ކްލަބް މޯލްޑިވްސް ކަޕަށް މި އަހަރު ރޯޑް ރެކްރިއޭޝަން ކްލަބް (އާރްއާރްސީ)ން ނުކުތީ ޗެމްޕިއަންކަން ދިފާއުކޮށް، ދެ ވަނަ ތަރިއެއް މޭމަތީގައި ޖެހުމަށް ކަމަށް އެ ޓީމުގެ ކޯޗު އަހުމަދު ނިސާމް (ފޮޓޯ) ބުނެފި އެވެ.
މުޅިން އަލަށް އާރްއާރްސީގެ ނަމުގައި ވާދަކޮށް މިދިޔަ އަހަރު އެ ޓީމުން ކްލަބް މޯލްޑިވްސް ކަޕްގެ ޗެމްޕިއަންކަން ހޯދީ ފައިނަލުގައި ޓީމު އެފްއެސްއެމް އަތުން 4-0 އިން މޮޅުވެގެންނެވެ. މި ފަހަރުގެ ކްލަބް މޯލްޑިވްސް ކަޕްގެ ގަދަ 16 ބުރުގައި ރޭ އެފްއެސްއެމް 2-1 އިން ބަލިކޮށް އާރްއާރްސީ ވަނީ ކުއާޓާ ފައިނަލަށް ދަތުރުކޮށްފަ އެވެ.
މި އަހަރު އާރްއާރްސީއާ ހަވާލުވި ކޯޗު ފޮޓޯގެ އިރުޝާދުގެ ދަށުން އެ ޓީމުން ވަނީ މާލެ ސިޓީ ކައުންސިލާއި މީޑިއާނެޓް އަދި މޯލްޑިވިއަންގެ އިތުރުން އެފްއެސްއެމް ބަލިކޮށްފަ އެވެ. ރޭ އެފްއެސްއެމް މެޗަށް ފަހު ފޮޓޯ ބުނީ އާރްއާރްސީން މުބާާރާތަށް ވި ތައްޔާރީތަކަށް އަނިޔާގެ ހިޔަނި އެޅުނު ކަމުގައި ވިޔަސް ޓާގެޓަށް ބަދަލެއް ނާންނަ ކަމަށެވެ.
ރޭގެ މެޗުގެ ތެރެއިން ގޯލު ޖެހުމަށް ފަހު އާރްއާރްސީގެ ކުޅުންތެރިން އުފާފާޅުކުރަނީ.--- ފޮޓޯ: މުހައްމަދު ޝާބިން/ އަދަދު
"އާރްއާރްސީ މި މުބާރާތަށް ރެޑީވީ ވެސް ހަމަ ތަށި ދިފާއުކޮށް ދެ ވަނަ ތަރިއެއް މޭމަތީގައި ޖެހުމަށް، މުބާރާތަށް ޕްރެކްޓިސް ފަށައިގެން ފުރަތަމަ 20 ވަރަކަށް ދުވަހު ކީ ޕްލޭޔަރުންތަކެއް އިންޖަރީގައި ތިބެގެން، 15 ވަރަކަށް ދުވަސް ފަހުން ކީ ޕްލޭޔަރުންނަށް ޕްރެކްޓިހަށް ޖޮއިން ކުރެވުނީ، އެވްރެޖްކޮށް އާރްއާރްސީގެ ފިނިޝިންގެ މައްސަލަ މި އުޅެނީ ކުއާޓާ އަށް ފިނިޝިން، ހަމަ ގޯލަށް ނިންމައިނުލެވިގެން މި އުޅެނީ، އެހެންވެ ޕްރެޝަރު މި ބޮޑުވަނީ،" ފޮޓޯ ބުންޏެވެ.
ފޮޓޯ ބުނީ މެޗުގެ އޮއެވަރު ދާގޮތުން ކޯޗުންނާއި ކުޅުންތެރިންނާއި ރެފްރީންނަށް ވެސް ގޯސްތަކެއް އެބަހެދޭ ކަމަށާއި މިއީ އަސްލު އެންމެން ވެސް ޕްރެޝަރަށް ދާ ކަމެއް ކަމަށެވެ.
އާރްއާރްސީން ކުއާޓާ ފައިނަލުގައި ކުޅޭނީ ވެމްކޯއާ ދެކޮޅަށެވެ، މި ދެ ޓީމަކީ މި ފަހަރުގެ މުބާރާތުގައި މިހާތަނަށް ކުޅުނު ހަތަރު މެޗުން ވެސް މޮޅުވެފައިވާ ދެ ޓީމެވެ. ވެމްކޯ އިން ދެ ވަނަ ބުރުގައި ޓީމު އެލައިޑް ބަލިކުރީ 4-0 އިންނެވެ.
