ބެއިޖިން، ޗައިނާ (އޮކްޓޯބަރު 23) - ތިން ވަނަ ދައުރަކަށް ޗައިނާގެ ރައީސް ކަމަށް ޝީ ޖިންޕިން ވަޑައިގެންފި އެވެ.
ފަސް އަހަރުގެ އާ ދައުރަކަށް ޝީ އިންތިހާބު ކުރީ އާދީއްތަ ދުވަހު ކޮމިއުނިސްޓް ޕާޓީގެ ސެންޓްރަލް ކޮމިޓީއިންނެވެ.
އަންނަ އަހަރުގެ މާޗް މަހު އޮންނަ ގާނޫނު ހަދާ މަޖިލީހުގެ ބައްދަލުވުންތަކުގެ ތެރެއިން އެކަން ރަސްމީކޮށް އިއުލާނު ކުރާނެ އެވެ.
ކޮމިއުނިސްޓް ޕާޓީގެ ޕޮލިޓްބިޔުރޯ ސްޓޭންޑިން ކޮމިޓީގެ ހަތް މެމްބަރުންގެ އިންތިހާބު ވެސް އާދީއްތަ ދުވަހު އެވެ. ޝީ އިސްކޮށް ހުންނަވާ އެ ކޮމިޓީއަކީ ޗައިނާގެ އެންމެ ބާރުގަދަ މީހުން ހިމެނޭ ކޮމިޓީއެކެވެ.
ޕޮލިޓްބިޔުރޯ ސްޓޭންޑިން ކޮމިޓީއަށް އިންތިހާބުވި ހަތް މެމްބަރުން ޕާޓީގެ އާންމު މެމްބަރުންނަށް އިއުލާން ކުރެއްވީ ބެއިޖިންގެ ގްރޭޓް ހޯލް އޮފް ދަ ޕީޕަލްގެ ސްޓޭޖުގައި ޝީ އެވެ.
ޝީގެ ފަހަތުން އެންމެ އަރިހުގައި ހުންނެވި ޝަންހާއި ކޮމިއުނިސްޓް ޕާޓީގެ ވެރިޔާ ލީ ގިއާންގް އެވެ. އެހެންކަމުން ބެލެވެނީ މިހާރު ޕްރިމިއާ ކަމުގައި ހުންނެވި ލީ ކެކިއާންގް އަންނަ މާޗް މަހު ރިޓަޔާ ކުރެއްވުމުން، އާ ޕްރިމިއާ ކަމަށް ވަޑައިގަންނަވާާނީ ލީ ގިއާންގް ކަމަށެވެ.
ޕޮލިޓްބިޔުރޯ ސްޓޭންޑިން ކޮމިޓީއަށް އިންތިހާބުވި އަނެއް މެމްބަރުންނަކީ ކުރިން ވެސް އެ ކޮމިޓީގައި ތިއްބެވި ޒާއޯ ލެޖީ، ވާންގް ހުނިންގް އަދި މުޅިން އަލަށް ކޮމިޓީއާ ގުޅުނު ކައި ގީ، ޑިންގް ޝޫޝިއާންގް އަދި ލީ ޝީ އެވެ.
"ޕާޓީގެ މެމްބަރުން އަޅުގަނޑުމެންނަށް ކުރާ އިތުބާރަށް އަޅުގަނޑު ޝުކުރު އަދާކުރަން،" ޝީ ވިދާޅުވި އެވެ.
ޕޮލިޓްބިޔުރޯ ސްޓޭންޑިން ކޮމިޓީގެ ހުރިހާ މެމްބަރުންނަކީ އުމުރުން 69 އަހަރުގެ ޝީއަށް ވަފާތެރި ލީޑަރުން ކަމަށް ރިޕޯޓުތަައް ބުނެ އެވެ.
ޕޮލިޓްބިޔުރޯ ސްޓޭންޑިން ކޮމިޓީގެ އިތުރުން 24 މެމްބަރުން ހިމެނޭ ޕޮލިޓްބިޔުރޯގެ މައި ކޮމިޓީ އިންތިހާބު ކުރީ ކޮމިއުނިސްޓް ޕާޓީގެ 20 ވަނަ ކޮންގްރެސްގެ ތެރެއިންނެވެ.
އެނެލިސްޓުން ބުނާ ގޮތުގައި ޕާޓީގެ މައި ގުނަވަންތަކަށް ޝީގެ ވަފާތެރިން އިންތިހާބުވެފައި ވާތީ، ޗައިނާގައި އެމަނިކުފާނުގެ ނުފޫޒު ފެތުރިފައި އޮތް މިންވަރު ފެނިގެންދެ އެވެ.
ޗައިނާގެ އެންމެ ބާރުގަދަ ތިން މަގާމު ވެސް މި ވަގުތު ފުރުއްވަނީ ޝީ އެވެ. އެއީ ކޮމިއުނިސްޓް ޕާޓީގެ ޖެނެރަލް ސެކެޓްރީކަމާއި، ސިފައިންގެ ޗެއާމަންކަމާއި ރައީސްކަމެވެ. މީގެ ކުރިން ތިން ދައުރު އެގޮތަށް ފުރުއްވީ ކޮމިއުނިސްޓް ޗައިނާގެ ފައުންޑަރު މާއޯ އެކަންޏެވެ.
