އިއްޔެ ގދ. ހޯޑެއްދޫއިން ފުލުހުން ހައްޔަރުކުރި އަބްދުﷲ ރަޝީދު ފުލުހުންގެ ބެލުމުގެ ދަށުގައި ހުއްޓާ މަރުވި މައްސަލައިގައި ރައްޔިތުން މަޖިލީހަށް ނައިފަރު ދާއިރާގެ މެންބަރު އަހުމަދު ޝިޔާމް ހުށަހެޅި މައްސަލަ ބަލައިނުގަތުމަށް ނިންމައިފި އެވެ.
މި މައްސަލަ ބަލައިގަތުމަށް ނެގި ވޯޓުގައި މައްސަލަ ބަލައިގަތުމަށް 17 މެންބަރަކު ވޯޓު ދިންއިރު ދެކޮޅަށް 22 މެންބަރަކު ވަނީ ވޯޓު ދީފަ އެވެ.
ޝިޔާމް ހުށަހެޅުއްވި މި މައްސަލައިގައި އަބްދުﷲ ރަޝީދު މަރުވި މައްސަލައިގައި މިނިވަން ތަހުގީގެއް ހިންގާ މައްސަލައާ ގުޅުންހުރި ހުރިހާ މައުލޫމާތެއް ހާމަކުރުމަށް ސަރުކާރަށް ވަނީ ގޮވާލާފަ އެވެ.
އެގޮތުން އަބްދުﷲ ރަޝީދު ހައްޔަރުކޮށްގެން ހޯޑެއްދޫައިން ލޯންޗަށް އެރުވި އިރު އޭނާގެ މެޔަށް ތަދުވާ ކަމަށް ބުނެފައިވާ ކަމަށާއި އޭނާ ޑޮކްޓަރަށް ގެންދިއުމަށް އާދޭސް ކޮށްފައިވާ ކަމަށް ވެސް ޝިޔާމް ވަނީ ވިދާޅުވެފަ އެވެ.
އަދި އަބްދުﷲ ނިޔާވުމުގައި ފުލުހުންގެ އިހުމާލު ބޮޑު ކަމަށް ފެންނަ ކަމަށާއި އެކި މަސްދަރުތަކުން އޭނާއަށް ފުލުހުން އިހާނެތިކޮށް އަަމަލުކޮށްފައިވާކަން އެނގޭ ކަމަށް ވެސް ވިދާޅުވެ ޝިޔާމް ވަނީ މި މައްސަލައިގެ މިނިވަން ތަހުގީގެއް ކުރުމަށް ސަރުކާރުގެ ކަމާބެހޭ އިދާރާތަކަށް ގޮވާލާފަ އެވެ.
މައްސަލައިގެ ފަސްފަހަތް
އިއްޔެ ގދ. ހޯޑެއްދޫއިން އަބްދުﷲ ރަޝީދު ފުލުހުންގެ ބެލުމުގެ ދަށަށް ގެނެސްފައިވަނީ މަސްތުވާތަކެތީގެ މައްސަލައަކާއި ގުޅިގެން ފުލުހުން ހިންގި އޮޕަރޭޝަނެއްގަ އެވެ.
މި އޮޕަރޭޝަނުގައި އަބްދުﷲ ގެ އިތުރުން ފުލުހުން ވަނީ ދެ މީހަކު ހައްޔަރުކޮށްފަ އެވެ.
ފުލުހުން ބުނީ އެ އިދާރާގެ ބެލުމުގެ ދަށުގައި އަބްދުﷲ ހުއްޓާ މެއަށް ތަދުވެ، ޝީޒާއެއް ޖެހޭފަދަ އަލާމާތްތަކެއް ފެނުމާއި ގުޅިގެން ގދ. މަޑަވެލީ ސިއްހީ މަރުކަޒަށް ގެންދިޔަ އިރުވެސް މަރުވެފައިވާ ކަމަށެވެ.
މި މައްސަލަ އިތުރަށް ތަހުގީގުކުރުމަށް އަބްދުﷲ ގެ ހަށިގަނޑު މާލެ ގެނެސް ޕޯސްޓުމޯޓަމް ހެދުމަށް މިހާރު ވަނީ ނިންމާފަ އެވެ.
