ދެކުނު ކޮރެއާގެ ވެރިރަށް ސޯލްގެ މަގްބޫލް ނައިޓްލައިފް ސަރަހައްދެއްގައި ހެލޮވީން ފާހަގަކުރަން މީހުން ޖަމާވުމުން، ފިތިބާރުވެގެން 120 މީހުން މަރުވެއްޖެ އެވެ.
ޔޮންހެޕް ނިއުސް އެޖެންސީން އެމެޖެންސީ ހިދުމަތްތަކާ ހަވާލަދީ ބުނީ ސޯލްގެ އިތައެވޮން ޑިސްޓްރިކްޓުގައި އިތުރު 100 މީހުންނަށް އަނިޔާވި ކަމަށެވެ.
އެ ހާދިސާ ހިނގި ސަރަހައްދުގެ ވީޑިއޯތަކުން ފެންނަނީ ބިންމަތީގައި ބޮޑީބޭގުތައް ހުރި މަންޒަރާއި، އެމެޖެންސީ މަސައްކަތްތެރިން ސީޕީއާރް ހަދާ މަންޒަރާއި، ތޮއްޖެހިފައިވާ މީހުންގެ ތެރެއިން މީހުން ސަލާމަތް ކުރަން އުޅޭ މަންޒަރެވެ.
އެ ހާދިސާ ހިނގަން މެދުވެރިވި ސަބަބު ސާފެއް ނޫނެވެ. ރައީސް ޔޫން ސުކް ޔޯލް ވަނީ އެމެޖެންސީ ބައްދަލުވުމަކަށް އިއުލާނު ކުރައްވައިފަ އެވެ.
ރިޕޯޓުތައް ބުނާ ގޮތުން ކޮވިޑް ބަލިމަޑުކަމަށް ފަހު ފުރަތަމަ ފަހަރަށް މާސްކު ނުލައި ހެލޮވީން އިވެންޓެއް ބާއްވަން ފުރުސަތު ލިބުމުން، 100،000 އަށް ވުރެ ގިނަ މީހުން އިތައެވޮން ޑިސްޓްރިކްޓަށް ޖަމާވި އެވެ.
އެ ތަނުގައި މީހުން ގިނަކަމުން ކަންބޮޑުވުން ފާޅުކޮށް ބައެއް ފަރާތްތަކުން ސޯޝަލް މީޑިއާގައި ޕޯސްޓު ކުރި އެވެ.
