މުއްދަތު ހަަމަވެފައިވާ ބާސްމަތީ ހަނޑޫ ޕެކެޓުތަކެއް ވިއްކަމުންދާ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ(އެމްއެފްޑީއޭ) އިން ބުނެފި އެވެ.
އެ އިދާރާއިން ނެރުނު ބަޔާނެއްގައި ބުނީ މުއްދަތު ހަމަވުމުން އެ ތާރީހު އޮޅުވާލައިގެން ވިއްކަމުންދަނީ ޕާކިސްތާނަށް ނިސްބަތްވާ އަލް ގަމަރް ޕްރީމިއަމް ގޯލްޑް ބްރޭންޑުގެ ފަސް ކިލޯގްރާމްގެ ހަނޑޫ ޕެކެޓު ކަމަށެވެ.
އަލް ގަމަރް ބްރޭންޑަކީ ރާއްޖޭގައި އާންމުކޮށް ބޭނުންކުރެވޭ ބާސްމަތީ ހަނޑުލުގެ ބްރޭންޑެކެވެ.
އެ ޕެކެޓުތަކުގެ މުއްދަތު ހަމަވާ ތާރީހު ފެންނަ އިންނަ ތަނުގެ މަތީގައި ސްޓިކާއެއް ހަރުކޮށް އެ ތާރީހު ބަދަލުކޮށްގެން ވިއްކަމުންދާކަން އެ އިދާރާއިން ކުރި އިންސްޕެކްޝަނުން ފާހަގަކުރެވިފައިވާ ކަމަށް ވެސް ފުޑް އެންޑް ޑްރަގް އޮތޯރިޓިން ބުންޏެވެ.
މުއްދަތު ހަމަވެފައިވާ ކާބޯތަކެތި ވިއްކުމަކީ އޭގެ ސަބަބުން ކާބޯތަކެތީގެ ރައްކާތެރިކަމާއި ފެންވަރު ގެއްލި އާންމު ސިއްހަތަށް ނުރައްކާވުމުގެ ފުރުސަތު އޮތް ކަމެއް ކަމަށް ވެސް އެމްއެފްޑީއޭގެ ބަޔާނުގައި ވަނީ ބުނެފަ އެވެ.
އެގޮތަށް މުއްދަތު ހަމަވާ ތާރީހަށް ބަދަލުގެނެސްގެން ކާބޯތަކެތި އެތެރެނުކުރުމަށާއި ނުވިއްކުމަށް ވެސް އެ އިދާރާއިން ވަނީ އެދިފަ އެވެ.
