މެންޗެސްޓާ (އޮކްޓޫބަރު 28) - ޔުއެފާ ޔޫރޮޕާ ލީގުގައި ރޭ ޕީއެސްވީ އައިންދޯވަން އަތުން 2-0 އިން ބަލިވެ، އާސެނަލުން މި ފަަހަރުގެ މުބާރާތުގައި ބަލިނުވެ, ދަމަހައްޓަމުން އައި ރެކޯޑް ނިމުމަކަށް އައިއިރު، ކްރިސްޓިއާނޯ ރޮނާލްޑޯގެ ގޯލާ އެކު މެންޗެސްޓާ ޔުނައިޓެޑުން 3-0 އިން މޮލްޑޯވާގެ ޝެރިފް ޓިރާސްޕޯލް އަތުން މޮޅުވެއްޖެ އެވެ.
ގްރޫޕް އޭގައި މި ފަހަރު ވާދަކުރާ އާސެނަލުން ފުރަތަމަ ހަތަރު މެޗުން ވަނީ މޮޅުވެފަ އެވެ. އެކަމަކު، ރޭ ޕީއެސްވީ ދަނޑުގައި އާސެނަލްގެ ފަރާތުން ފެނުނީ އެންމެ އެދެވޭ ކުޅުމެއް ނޫނެވެ. އެއްވަރުކޮށްލައިގެން ވެސް އާސެނަލަށް ގަދަ 16 ޓީމުގެ ބުރު ޔަގީންކުރެވެން އޮތެވެ. އެކަމަކު، ބަލިވުމުން އެ އިންތިޒާރު ދިގުވީ އެވެ.
ޕީއެސްވީން ރޭގެ މެޗުގައި ދެ ގޯލު ޖެހީ ވެސް މެޗުގެ ދެ ވަނަ ހާފުގަ އެވެ. އެ ގޮތުން މެޗުން 55 ވަަނަ މިނިޓްގައި ޕީއެސްވީ އަށް ލީޑުނަގައިިދިނީ އޭރިއާތެރެއިން ޖޯއީ ވީއަމަން ޖެހި ގޯލުންނެވެ. އޭގެ އަށް މިނިޓް ފަހުން، އާސެނަލްގެ ކީޕަރު އާރޮން ރަމްސްޑޭލް ހެދި ގޯހެއްގެ ފައިދާނަގައި، ލޫކް ޑި ޔޯން ވަނީ ޕީއެސްވީގެ ދެ ވަނަ ގޯލު ޖަހައިދީފަ އެވެ.
ރޭގެ ނަތީޖާ އަށް ފަހު ވެސް އާސެނަލް ގްރޫޕް އޭގެ އެއް ވަނައިގައި އޮތީ ފަސް މެޗުން 12 ޕޮއިންޓާ އެކު އެވެ. ރޫޑް ވެން ނިސްޓެލްރޫއީގެ ކޯޗުކަމުގައި ކުޅޭ ޕީއެސްވީ ދެ ވަނައިގައި އޮތީ ފަސް މެޗުން 10 ޕޮއިންޓާ އެކު އެވެ. ނޯވޭގެ ބޯޑޯ/ގިލްމް ތިން ވަނައިގައި އޮތީ ފަސް މެޗުން ހަތަރު ޕޮއިންޓާ އެކު އެވެ. ފުލުގައި އޮތީ ފަސް މެޗުން ތިން ޕޮއިންޓް ލިބިފައިވާ ޒިއުރިކް އެވެ.
ޕީއެސްވީގެ ގޫސް ޓިލް އަތުން ބޯޅަ ހޯދަން އާސެނަލްގެ ބުކާޔޯ ސަކާ މަސައްކަތް ކުރަނީ.--- ފޮޓޯ: އޭއެފްޕީ
ފުރަތަމަ ހާފުގެ ފަހު ކޮޅުގައި ޝެރިފް ކޮޅަށް ޔުނައިޓެޑްގެ ފުރަތަމަ ގޯލު ޖެހީ ޑިއޯގޯ ޑަލޯ ބޮލުންނެވެ. ދެ ވަނަ ހާފުގައި ޔުނައިޓެޑުން އިތުރު ދެ ގޯލު ޖެހި އެވެ. މީގެ ތެރެއިން ފުރަތަމަ ލަނޑު ޖެހީ މާކަސް ރެޝްފޯޑް އެވެ. މިއީ މެޗުގެ 65 ވަނަ މިނިޓްގައި ލޫކް ޝޯ ނެގި ހުރަހަކުން ރެޝްފޯޑް ބޮލުން ޖެހި ގޯލެކެވެ.
ޔުނައިޓެޑްގެ ފަހު ގޯލު ޖެހީ އެނބުރި ޓީމަށް އައީ ރޮނާލްޑޯ އެވެ. މީގެ ހަފްތާއެއް ކުރިން ޓޮޓެންހަމް ހޮޓްސްޕާސް އަތުން ޔުނައިޓެޑް މޮޅުވި މެޗު ނުނިމެނިސް ދަނޑުން ދިޔަ ރޮނާލްޑޯ އަށް އެ ޓީމުން ފިޔަވަޅު އަޅައި، އޭނާ ފުރަތަމަ ޓީމުގެ ޓްރެއިނިން އިން ބާކީކުރި އެވެ. އެކަމަކު، ރޭގެ މެޗުގެ ކުރިން އަލުން ޓީމާ ގުޅި މުޅި މެޗުގައި އެއްކޮށް ކުޅުނެވެ. ރޮނާލްޑޯ، ރޭގެ މެޗުގައި ޖެހި ފުރަތަމަ ގޯލު އޮފްސަައިޑް އެވެ. އެކަމަކު، މެޗުގެ 81 ވަނަ މިނިޓްގައި ލިބުނު ފުރުސަތުން ރޮނާލްޑޯ ވަނީ ކެރިއަރުގެ 701 ވަނަ ގޯލު ޖަހައިފަ އެވެ.
ގްރޫޕް އީގެ އެއް ވަނައިގައި އޮތީ ކުޅުނު ފަސް މެޗުން ވެސް މޮޅުވެ، 15 ޕޮއިންޓް ހޯދާފައިވާ ރެއާލް ސޮސިއެޑާޑް އެވެ. ދެ ވަނައިގައި ޔުނައިޓެޑް އޮތީ ފަސް މެޗުން 12 ޕޮއިންޓާ އެކު އެވެ. ގްރޫޕްގެ އެއް ވަނަ އަށް ގަދަ 16 ބުރުގެ ސީދާ ޖާގައެއް ލިބޭއިރު، ޔުނައިޓެޑުން އެ ޖާގަ ހޯދާނަމަ އަންނަ ހަފްތާގައި ސޮސިއެޑާޑް ދަނޑުގައި މޮޅުވާން ޖެހޭނެ އެވެ. އެހެން ނޫނީ ޖެހޭނީ ނޮކައުޓް ބުރުގެ ޕްލޭއޮފްގައި ކުޅޭށެވެ. ތިން ވަނައިގައި އޮތް ޝެރިފަށް ތިން ޕޮއިންޓް ލިބިފައިވާއިރު، ފުލުގައި އޮތް އޮމޯނިއާ ނިކޮސިއާ އަށް ފަސް މެޗުން ޕޮއިންޓެއް ނުލިބެ އެވެ.
ގަދަ 16 ބުރުގެ ސީދާ ޖާގައެއް ހޯދާފައިވަނީ ގްރޫޕް ސީން ރެއާލް ބެޓިސް، ގްރޫޕް ޑީން ޔޫނިއަން ސެއިންޓް-ގިލޮއިސް، ގްރޫޕް ޖީން ފްރެއިބާގް އަދި ގްރޫޕް އެޗް އިން ހަންގޭރީގެ ފެރެންޝްވަރޯސް އެވެ.
