ޕާކިސްތާނުގެ ނޫސްވެރިޔެއްގެ ގަޔަށް ކެންޔާގެ ފުލުހުން ބަޑި ޖަހައި މަރާލި މައްސަލައެއް ތަހުގީގު ކުރަން ފަށައިފި އެވެ.
އަރްޝަދު ޝަަރީފްގެ ގަޔަށް ބަޑި ޖެހީ އާދީއްތަ ދުވަހު އުޅަނދެއްގައި ދަތުރު ކުރަމުން ދަނިކޮށް ފުލުހުންގެ ޗެކްޕޮއިންޓެއްގަ އެވެ.
ފުލުހުންގެ ބަޔާނެއްގައި ބުނީ ބަޑި ޖެހީ އުޅަނދު ނުހުއްޓުމުން ކަމަށެވެ. އަރްޝަދު އޭރު އިނީ އެ އުޅަނދުގެ ޕަސެންޖަރު ސީޓުގަ އެވެ.
އަރްޝަދަކީ ޕާކިސްތާނުގެ އަސްކަރިއްޔާއަށް ވަރަށް ބޮޑަށް ފާޑުކިޔަމުން ދިޔަ ނޫސްވެރިއެކެވެ. އަދި އޭނާއަކީ ކުރީގެ ބޮޑު ވަޒީރު އިމްރާން ހާންގެ ސަޕޯޓަރެކެވެ.
އުމުރުން 49 އަހަރުގެ އަރްޝަދު މިދިޔަ އޯގަސްޓު މަހު ޕާކިސްތާން ދޫކޮށް ދިޔައީ، ސަރުކާރުގެ އިދާރާތަކުން އޭނާއަށް ފުރައްސާރަ ކުރަމުންދާ ކަމަށް ބުނެ އެވެ.
ކެންޔާއަށް ދަތުރު ކުރުމުގެ ކުރިން އޭނާ އުޅުނީ އިނގިރޭސިވިލާތާއި ޑުބާއީގަ އެބެ. ކެންޔާއަށް އޭނާ ދަތުރު ކުރީ ކީއްވެގެން ކަމެއް ނޭނގެ އެވެ.
އަރްޝަދުގެ މަރާ ގުޅުން ޕާކިސްތާނުގެ ކަރާޗީގައި ހޯމަ ދުވަހު ނޫސްވެރިންގެ އެއްވުމެއް ބޭއްވި އެވެ. ކެންޔާ ފުލުހުންގެ ކަންކަން ބަލާ އިދާރާއިން ބުނީ އޭނާ މަރުވި ގޮތް ތަހުގީގު ކުރާނެ ކަމަށެވެ.
