ޔަހޫދީންނާ ދެކޮޅަށް ވާހަކަ ފެތުރުމާއި ނަފުރަތު އުފެދޭ ފަދަ އެއްވެސް ވާހަކައަކަށް ތާއީދު ނުކުރާ ކަމަށް ބުނެ އެޑިޑާސް ކުންފުނިން ރެޕް ލަވަކިޔުންތެރިޔާ ކާންޔޭ ވެސްޓްއާ ގުޅުން ކަނޑާލައިފި އެވެ.
ކާންޔޭ ވެސްޓުގެ ޔީޒީ ބްރޭންޑާއި އެޑިޑާސްގެ ކޮލެބޮރޭޝަން މެދުކަނޑާލީ ޕެރިސް ފެޝަން ވީކްގައި "ވައިޓް ލައިވްސް މެޓާ" ޓީޝާޓެއްގެ ޑިޒައިން ކާންޔޭ ވެސްޓު އާއްމު ކުރުމުންނެވެ.
އޭގެ ދުވަސްތަކެއް ފަހުން ޔަހޫދީންނަށް ފާޑުކިޔައި އޭނާ ޓްވީޓުތަަކެއް ކުރި އެވެ. އެޑިޑާސްއިން ބުނީ ކާންޔޭގެ އުފެއްދުންތައް ވިއްކުން ވަގުތުން ހުއްޓާލާނެ ކަމަށެވެ.
މީގެ ކުރިން އެޑިޑާސްއިން ބުނީ ޔީޒީ ބްރޭންޑާ އެކު ފެށި ކޮލެބޮރޭޝަނަކީ ކުންފުނީގެ ތާރީހުގައި ވެސް އެންމެ ކާމިޔާބު އެއް މަސައްކަތް ކަމަށެވެ.
އެހެންކަމުން ކާންޔޭ ވެސްޓްއާ ގުޅުން ކަނޑާލުމުން 2022 ވަނަ އަހަރު އެޑިޑާސްއަށް 217 މިލިއަން ޕައުންޑުގެ ގެއްލުމެއް ވާނެ ކަމަށް ކުންފުނިން ބުންޏެވެ.
ކާންޔޭ ވެސްޓުގެ ޓްވިޓާ އަދި އިންސްޓަގްރާމް އެކައުންޓް ވެސް ވަނީ ސަސްޕެންޑުކޮށްފަ އެވެ. ޓްވިޓާ އާއި އިންސްޓަގްރާމުން އެ ފިޔަވަޅު އެޅީ ޔަހޫދީންނާ ދެކޮޅު ހިޔާލުތަކެއް ފާޅުކުރި ކަމަށް ބުނެ އެވެ.
ސޯޝަލް މީޑިއާގެ ދެ ޕްލެޓްފޯމުން ވެސް ބުނީ ކާންޔޭ ވެސްޓް ވަނީ ނަަފުރަތު އުފެއްދުމާ ދެކޮޅަށް އެ ޕްލެޓްފޯމްތަކުން ގެންގުޅޭ ސިޔާސަތާ ހިލާފުވެފައި ކަމަށެވެ.
ކާންޔޭ ވެސްޓަކީ ނަފުސާނީ ގިނަ މައްސަލަތަކެއް ދިމާވެ، މީގެ އަހަރުތަކެއް ކުރިން ބައިޕޯލާ ޑިސްއޯޑާއަށް ފަރުވާ ކުރަން ފެށި މީހެކެވެ.
އޭނާގެ ކެރިއަރުގައި މީހުންގެ ފާޑުކިޔުން އަމާޒުވާ ވަރަށް ގިނަ ކަންކަން ކޮށްފައި އެބަ ހުއްޓެވެ. އެކަމަކު ފަހަކަށް އައިސް އެކަންކަން އިތުރުވެ، އޭނާގެ ވިޔަފާރިތަކަށް އަސަރު ކުރުމުގެ ނުރައްކާ އެބަ އޮތެވެ.
