މިދިޔަ ހަފުތާގައި ކުރިއަށް ދިޔަ ޗައިނާގެ ކޮމިއުނިސްޓް ޕާޓީ ކޮންގްރެސްގެ ބައްދަލުވުމެއްގެ ތެރެއިން ކުރީގެ ރައީސް ހޫ ޖިންޓާއޯ ނެރުނު ވަގުތުގެ ވީޑިއޯއެއް އާއްމުވެއްޖެ އެވެ.
ސިންގަޕޫރުގެ ޗެނަލް ނިއުސް އޭޝިއާއިން އާއްމުކުރި ވީޑިއޯއިން ފެންނަނީ ހޫގެ ވައަތް ފަޅީގައި އިންނެވި ޕޮލިޓްބިޔުރޯގެ މެމްބަރު ލީ ޒަންޝޫ އަމަލު ކުރައްވާ ގޮތެވެ.
އެގޮތުން ހޫގެ އަތްޕުޅުން ލިިޔުންތަކާއި ފައިލް ނަންގަވައި، ވާހަކަ ދައްކަވާ މަންޒަރު ފެނެ އެވެ. އޭގެ ފަހުން ހޫގެ ކަނާއަތް ފަޅީގައި އިންނެވި މިހާރުގެ ރައީސް ޝީ ޖިންޕިން އެހެން އޮފިޝަލަކާ ވާހަކަ ދައްކަވަ އެވެ.
އެއަށްފަހު އެ އޮފިޝަލް ހޫއާ ވާހަކަ ދައްކައި، ކޮންގްރެސް ދޫކޮށް ވަޑައިގެންނެވުމަށް ޕްރެޝަރު ކުރައްވަ އެވެ. ވަޑައިގެންނެވުމުގެ ކުރިން ހޫ ވަނީ ޝީއާ މުއާމަލާތް ކުރައްވައިފަ އެވެ.
ބައެއް ފަރާތްތަަކުން ބުނާ ގޮތުގައި އެއީ ކޮންގްރެސް ކޮންޓްރޯލްކޮށް، ޝީގެ ނުފޫޒު ދެމެހެއްޓުމަށް އެޅުއްވި ފިޔަވަޅެއް ކަމަށެވެ. އެހެން ނަމަވެސް އެއީ ހޫގެ ސިއްހީ ހާލުކޮޅާ ހެދި އަމަލު ކުރި ގޮތެއް ކަމަށް ވެސް ބައެއް ފަރާތްތަކުން ދެކެ އެވެ.
ޗައިނާގެ ޝިންހުއާ ނިއުސް އެޖެންސީން ކުރި ޓްވީޓެއްގައި ބުނީ ހޫ ޖިންޓާއޯ ކޮންގްރެސްއިން ނުކުމެވަޑައިގެންނެވީ ސިއްހީ ހާލުކޮޅުގެ ސަބަބުން ކަމަށެވެ. އެހެން ނަމަވެސް، އެ އެޖެންސީއިން ޗައިނާގެ އެތެރޭގައި އެގޮތަށް ރިޕޯޓެއް ނުކުރެ އެވެ. ޗައިނާގައި ޓްވިޓާ އޮންނަނީ ބްލޮކްކޮށްފަ އެވެ.
އުމުރުފުޅުން 79 އަހަރުގެ ހޫ ޖިންޓާއޯ ޗައިނާގެ ރައީސްކަން ކުރެއްވީ 2003 އިން 2013 އަށެވެ. އެ މުއްދަތުގައި ކުރިއަށް ވުރެ ބޮޑަށް ޗައިނާ ދުނިޔެއަށް ހުޅުވާލި އެވެ.
އޭގެ ފަހުން ވެރިކަމަށް ވަޑައިގެންނެވި މިހާރުގެ ރައީސް ޝީ ޖިންޕިންގެ ދަށުން ގައުމު އިތުރަށް އެކަހެރިވެފައިވާ ކަމަށް އެނެލިސްޓުން ބުނެ އެވެ.
