ލަންޑަން (އޮކްޓޫބަރު 22) - އިނގިރޭސި ޕްރިމިއާ ލީގުގައި މިރޭ އާލިން ބްރައުޓް ހާލަންޑްގެ ދެ ގޯލާ އެކު ބްރައިޓަން އަތުން 3-1 އިން މެންޗެސްޓާ ސިޓީ މޮޅުވިއިރު، ފަހު ވަގުތު ކަސެމީރޯ ޖެހި ގޯލުން މެންޗެސްޓާ ޔުނައިޓެޑުން 1-1 އިން ޗެލްސީއާ އެއްވަރުކޮށްފި އެވެ.
ސިޓީގެ މި މޮޅާ އެކު އެ ޓީމުން ވަނީ ލީގުގެ އެއް ވަނައިގައި އޮތް އާސެނަލާ އެއް ޕޮއިންޓަށް ގާތަށް ޖެހިލައިފަ އެވެ. އާސެނަލަށް 10 މެޗުން 27 ޕޮއިންޓް ލިބިފައިވާއިރު، 11 މެޗުން ސިޓީ މި ވަނީ 26 ޕޮއިންޓް ހޯދައިފަ އެވެ. ޓޮޓެންހަމް ތިން ވަނައިގައި އޮތީ 11 މެޗުން 23 ޕޮއިންޓާ އެކު އެވެ. މިރޭގެ ޕޮއިންޓާ އެކު ޗެލްސީ ހަތަރެއްގައި އޮތީ 11 މެޗުން 21 ޕޮއިންޓް ހޯދައިގެންނެވެ. ޔުނައިޓެޑް ފަސް ވަނައިގައި އޮތީ 11 މެޗުން 20 ޕޮއިންޓް ހޯދައިގެންނެވެ.
މިދިޔަ ހަފްތާގައި ލިވަޕޫލް އަތުން ބަލިވި މެޗުގެ މާޔޫސްކަމުން އަރައިގަންން މިރޭ ސިޓީން ވަނީ މުހިންމު މޮޅެއް ހޯދައިފަ އެވެ. ބްރައިޓަންގެ ޑިފެންސް ފަހަތަށް ދިޔަ ބޯޅައެއް ހޯދައި، ހާލަންޑް އެ ޓީމަށް ލީޑުނަގައިިދިނީ 22 ވަނަ މިނިޓްގަ އެވެ. މެޗުގެ 43 ވަނަ މިނިޓްގައި ހާލަންޑް ވަނީ ސިޓީގެ ލީޑުފުޅާކޮށްދީފަ އެވެ. މިއީ ބެނާޑޯ ސިލްވާ އަށް ބްރައިޓަންގެ ލެވިސް ޑަންކް ކުރި ފައުލަކަށް ދިން ޕެނަލްޓީ އެކެވެ.
މި މެޗުގައި ޖެހި ގޯލުތަކާ އެކު ހާލަންޑް މި ވަނީ ލީގުގެ 11 މެޗުން 17 ގޯލު ޖަހައިފަ އެވެ. އަދި ހާލަންޑަކީ ސާޖިއޯ އަގުއޭރޯ އަށް ފަހު އަމިއްލަ ދަނޑުގައި ޖެހިޖެހިގެން ހަތް މެޗުގައި ގޯލު ޖެހި ފުރަތަމަ ކުޅުންތެރިޔާ އެވެ. އަގުއޭރޯ އެ ރެކޯޑް ހެދީ 2018 ވަނަ އަހަރު އެވެ.
ސިޓީ އަށް ގޯލު ޖަހައިދިނުމަށް ފަހު ހާލަންޑް އުފާފާޅުުކުރަނީ.--- ފޮޓޯ: އޭއެފްޕީ
ދެ ވަނަ ހާފްގެ ކުޅުން ފެށިގެން އަށް މިނިޓް ތެރޭ ލެއަންޑްރޯ ޓްރޮސާޑް ވަނީ ގޯލެއް ޖަހައި، ބްރައިޓަން އަށް އުންމީދެއް ހޯދައިދީފަ އެވެ. އެކަމަކު، މެޗުގެ 75 ވަނަ މިނިޓްގައި ސިޓީގެ ކެވިން ޑިބްރޭނާ ޖެހި ހިތްގައިމު ގޯލުން ސިޓީ ވަނީ ތިން ޕޮއިންޓް ޔަގީންކޮށްފަ އެވެ.
ޔުނައިޓެޑުން މިރޭ ޗެލްސީއާ ދެކޮޅަށް ފުރަތަމަ ހާފުގައި ރަނގަޅު ކުޅުމެއް ދެއްކި އެވެ. އެ ޓީމަށް ލީޑުނަގައިދޭން މާކަސް ރެޝްފޯޑަށް ލިބުނު ފުރުސަތުން ޖެހި ބޯޅަ ޗެލްސީގެ ކީޕަރު ކެޕާ އަރިއްޒަބަލާާގާ މަތަކުރިއިރު، އެންޓޮނީ ހުސްކޮށް އަރައި ޖެހި ބޯޅަ ދިޔައީ އަރިމަތިން ބޭރުންނެވެ. ޗެލްސީގެ ޕިއޭ އެެމެރިކް އޮބާމަޔަން އަށް އޭރިއާތެރެއިން ލިބުނު ފުރުސަތުގައި އޭނާ އަށް ބޯޅަ ރަނގަޅަށް ކޮންޓްރޯލް ނުކުރެވި ފުރުސަތު ގެއްލުނީ އެވެ.
ޗެލްސީން މެޗުގައި ލީޑުނެގީ 87 ވަނަ މިނިޓްގައި ލިބުނު ޕެނަލްޓީ އަކުން ޖޯޖީނިއޯ ޖެހި ގޯލުންނެވެ. މި ޕެނަލްޓީ އަަކީ ބަދަލަކަށް ކުޅެން އެރިތާ މާގިނައިރެއްނުވެ، ޔުނައިޓެޑްގެ ސްކޮޓް މެކްޓޮމިނޭ އޭރިއާތެރެއިން ޗެލްސީގެ އަރްމާންޑޯ ބްރޯޔާ އަށް ކުރި ފައުލަކަށް ރެފްރީ ދިން ޕެނަލްޓީ އެކެވެ.
އިތުރު ވަގުތުގެ ހަތަރު ވަނަ މިނިޓްގައި ކަސެމީރޯ ޔުނައިޓެޑަށް އެއްވަރުކޮށްދިނީ ބޮލުން ޖެހި ގޯލަކުންނެވެ. ކަސެމީރޯ ބޮލުން ޖެހި ބޯޅަ ކީޕަރު ކެޕާ އަތުގައި ޖެހިފައި ދަނޑީގައި ވެސް ޖެހި، ގޯލުގެ ރޮނގު ހުރަސްކުރިކަން ޔަގީންކުރީ ގޯލްލައިން ޓެކްނޮލޮޖީގެ އެހީގަ އެވެ.
ޕްރިމިއާ ލީގުގެ ތާރީހުގައި ޔުނައިޓެޑާއި ޗެލްސީ ބައްދަލުކުރި 26 މެޗެެއް ނިމިފައިވަނީ އެއްވަރުވެގެންނެވެ. މިއީ ޕްރިމިއާ ލީގުގައި އެންމެ ގިނައިން އެއްވަރުވެގެން ނިމުނު މެޗެވެ.
ލީގުގައި މިރޭ އެވަޓަން އިން ވަނީ 3-0 އިން ކްރިސްޓަލް ޕެލަސް ބަލިކޮށްފަ އެވެ. އެވަޓަންގެ ލަނޑުތައް ޖެހީ ޑޮމިނިކް ކަލްވެޓް-ލެވިން، އެންތަނީ ގޯޑަން އަދި ޑްވައިޓް މެކްނީލް އެވެ.
