ލަންޑަން (އޮކްޓޫބަރު 29) - ޕީއެސްޖީގެ އަށް ކުޅެމުން އަންނަ އާޖެންޓީނާގެ ކެޕްޓަން، ލިއޮނަލް މެސީ ހޯދުމުގެ ރޭހަށް އިނގިރޭސި ޕްރިމިއާ ލީގުގެ ޗެލްސީ އާއި މެންޗެސްޓާ ސިޓީން ވަންނަން ޝައުގުވެރިވާ ކަމަށް މީޑިއާ ރިޕޯޓްތައް ބުނެފި އެވެ.
މިދިޔަ އަހަރު ބާސެލޯނާ ދޫކޮށް ޕީއެސްޖީ އަށް ބަދަލުވި މެސީ، 35، ޕީއެސްޖީއާ އެކު ހަދާފައިވާ ކޮންޓްރެކްޓް މި ސީޒަނަށް ފަހު ހަމަވާނެ އެވެ.
ރިޕޯޓްތައް ބުނާގޮތުން ބާސެލޯނާ އިން އަންނަނީ އަންނަ ސީޒަނަށް ހިލޭ ޓްރާންސްފާއެއްގައި މެސީގެ ސޮއި ހޯދަން މަސައްކަތް ކުރަމުންނެވެ. އެކަން ހުއްޓުވަން ޕީއެސްޖީން ވެސް ވަނީ މެސީ އަށް އާ ކޮންޓްރެކްޓެއް ދޭން މަޝްވަރާތައް ފަށައިފަ އެވެ.
މީގެ ކުރިން ވެސް އެކި ފަހަރު މަތިން މެންޗެސްޓާ ސިޓީ އާއި ޗެލްސީން ވަނީ މެސީގެ ސޮއި ހޯދަން މަސައްކަތް ކޮށްފަ އެެވެ. އެކަމަކު، އެ ފަހަރުތަކުގައި އޭރު މެސީ ކުޅެމުން އައި ބާސެލޯނާ އިން އެ ޑީލް ކުރިއަށް ގެންދަން ބޭނުމެއް ނުވި އެވެ.
މެސީ، މިދިޔަ އަހަރު ބާސެލޯނާ ދޫކޮށްލަން ޖެހުނީ އެ ކްލަބް މާލީ އަޑިގަނޑެއްގެ ތެރޭގައި އޮތުމުން ކޮންޓްރެކްޓް އާ ކުރެވެން ނެތިގެންނެވެ. މެސީ އަލުން ބާސެލޯނާ އަށް ދާން އުޅޭ ކަމަށް މީޑިއާގައި އަޑުފެތުރުނު ނަމަވެސް އޭނާ ވަނީ އަދި މުސްތަގުބަލާ މެދު ގޮތެއް ނުނިންމާ ކަމަށް ބުނެފަ އެވެ.
އަންނަ ޖެނުއަރީ އެއް ވަނަ ދުވަހުން ފެށިގެން މެސީ ބޭނުންނަމަ ރަސްމީ ގޮތެއްގައި އާ ކްލަބަކާ އެކު ޓްރާންސްފާގެ ވާހަކަތައް ފެށޭނެ އެވެ. އަދި ބޭނުންނަމަ ޖުލައި އެއް ވަނަ ދުވަހު އެ ޓީމަކަށް ބަދަލުވެވޭ ގޮތަށް ޕްރީ އެގްރީމެންޓެއްގައި ވެސް ސޮއިކުރެވޭނެ އެވެ.
ހިލޭ ޓްރާންސްފާއެއްގައި މެސީގެ ސޮއި ހޯދަން މި ވަގުތު އޮތްގޮތުން ފުރުސަތު އޮތްއިރު، ސިޓީ އާއި ޗެލްސީގެ ވިސްނުމަކީ އެ ޑީލް ކުރިއަށްގެންދެވޭތޯ މަޝްވަރާތައް ފެށުން ކަމަށް ރިޕޯޓްތައް ބުނެ އެވެ.
ސިޓީގެ ކޯޗަކަށް ހުރީ މެސީ އަށް ކުރިން ބާސެލޯނާގައި އިރުޝާދުދިން ކޯޗު ޕެޕް ގާޑިއޯލާ އެވެ. ސިޓީ އަށް މެސީ ގެންގޮސްފާނެތޯ ކުރާ ސުވާލުތަކަށް މިހާތަނަށް ގާޑިއޯލާ ދެމުން އައި ޖަވާބަކީ، މެސީ ކެރިއަރު ނިންމާލާނީ ބާސެލޯނާގައި ހުރެ ކަމަށެވެ.
އެކަމަކު، ގާޑިއޯލާ އެ ވާހަކަތައް ދެއްކި ފަހުން މެސީ ޕީއެސްޖީ އަށް ބަދަލުވިއިރު، ސިޓީ އަށް މެސީ ގެންނަން މިހާރު ލިބޭ ފުރުސަތެއްގެ ބޭނުން ކުރަން ގާޑިއޯލާ ވެސް އެދޭ ކަމަށް ރިޕޯޓްތައް ބުނެ އެވެ.
ފްރާންސް ފުޓްބޯލް އިން އެންމެ ފަހުން ނެގި ބެލޮންޑިއޯ ގަދަ 30 ކުޅުންތެރިންގެ ލިސްޓުން ވެސް މެސީ އަށް ޖާގައެއް ނެތެވެ. އެކަމަކު، މި ސީޒަނުގައި ޕީއެސްޖީ އަށް މެސީ ދައްކަމުން އަންނަ ތަފާތު މޮޅު ކުޅުމުގެ ސަބަބުން ގިނަ ބަޔަކު އަންނަނީ މެސީ އަށް ތައުރީފު ކުރަމުންނެވެ. މި ސީޒަނުގައި ޖުމްލަ އެކު، 16 މެޗުން މެސީ ވަނީ 11 ގޯލު ޖަހައި، 12 ގޯލު ޖަހަން ފުރުސަތު ތަނަވަސްކޮށްދީފަ އެވެ.
