ފިލިޕީންސަށް އެރި ބާރުގަދަ ތޫފާނެއްގައި ދެކުނު ޕްރޮވިންސްތަކުގައި ފެންބޮޑުވެ ބިންގަނޑު ކަނޑައިގެން ގޮސް 45 މީހުން މަރުވެއްޖެ އެވެ.
ތޫފާން ނަލްގޭގެ އަސަރު އެންމެ ބޮޑަށް ކުރީ މަގުއިންޑަނާއޯ ޕްރޮވިންސަށެވެ. ކޮޓަބާޓޯ ސިޓީ އާއި ވަށައިގެންވާ ހިސާބުގައި ވަރަށް ބޮޑަށް ފެންބޮޑުވެފައިވެ އެވެ.
ތޫފާން ނަލްގޭގެ މިސްރާބު ހުރީ ފިލިޕީންސްގެ އުތުރަށެވެ. އެ ސަރަހައްދުން ވެރިރަށް މެނީލާއަށް ބޯކޮށް ވާރޭ ވެހޭނެ ކަމަށް މޫސުމާ ބެހޭ އިދާރާއިން ލަފާކުރެ އެވެ.
ފެންބޮޑުވެ ބިންގަނޑު ކަނޑައިގެން ދިޔަ ސަރަހައްދުން ރެސްކިއު ޓީމުތަކުން ވަނީ ގިނަ ބަޔެއްގެ ހަށިތައް ހޯދައިފަ އެވެ. ތޫފާނުގައި ގަޑިއަކު 95 ކިލޯމީޓަރު ބާރުމިނުގައި ވައިޖެހެމުންދެ އެވެ.
ފިލިޕީންސްގެ ބޮޑު ހިސާބަކުން ފެރީ ހިދުމަތް މެދުކަނޑާލާފައިވާ އިރު، ގިނަ އަދަދެއްގެ ބަޔަކު ވަގުތީ ހިޔާތަކަށް ގެންދިޔުމުގެ މަސައްކަތް ކޯސްޓު ގާޑުން ދަނީ ކުރަމުންނެވެ.
ތޫފާނުގައި ބޯކޮށް ވިއްސާރަ ކުރަން ފެށީ ބުރާސްފަތި ދުވަހު އެވެ. މި ހަފުތާ ބަންދުގައި ތޫފާނުގެ ބާރު އިތުރަށް ގަދަވާނެ ކަމަށް ބެލެވޭތީ ބަސް ދަތުރުތައް މެދުކަނޑާލައި ސްކޫލްތައް ބަންދުކުރި އެވެ.
ފިލިޕީންސަށް ކޮންމެ އަހަރަކު ވެސް 20 ތޫފާން ކުރިމަތިވެ އެވެ. އެ ތޫފާނުތައް އަންނަނީ ޕެސިފިކް ކަނޑުންނެވެ. ތޫފާން ނަލްގޭއަކީ އާދަޔާ ހިލާފަށް ބާރުގަދަ ތޫފާނެއް ނޫން ނަމަވެސް، އޭގެ އަސަރު ބޮޑު ސަރަހައްދަކަށް ދަނީ ކުރަމުންނެވެ.
