ކްލަބް މޯލްޑިވްސް ކަޕްގެ އަންހެން ޑިވިޝަން، 18/30 ފުޓްސަލް ފިއެސްޓާގައި މިރޭ ކްލަބް ވެމްކޯ 6-0 އިން ބަލިކޮށް ދިވެހި ސިފައިންގެ ކްލަބުން ލީގު ބުރުގެ އެއް ވަނަ ހޯދިއިރު، އެންމެ ފަހުގެ ޗެމްޕިއަން، އެމްޕީއެލް އިން 25-0 އިން ކްލަބް ޔޫތު މިނިސްޓްރީ ބަލިކޮށްފި އެވެ.
ފަސް ޓީމުގެ މެދުގައި ކުޅުނު މި ފަހަރުގެ 18/30 ފިއެސްޓާގެ ލީގު ބުރު ނިމުނުއިރު، ސިފައިން އެއް ވަނަ ހޯދީ ހަތަރު މެޗުން ނުވަ ޕޮއިންޓާ އެކު އެވެ. ދެ ވަނަ އަށް ދިޔަ ޓީމު ފެނަކަ އަށް ވެސް ހަތަރު މެޗުން ނުވަ ޕޮއިންޓް ލިބުނުއިރު، ފައިދާ ގޯލުން ކުރިހޯދީ ސިފައިންނެވެ. އެމްޕީއެލް ތިން ވަނައިގައި ނިންމާލީ ހަަތަރު މެޗުން ހަތް ޕޮއިންޓާ އެކު އެވެ. ވެމްކޯ އަށް ހަތަރު ވަނަ ލިބުނީ ހަތަރު މެޗުން ހަތަރު ޕޮއިންޓާ އެކު އެވެ.
ޔޫތު މިނިސްޓްރީ ކެޓީ ހަތަރު މެޗުން ޕޮއިންޓެއް ނުލިބި، ބައިކޮޅަށް 91 ގޯލު ވަދެގެންނެވެ. އެ ޓީމުން މުބާރާތުގައި ޖެހީ އެންމެ ގޯލެކެވެ.
އެމްޕީއެލްގެ މިސް ނަތާމޯން (ވ) ގޯލަށް ބޯޅަ ފޮނުވާލާއިރު، މިނިސްޓްރީ ޓީމުގެ ނަހުމާ ކައިރީގައި.--- ފޮޓޯ: މުހައްމަދު ޝާބިން/ އަދަދު
މުބާރާތުގެ ސެމީ ފައިނަލް މެޗުތައް އޮތީ މި މަހު 29 ވަނަ ދުވަހު އެވެ. ފުރަތަމަ ސެމީގައި އެއް ވަނަ އަށް ދިޔަ ސިފައިން ކުޅޭނީ ހަތަރު ވަނަ އަށް ދިޔަ ވެމްކޯއާ އެެވެ. އަދި ދެ ވަނަ އަށް ދިޔަ ފެނަކަ އިން ސެމީގައި ކުޅޭނީ ތިން ވަނަ ހޯދި އެމްޕީއެލްއާ އެވެ.
ރެހެންދި ފުޓްސަލް އެއް ވަަނަ ދަނޑުގައި ކުޅުނު މެޗުގައި މިރޭ އެމްޕީއެލްގެ ތައިލެންޑް ކުޅުންތެރިޔާ، މިސް ނަތާމޯން މެޗުގެ މޮޅު ކުޅުންތެރިޔާގެ މަގާމު ހޯދީ 11 ގޯލު ޖަހައިގެންނެވެ. މުބާރާތުގައި އެމްޕީއެލް އިން މިހާތަނަށް ހޯދި ދެ މޮޅުގައި ވެސް ނަތާމޯން ވަނީ ގިނަ ގޯލުތަކެއް ޖަހައި، ތަފާތު ދައްކައިފަ އެވެ.
މިނިސްޓްރީ ކޮޅަށް އެމްޕީއެލްގެ އަނެއް ގޯލުތައް ޖެހީ ކެޕްޓަން އައިމިނަތު ސާލިޔާ ދެ ހެޓްރިކާއި އައިމަތު ޝާމިލާ ހަތަރު ގޯލާއި ފާތިމަތު ޖޫޒާން ޒަރީރު ދެ ގޯލުގެ އިތުރުން ފާތިމަތު ސައިނާ އާއި ފާތިމަތު ޝާއިގާ ކޮންމެ ކުޅުންތެރިއަކު އެއް ގޯލެވެ.
ސިފައިންގެ ޓީމުން ބަންގްލަދޭޝް ގިނަ ސަޕޯޓަރުންގެ ކުރިމަތީގައި ކުޅުނު މެޗުގައި ތަފާތު ދެއްކީ އެ ޓީމަށް ކުޅޭ ބަންގްލަދޭޝްގެ ސަބީނާ ހަތުން އާއި މަތުސުޝިމާ ސުމައްޔާ އެވެ. މުބާރާތުގައި ސިފައިން ކުޅޭ ހުރިހާ މެޗަކަށް ކަހަލަ ގޮތަކަށް ދަނޑުގެ ވަށައިގެން ތިބެނީ ބަންގްލަދޭޝްގެ ސަޕޯޓަރުންނެވެ. މެޗަށް ފަހު ސަބީނާ އާއި ސުމައްޔާއާ އެކު ގިނަ ސަޕޯޓަރުން ފޮޓޯ ނަގަ އެވެ.
ވެމްކޯ ކޮޅަށް މިރޭ ސިފައިންގެ ޓީމުގެ ސުމައްޔާ ދެ ގޯލު ޖަހައި މެޗުގެ މޮޅު ކުޅުންތެރިޔާގެ މަގާމު ހޯދިއިރު، ސަބީނާ ވަނީ ގޯލެއް ޖަހައިފަ އެެވެ. މައީޝާ އަބްދުލް ހަންނާން ދެ ގޯލު ޖަހައިދިންއިރު، ފާތިމަތު ތީބާ ވެސް ވަނީ ގޯލެއް ޖަހައިފަ އެވެ.
