ޗައިނާއާ ހިޔާލު ތަފާތުވުން އުފެދިފައިވާ ބޯޑަރު ކައިރިން ހެލިކޮޕްޓަރެއް ވެއްޓި އިންޑިއާ ސިފައިންގެ ފަސް މީހުން މަރުވެއްޖެ އެވެ.
އެއީ އޮކްޓޯބަރު މަހުގެ ތެރޭގައި އެ ސަރަހައްދުގައި ހިނގި އެފަދަ ދެ ވަނަ ހާދިސާ އެވެ. ހުކުރު ދުވަހު ވެއްޓުނީ އެޑްވާންސް ލައިޓް ހެލިކޮޕްޓަރެކެވެ.
ޑިފެންސް މިނިސްޓްރީން ބުނީ އެ ހެލިކޮޕްޓަރު ވެއްޓުނީ ޗައިނާގެ ބިމުގެ ސަރަހައްދާއި އިންޑިއާގެ އިރުއުތުރު އަރޫނަޗަލް ޕްރަދޭޝް ސްޓޭޓް ވަކިކުރާ ލައިން އޮފް އެކްޗުއަލް ކޮންޓްރޯލް ކައިރީގައި އޮންނަ ޓުޓިންގް އަވަށުގެ ދެކުނަށް ކަމަށެވެ.
ހެލިކޮޕްޓަރު ވެއްޓުމުގެ ކުރިން މައްސަލައެއް ދިމާވެގެން އުޅޭކަން އެއާ ޓްރެފިކް ކޮންޓްރޯލަރުންނަށް އެންގި އެވެ. އެހެންކަމުން ބެލެވެނީ ޓެކްނިކަލް ނުވަތަ މެކޭނިކަލް މައްސަލައެއް ދިމާވި ކަމަށެވެ.
ޑިފެންސް މިނިސްޓްރީގެ ބަޔާނުގައި ބުނީ ހަތަރު މީހުންގެ ހަށިގަނޑު ފެނިފައިވާ އިރު، ފަސް ވަނަ މީހާގެ ހަަށިގަނޑު ހޯދުމުގެ މަސައްކަތް އަދިވެސް ކުރަމުންދާ ކަމަށެވެ.
މީގެ ހަފުތާތަކެއް ކުރިން އަރޫނަޗަލް ޕްރަދޭޝް ސްޓޭޓްގެ އިރުމަތީގައި އޮންނަ ޓަވަންގް ސަރަހައްދުން ޗީޓާ ހެލިކޮޕްޓަރެއްގައި އުޅުނު އިންޑިއާ ސިފައިންގެ ޕައިލެޓަކު ވެސް މަރުވި އެވެ.
އަރޫނަޗަލް ޕްރަދޭޝްގެ ކޮންޓްރޯލް ހޯދަން އިންޑިއާ އާއި ޗައިނާއިން 1962 ވަނަ އަހަރު ހަނގުރާމަ ކުރި އެވެ. ޗައިނާއިން ދެކޭ ގޮތުގައި އެ ތަނަކީ ޗައިނާގެ ޓިބެޓުގެ ދަށުގައި އޮންނަ ތަނެކެވެ.
