އެފްއޭއެމް އިން 6.5 މިލިއަން ރުފިޔާގެ ކަރަންޓު ބިލު ނުދައްކާ ކަމަށް ބުނެ ސްޓެލްކޯ އިން އެފްއޭއެމް ހައުސް އިން ކަރަންޓު ކަނޑާލީ އިހުލާސްތެރި ނިޔަތެއްގައި ނޫން ކަމަށް އެފްއޭމް އިން މިރޭ ބުނެފި އެވެ.
ސްޓެލްކޯ އިން ސޯޝަލް މީޑިއާ މެދުވެރިކޮށް ބަޔާނެއް ނެރެ އެފްއޭއެމް ހައުސް އިން ކަރަންޓް ކަނޑާލިކަން އިއުލާނު ކުރިތާ ދެ ގަޑިއިރެއްހާއިރު ތެރޭގައި މި މައްސަލައިގައި އެފްއޭއެމް އިން ވެސް ނޫސްބަޔާނެއް ވަނީ ނެރެފަ އެވެ.
އެފްއޭއެމުން ބުނެފައިވަނީ ނިމިދިޔަ އަހަރުތަކުގެ ތެރޭގައި އެކި ފަރާތްތަކުން އެފްއޭއެމް ހައުސް އެކި ބޭނުންތަކަށް ބޭނުންކޮށްފައިވާ ކަމަށާއި އެ މުއްދަތުގައި އެ ފަރާތްތަކުން އެ އިމާރާތް ބޭނުންކުރުމުގެ ތެރޭގައި ފެނާއި ކަރަންޓައް ހިނގި އެއްވެސް ހަރަދަކީ އެފްއޭއެމް އިން ޒިންމާ ނަގަންޖެހޭ ހަރަދެއް ކަމަށް ނުދެކޭ ކަމަށެވެ.
އެފްއޭއެމް އިން ބުނެފައިވާ ގޮތުން 2020 ވަނަ އަހަރު އެ އިމާރާތް ވަނީ ކޮވިޑު ފެސިލިޓީއެއްގެ ގޮތުގައި ބޭނުންކޮށްފަ އެވެ. އަދި އޭގެ ފަހުން ސްކައުޓް އެސޯސިއޭޝަނުން ވެސް އެ އިމާރާތް ބޭނުންކުރި ކަމަށް ބުނެފައިވެ އެވެ.
މީގެ އިތުރުން 2019 ވަނަ އަހަރާއި ހަމައަށް ސްޓެލްކޯގެ އިހުމާލުން ކަރަންޓު ބިލުގެ ގޮތުގައި 1.9 ރުފިޔާ ގެ އަދަދެއް ނުބައިކޮށް އެފްއޭއެމްއަށް ބިލުކުރެވުނު ކަމަށް ސްޓެލްކޯއިން އިއުތިރާފުވި ކަމަށާއި އެ މައްސަލައިގައި ވެސް ސްޓެލްކޯއިން އެ އެފްއޭއެމް އަށް މިއަދާ ހަމައަށް ވެސް އެއްބާރުލުން ނުދޭ ކަމަށް އެ ބަޔާނުގައި ބުނެފައިވެ އެވެ.
އެ މައްސަލައިގައި މިހާތަނަށް އެފްއޭއެމުން ގާނޫނީ ފިޔަވަަޅެއް އަޅާފައި ނުވަނީ މަޝްވަރާގެ މަތިން މައްސަލަ ހައްލުކުރުމަށް ކަމަށް ވެސް ބުނެފައިވެ އެވެ.
"..ދިވެހިރާއްޖޭގައި ކުޅިވަރު ކުޅުމަށް ބޭނުންކުރެވޭ ދަނޑުތަކާއި ކޯޓުތަކަކީ އެ ތަންތަނުގެ ކަރަންޓާއި ފެނުގެ ހަރަދު ދައުލަތުގެ ފަރާތުން ބަލަހައްޓާ ތަންތަންކަމުގައި ވީ ނަމަވެސް، ފުޓްބޯޅަ ކުޅުމަށް ބޭނުންކުރެވޭ މާފަންނު ޓާފް ދަނޑަކީ އެތަނުގެ ހުރިހާ ހަރަދެއް އެފްއޭއެމުން ބަލަމުން އަންނަ ތަނެކެވެ. މިއީ އެފްއޭއެމް ފިޔަވައި ދިވެހިރާއްޖޭގެ އެހެން ގިނަ ގައުމީ އެސޯސިއޭޝަންތަކަށް ދައުލަތުގެ ފަރާތުން ފޯރުކޮށްދޭ އެހީތެރިކަމެކެވެ." އެފްއޭއެމްގެ ބަޔާނުގައި ބުނެފައިވެ އެވެ.
އެފްއޭއެމް އިން ބުނެފައިވަނީ އެ އިދާރާއިން ޒިންމާވާން ނުޖެހޭ ފައިސާއެއް ހިމެނޭ ގޮތަށް ދެއްކުމަށް ޑިމާންޑުކޮށް މިއަދު އެފްއޭއެމް ހައުސްއިން ކަރަންޓު ކަނޑާލިއިރު، އެ އިމާރާތުގައި ހިންގާ ސަރުކާރުގެ ބޭނުމަށް ބޭނުންކުރާ އެހެން ފަންގިފިލާތަކުން ކަރަންޓު ކަނޑާލާފައިނުވާ ކަމަށާއި އެހެންކަމުން މި މައްސަލައިގައި ސްޓެލްކޯގެ "އިހްލާސްތެރިކަމެއް" ނެތްކަން ހާމަވާ ކަމަށެވެ.
އަދި މި މައްސަލައިގައި ސްޓެލްކޯގެ މެނޭޖިން ޑިރެކްޓަރާ އެކު މި އަހަރުގެ މާޗު މަހު މަޝްވަރާކޮށް ދެފަރާތަށް ވެސް ގެއްލުން ނުވާނެ ގޮތަކަށް އެފްއޭއެމް އިން އެ ފައިސާ ދެއްކުމަށް އެކުލަވާލެވުނު ޕްރޮޕޯސަލެއް ހުށަހަޅާ ތަކުރާރުކޮށް މިކަމަށް ހައްލުކުރުމަށް އެދިފައިވީ ނަމަވެސް އިތުރު މަޝްވަރާއެއް ނުކޮށް ކަރަންޓު ކަނޑާލާ ސޯޝަލް މީޑިއާގައި އެކަން އިއުލާން ކުރުމަކީ އިހްލާސްތެރި ނިޔަތެއްގައި ކުރި ކަމެއް ނޫން ކަމަށް އެފްއޭއެމްގެ ބަޔާނުގައި ބުނެފައިވެ އެވެ.
މި މައްސަލަ ހައްލުކުރުމުގައި އެފްއޭއެމްގެ ފުރިހަމަ އެއްބާރުލުން ލިބޭނެ ކަމަށާއި ކުރިއަށް އޮތްތަނުގައި މަޝްވަރާގެ މަތިން މި މައްސަލައަށް ހައްލެއް ހޯދުމަށް ސްޓެލްކޯގެ ފަރާތުން އެއްބާރުލުން ލިބޭނެ ކަމަށް އުންމީދުކުރާ ކަމަށްވެސް އެފްއޭއެމް އިން ވަނީ ބުނެފަ އެވެ.
