ އަތުން ބަލިވެގެން ކެޓި ސިފައިންނަށް ރަނގަޅު ބަދަލުހިފުމެކެވެ.
އަނެއްކޮޅުން، މި ފަހަރުގެ ލީގު ބުރުގައި އެމްޕީއެލް ވަނީ ފެނަކަ އަތުން ބަލިވެފަ އެވެ. އެކަމަކު، މިރޭ އެމްޕީއެލް އިން ފެނަކަ ބަލިކުރީ ފޯރިގަދަ މެޗަކަށް ފަހު 3-2 އިންނެވެ.
ރެހެންދި ފުޓްސަލް ދަނޑުގައި މިރޭ ކުޅުނު ސެމީ ފައިނަލް ފުރަތަމަ މެޗުގައި ވެމްކޯ އިން ވަނީ ހަ ވަނަ މިނިޓްގައި އައިމިނަތު އަރީޝާ ޖެހި ގޯލުން ލީޑުނަގައިފަ އެވެ. މިއީ އޭރިއާތެރެއިން ތިރިތިރިން ގޯލުގެ ދުރު ކަނަށް ބޯޅަ ފޮނުވާލައިގެން އަރީޝާ ޖެހި ގޯލެކެވެ.
ފުރަތަމަ ހާފުގައި ލީޑުގައި އޮވެ ނިންމާލަން ވެމްކޯ އިން ކުރި މަސައްކަތް ނާކާމިޔާބުވީ ސިފައިންގެ ބަންގްލަދޭޝް ކުޅުންތެރިޔާ، މަތުސުޝިމާ ސުމައްޔާ ޖެހި ގޯލުންނެވެ. އޭރިއާ ބޭރުން ސުމައްޔާ ޖެހި ބޯޅަ އަމާޒުވީ ގޯލުގެ ދުރު ކަނަށެވެ. އެ ބޯޅަ ގޯލަށް ވަނީ ވެމްކޯގެ ކީޕަރު އައިޝަތު މާޖިދާ އަތުގައި ޖެހިފަ އެވެ.
މިރޭގެ މެޗުގެ ތެރެއިން ސިފައިންގެ ޓީމުގެ ތީބާ ގޯލު ޖެހުމަށް ފަހު އުފާފާޅުުކުރަނީ.--- ފޮޓޯ: އަބްދުﷲ އިޔާން/ އަދަދު
ދެ ވަނަ ހާފުގެ ކުޅުން ފެށިގެން ދެ މިނިޓް ތެރޭ ސިފައިންގެ ޓީމަށް ލީޑުނަގައިދިނީ ފާތިމަތު ތީބާ އެވެ. މިއީ އޭރިއާބޭރުން ތީބާ ގޯލު ކައިރީ ކަނަށް ބޯޅަ ފޮނުވާލައިގެން ޖެހި ގޯލެކެވެ.
ނަތީޖާ ހަަމަހަަމަކުރަން ވެމްކޯގެ ތަނަފޯން ޗަންޖައޭން އަށް ލިބުނު ފުރުސަތުތަކުގެ ބޭނުން ނުހިފުމުގެ ނަތީޖާ އަކަށްވީ މެޗުގެ ފަހު 10 މިނިޓްގެ ކުޅުން ފެށިތާ ހަތަރު ވަރަކަށް މިނިޓް ތެރޭ ސިފައިން އިތުރު ތިން ގޯލު ޖެހުމެވެ. ތީބާ އާއި ސިފައިންގެ ޓީމަށް ކުޅޭ ބަންގްލަދޭޝްގެ ފޯވާޑް، ސަބީނާ ހަތުންގެ ރަނގަޅު ކޮމްބިނޭޝަނެއް ފެނުނުއިރު، ސަބީނާ ދެ ގޯލު ޖެހި އެވެ. އަނެއް ލަނޑު ޖެހީ ތީބާ އެވެ.
މެޗުގެ ފަހު ކޮޅުގައި ވެމްކޯގެ ތަނަފޯން ވަނީ އޭރިއާތެރެއިން ލިބުނު ފުރުސަތަކުން ގޯލަށް ބޯޅަ ފޮނުވާލައިފަ އެވެ. އޭގެ ފަހުން ވެސް ސިފައިންނަށް އިތުރު ގޯލެއް ޖަހަން ފުރުސަތު ލިބި ބޭނުމެއް ނުކުރެވުނެވެ.
ސެމީގެ ދެ ވަނަ މެޗުގައި، އެމްޕީއެލް އިން ވަނީ ފުރަތަމަ ހާފުގައި ތައިލެންޑްގެ ކުޅުންތެރިޔާ ނަތަމޯން އަތުކްލާގެ ދެ ގޯލުން ރަނގަޅު ލީޑެއްނަގައިފަ އެވެ. އޭނާ ވަނީ ރަނގަޅު ތަނަށް ބޯޅަ ފޮނުވާލައި، އެމްޕީއެލަށް މެޗުގައި ހަމަޖެހިލައިގެން ކުޅެލަން ފުރުސަތު ހޯދައިދީފަ އެވެ.
މުބާރާތުގައި އެންމެ ގިނަ ގޯލު ޖެހި ކުޅުންތެރިޔާގެ ލިސްޓުގެ އެންމެ ކުރީގައި އޮތީ އެމްޕީއެލްގެ ނަތަމޯން އެވެ. އޭނާ ވަނީ މިހާތަނަށް ޖުމްލަ 18 ގޯލު ޖަހައިފަ އެވެ.
ފެނަކަ ޓީމުގެ ސަމާ (ކ) އަތުން ބޯޅަ ހޯދަން އެމްޕީއެލްގެ ކެޕްޓަން ސާލިޔާ މަސައްކަތް ކުރަނީ.--- ފޮޓޯ: އަބްދުﷲ އިޔާން/ އަދަދު
ފުރަތަމަ ހާފު ދެ ގޯލުގެ ލީޑެއްގައި އޮވެ، ނިންމާލުމަށް ފަހު ދެ ވަނަ ހާފް ފަށައިގެން ލިބުނު ފުރަތަމަ ފުރުސަތުގައި އެމްޕީއެލް އިން ތިން ވަނަ ގޯލު ޖެހި އެވެ. މި ލަނޑު ޖެހި ފަރާ އަހުމަދު އެވެ. މިއީ ފެނަކަ ކުޅުންތެރިންނަށް ފަހަތުން ހުސްވި ޖާގަތަކަށް ނުވިސްނައި ހުރި ވަގުުތުގައި ފަރާ ޖެހި ގޯލެކެވެ.
އެމްޕީއެލް ފަހަތުން ފަސޭހަ ކޮށްލެވުނު ދަނޑިވަޅުތަކެއްގެ ފައިދާނަގައި ފެނަކައިގެ ތައިލެންޑް ކުޅުންތެރިޔާ، ރާނީ މުލްޔަސާރީ ދެ ގޯލު ޖަހައި، އެ ޓީމަށް އުންމީދެއް ހޯދައިދިނެވެ.
އެކަމަކު، އިތުރު ގޯލެއް ޖަހައި، ނަތީޖާ ހަމަހަމަ ކުރަން ފެނަކައިން ކުރި މަސައްކަތް ކާމިޔާބުނުވީ އެމްޕީއެލްގެ ކީޕަރު ސަސިޕްރަޕާ ސުކްސެންގެ ހުށިޔާރުކަމުންނެވެ.
ސިފައިންގެ ކްލަބާއި އެމްޕީއެލް ކުޅޭ 18/30 ފުޓްސަލް ފިއެސްޓާގެ ފައިނަލް މެޗު އޮންނާނީ އަންނަ ބުރާސްފަތި ދުވަހުގެރޭގަ އެވެ.
