އެކްޓަރު ޖޮނީ ޑެޕް އޭނާގެ ރޮކް ބޭންޑު ހޮލީވުޑް ވެމްޕަޔާޒްއާ އެކު އަންނަ އަހަރު އިނގިރޭސިވިލާތުގެ ޓުއާއެއް ފަށަން ނިންމައިފި އެވެ.
ޖޮނީ ޑެޕްގެ އިތުރުން ހޮލީވުޑް ވެމްޕަޔާޒްގައި ދެން ހިމެނެނީ އެލިސް ކޫޕާ އަދި އެއިރޮސްމިތު ބޭންޑުގެ ޖޯ ޕެރީ އެވެ.
އެ ބޭންޑުން މީގެ ކުރިން ވެސް ޓުއާއެއް ރޭވި އެވެ. އެކަމަކު ކޮވިޑް ބަލިމަޑުކަމާ ހެދި 2020 ވަނަ އަހަރަށް ރޭވި އެ ޓުއާ ކެންސަލް ކުރި އެވެ.
މިދިޔަ މޭ މަހު ޑެޕް ވަނީ ގިޓަރިސްޓް ޖެފް ބެކްއާ އެކު ޔޯކްޝަޔާގައި ހުށަހެޅުމެއް ދީފަ އެވެ. އެއީ ޑެޕް އާއި ކުރީގެ އަންހެނުން އެމްބާ ހާޑްގެ ޝަރީއަތް ކުރިއަށް ދިޔަ ދުވަސްވަރެވެ.
ހޮލީވުޑް ވެމްޕަޔާޒް ބޭންޑުން އިނގިރޭސިވިލާތަށް ދާނީ ގިޓަރިސްޓް ޓޮމީ ހެންރިކްސެންއާ އެކި ޔޫރަޕްގެ ބައެއް ގައުމުތަކުގައި ހުށަހެޅުމަށް ފަހު އެވެ.
ހޮލީވުޑް ވެމްޕަޔާޒްގެ މިޔުޒިކްގެ ތެރޭގައި ހިމެނެނީ ކުރީގެ މޮޅު ފަންނާނުންގެ ޓްރިބިއުޓްތަކާއި އެ ބޭންޑުގެ އޮރިޖިނަލް ލަވަތަކެވެ.
ޔޫކޭގެ ޓުއާގައި ސްވޮންޒީ، ލަންޑަން، ބާމިންހަމް އަދި ގްލާސްގޯގައި ހުށަހަޅާނެ އެވެ. އެންމެ ފަހު ޝޯ އޮންނާނީ ޖުލައި 12 ގަ އެވެ. އޮކްޓޯބަރު 28 އިން ފެށިގެން ޓިކެޓް ވިއްކަން ފަށާނެ އެވެ.
